[usernamo]

بسم الله الرحمن الرحيم

اولاً عمتم مساءاً ياهل الدار ..قصدى المنتدى ..

دلوقتى طبعاً هى مرحلة شد الشعر .. و تربية الذقن .. و التحول لمنال شعبى فى البيت .. حيث الملازم فى كل حتة .. و البيت يملؤه الورق حتى اخره .. و علم النفس فى اودة ابويا و الفلسفة فى اودة اختى و التاريخ فى المطبخ .. (( الانجليزى فى البانيو )) و العربى حاطه تحت بلاطة تحت السجادة .. حتى لا يكتشف ابى انى ادرس اللغة العربية ^^

المهم .. الواحد كل ما يجى يقعد ع الكتاب زى ما يكون بيتشك ! .. يفتكر مثلاً انه لازم يعمل شاى الاول .. يروح يفضل واقف قدام البراد (( و مش يعمله فى البويلر عشان ياخد وقت اطول )) و يفضل يبص فى البراد .. ياترى غلية ولا لا .. و ليه مش بتطلع دخان .. و هل لو طلعت دخان هيبقى سخن ولا ساقع و فى الاخر و بعد ساعه .. اكتشف انى مش ولعت البوتجاز من الاصل ! .. المهم اولعه و انتظر حتى تغلى المياه .. و هنا تأتى اللحظة الحاسمة فى عمر الكوباية اخد الميا و احطها فى الكوبايا .. و يتبقى مياه فى البراد تغلى .. و بم انى مؤمن بالله .. و ان الاسراف حرام و لا يجب رمى المياه .. اقوم بعمل خيرى للبيت كله .. اجرى ورا النمل الكبير الرزل بالمياه المغلية .. و اقتله Nihahahah ضحكات شريرة متقاطعة .. و ارجع تانى للكتاب يكون عدى 4 ساعات .. لسه هقعد .. اقوم قايم تانى .. اروح اشوف المنتدى و احواله .. و اشوف اخبار الدنيا .. الاقينا سحبت 4 ساعات تانى .. اقول معلش .. هتتعو فى باقى الوقت .. اروح اقعد ع الكتاب .. استنى بس حد ينطق بحرف الالف من اسمى .. يلاقينى طيارة عنده .. و تفوت 3 ساعات تانى ..

الاقى مفعول الشاى الاولانى خلص .. و اروح اعمل نفس اللى عملته فى الاول تانى و اضيع اربع ساعات ..و فى الاخر ينتهى اليوم .. و اول ما اقعد ع الكتاب تانى .. احس بالتعب .. و اقول

(( يااااااااه ..دانا تعبت اوى انهارده .. لازم انام .. زاكرت كتير اوى اوى ! ))

المهم اخش انام .. احلم بشاشة سوده .. و فجأة يطلعلى صوت اجش .. و يقول (( 18 يوم .. 18 يوم 18 يوم ))

و يتبعه صوت لرجل اسود .. مخيف .. و يسلط عليه الضوء الاحمر .. و يقول (( هتشيل اتة و كرات يا امجد .. هتشيل اته و كرات )) و تيجى نملة كبيرة .. تقوم لطشانى بالقلم .. اقوم صاحى مفزوع و افتكر انى مش زاكرت .. و اكرر نفس اليوم اللى فات !

اللى عايز اقوله من الموضوع .. (( انى مش عارف ازاكر و ده بجد .. و حاسس انى مش هخش اعلام .. و لا حتى شرطة .. هخش معهد تمريض .. انا هبقى ممرضة !))

اللى عنده نصيحة .. او مشاركة فى اللى انا بقوله .. يرد .. و اللى هيرد يقول ..

متخفش .. لسه فيه وقت .. (( يذكر كلمة امتحانات - ثانوية ))
هعضه ..

* ملحوظة : بصلى .. و بسمع قران لفارس عباد .. و بدى فلوس لاى حد ماشى فى الشارع .. ببوس ايد والدتى لحد ما هطردنى من البيت .. اعمل ايه اعمل اييييييييه