[Mr. Ali 1]

المشاركة الأصلية كتبت بواسطة Habiba Hamdy

السلام عليكم ورحمة الله وبركاته

وعليكم السلام ورحمة الله وبركاته

يارب تكونوا بخير وفى احسن حال
ملكيش دعوة

مرة كنت راكبة الميكروباص وكنت قاعده جمب الشباك(اصلى بحب اقعد جمب الشباك)
والميكروباص كان واقف وبعدين ببص من الشباك
لقيت منظر
واحد وواحدة مخطوبين هتقولولى عرفتى ازاى
مش محتاجة ذكاء (كانوا لابسين دبل فى ايدهم اليمين)
ويا تري شفتي الأسماء المكتوبة علي الدبلتين ؟ كان لازم تتأكدي انهم مخطوبين لبعض
كانوا وافقين يتكلموا ويضحكوا ماشاء الله بصراحة صوتها كان اعلى من صوته
لا واللى يغيظ انه كان مبسوط وبيضحك عادى
فرحانين وهي كانت بتعمل بروفة لما هو قادم
والناس فى الشارع حواليهم
لا وكمان وهو ماشى لازم يسلم عليها طبعا
السلام دا بياخد تقريبا خمس دقايق
فجأة لقيتها بتجرى وراه وتضربه على ضهره
يانهار كروهات
وهو بيضحك برده
انا مش فاهمة دا راجل يعنى ولا ايه؟؟!!!
لأ طبعاً . الراجل يبقي زي ده

طبعا استغربت منهم الاتنين
منها هى وتصرفاتها اللى لاتنم عن اى اخلاق عندها
ومن الاستاذ اللى كان فرحان وهى صوتها اعلى من صوته وبتضربه فى الشارع
امال انتي عايزاها تضربه فين ؟ لو ضربته في البيت , محدش هيشوفها .
لازم تضربه قدام الناس علشان تكسر عينه وتدبحله القطة

طبعا دا مش المنظر الوحيد اللى شفته
فيه اشكال والوان وبيكونوا ماشيين
او قاعدين فى اماكن عامة فى وضع لا يليق (مناظر تكسف)
وبيكونوا مخطوبين

انا ليه مركزة على مخطوبين دى
لاننا طول عمرنا احنا البنات
فيه جملة كدا تقريبا حفظناها
ان الشاب بيصاحب وبيمشى مع بنات ولما بيرتبط بيختار البنت المحترمة
مش كله بيعمل كدا . يعني البنات اللي مش ولابد معنسين ؟ الطراطير كتير والرجال قليل

ياترى ايه هو مقياس الاحترام اليومين دول؟؟؟
بلاش أجاوب علي السؤال دا
ياترى ايه الفرق بين المخطوبين دول وبين اى اتنين ماشيين مع بعض؟؟
ان اهلهم عارفين
طيب انا شايفة ان دا انيل ايه اهلهم دول اللى يسمحوا بكدا
يعنى هما واثقين فى الشاب دا وفى بنتهم لدرجة انهم يخرجوا فى الخطوبة
وبدون اى ارتباط شرعى
دياثة من الأهل بدعوي الخطوبة

طيب الشاب اللى بيخرج دا مع خطيبته وبيتصرفوا تصرفات مش لذيذة
هو بيخاف عليها بجد؟؟
اذا كانت هي مش خايفة علي نفسها ولا أهلها خايفين عليها , يبقي هو اللي لازم يخاف ؟ وبعدين دي خطوبة , يعني في أي وقت ممكن يخلع

هو شايف ان هى دى اللى هتحافظ عليه وعلى اولاده؟؟
انا اعرف ان اللى بيخطب دا بيبقى بيخاف على خطيبته من عيون الناس
حتى من نفسه
ومش يحب يخليها ملفتة للانظار باى شكل

ولا انا اللى قديمة والاحوال اتغيرت؟؟
الكلام ده ينطبق اذا كان مش هيخرج معاها ويتفسحوا ويتغندروا و .... وكله تحت مسمي الخطوبة

....

كمان فيه حاجة بتغظنى جدا
احيانا بشوف شباب بيخطب البنت علشان يتمنظر بيها قدام الناس
ليه يعني ؟ هو خاطب هيفاء وهبي ؟
اللي زي دا تافه وديوث ( ربما يكون ذكر ولكنه بالتأكيد ليس برجل )
وتلاقى عروسة مولد ماشية جمبه
بالميك اب اللى على وشها (على فكرة بقا شكلها بيبقا مش لذيذ خالص)
معاكي حق . بس هي من غير وش الدوكو والورنيش بتحس انها مش أنثي جميلة . لكن بعد كدا لما تتجوز , تبتدي تظهر علي الحقيقة المرعبة
والله فيه بنات بيكون شكلها برئ جدا
وبالميك اب دا بيضيع براءتهم وجمالهم
ولا اللبس ياعينى لابسة ومش لابسة فى نفس الوقت
وهو بسلامته ماشيلى فرحان اوى ورافع راسه فى السما
طبعاً راسه في السما . مش كل الناس بتبص علي خطيبته أو مراته . يعني الواد عرف يختار اللي الكل هينهبل عليها وعايز ياكلها بعنيه
وماشيين مشبكين ايدهم فى ايد بعض
شئ غريب
متخافيش , بعد الجواز بيمشي بعيد عنها بمسافة لا تقل عن 3 متر
انا عايزة اعرف فين الحياء؟؟؟؟؟

يعنى انهم مخطوبين دا يعطى ليهم الحق انهم يتصرفوا كدا
والله حتى لو متزوجين مش من حقهم يعملوا كدا
خلاص يعنى الحب مش مولع اوى علشان يوروه للناس
المفروض يبقا فيه حياء من ربنا ومن نفسهم كمان

اعتذر عالاطالة

في الخطوبة بيكونوا فرحانين ببعض خالص وكل واحد بيقول في التاني قصايد شعر , ولو الخطوبة باظت , تلاقي كل واحد فيهم بيطلع في التاني القطط الفطسانة
العيب علي أهل البنت ( لا عرفوا يربوا من البداية ولا عارفين يتابعوا بعد كدا )
أما الطراطير اللي هما بقوا أكتر من الهم علي القلب , فالواحد هيقول ايه لطرطور ؟ مهما قلتله , مش بيحس خالص .
وفي النهاية لازم أقول وأفضل أقول ان البنت هي اللي بتكون خسرانة ( خاصة اذا الخطوبة اتفركشت وبتحصل كتير اوي )
شكراً علي هذا الموضوع ( وبطلي تبصي علي الناس اللي ماشيين علشان نفسيتك متتعبش )
تقبلي مروري .