عايزينه واحد مننا
عايش حياة كدا زينا
نفرح معاه
...نحزن معاه
حاسس جراحه وجرحنا
لو تجمعنا الظروف
نلقاه بيتبسم لنا
عايزينه واحد مننا
عايزينه واحد من هنا
نحلم معاه على قدنا
لو يوم نجوع
نلقاه جعان
وإن يوم شبعنا
يكون دا حالنا كلنا
عايزين ملامحه تكون كمان
تشبه ملامح وشنا
عايزينه ظابط للمرور
مش بس قائد للعبور
عايزينه من طين البلد
فاهم طبايع شعبنا
عايزينه حارس للحدود
أصيل ومن نبت الجدود
يحمي الحمى من العدا
عايزينه مش ليهم . . لنا
عايزينه فاهم في الحساب
في الهندسة وفي الاقتصاد
في الطب و في علم الفلك
عايزينه حاسس نبضنا
عايزينه يتقدم بنا
ولأنه واحد مننا
من جوه قلبه يحبنا
وف نن عينه يحطنا
ومعاه نكمل حلمنا
عايزينه واحد مننا
عايزينه واحد مننا
الشاعر : عمرو عماره
__________________
|