[sanawyastudents]

المشاركة الأصلية كتبت بواسطة المياة

مشكلتي أني ذاكرت وأتعبت وفي الآخر خد مجهودي ناس ما فتحوش الكتب
والغاية لا تبرر الوسيلة
وتصحيح الخطأ لا يكون بخطأ أكبر منه
ثم أن الغش حرام حرام حرام

أشكرك بصراحة علي ردك ده ... فعلا جملتين جايبين المفيد من الآخر

تفتكر يا درش لو إنت قاعد في بيتكم في أمان الله ودخل عليكم حرامي ... سرق الفلوس اللي إنتوا فضلتوا تحوشوها طول السنة ... وبعدين لما إتقبض عليه قال: البلد كلها فاسدة، وأنا أصلا مش راضي عن مستوي المعيشة اللي إحنا عايشينها، والنظام في اليلد كله بايظ، ومحدش يلومني بقي لما أسرق، ولما النظام في البلد يتصلح إبقوا لوموني لو سرقت

تفتكر هل كلامه منطقي ؟؟ هل ده يعطيه المبرر الكافي لأنه يسرق ؟؟
طب لو البلد كلها فاسدة هل هو كمان المفروض يبقي فاسد ويقول "مجتش عليا" ؟؟
عارف أول حاجة هتقولهاله إيه ؟؟ هتقوله "هو إحنا اللي ظلمناك ؟؟ إحنا ذنبنا إيه ؟؟ ماحنا مظلومين في البلد دي إحنا كمان".

نفس الوضع بالنسبة للغش يا درش ... إحنا بنذاكر طول السنة وطالع عينينا ... والناس اللي بتغش بتسرق مجهودنا اللي حوشناه طول السنة ... وهم شايفين إن نظام التعليم فاشل - ودي حقيقة - ... بس هل ده يعطيهم المبرر إنهم يسرقوا تعبنا ؟؟
وهسألك نفس الأسئلة ... إحنا ذنبنا إيه ؟؟ هل إحنا اللي ظلمناك ؟؟ ماحنا مظلومين في النظام ده إحنا كمان.

وزي ما أختك قالتلك : تصحيح الخطأ لا يكون بخطأ أكبر منه ...

طبعا انا بوجهلك الكلام اللي بيخاطب العقل ... إنما لو هنتكلم من ناحية الدين فالأمر محسوم ولا نقاش أو جدال فيه ... من غشنا فليس منا