[WWE_CENAA2]

انا في اولي طيران القاهرة علي فكرة و داخل تانية بأذن الله السنة الجية
طبعاً خريج القاهرة مش بيتساوي بخريج امبابة , لكن فعلاً احنا مش بناخد البيزك
بس لو حسبتها بالورقة و القلم و 55 ألف جنيه تمن دراستك في امبابة
لكن في القاهرة تمن الكورس اللي في الآخر "البيزك" اللي هوا 30 الف ..
و عموماً معظم دكاترتنا بيروحلولهم هناك ..

بس معلش انا عشان مكنش بضحك عليك .. الدراسة عندنا صعبة ..
او بمعني اصح هيا مش سهلة عاوزة واحد مصحصح يعني .. و للأسف عندنا ناس كتير بتسقط
مش هقولك بقي شغل تزاكر اليوم بيومه و كدا لكن عالأقل تكون متابع و عارف ايه اللي بيحصل
و يكون عندك صبر تقلب و تقرا في مراجع و كتب اد القاموس "من سنة اولي" ..

و عموماً رأيي المتواضع لو جبت ممجموع هندسة القاهرة ادخلها و جواها في خلال سنة اعدادي
حدد بقي انت ميولك ايه و ايه القسم اللي هتقدر تأدي فيه لكن متتسرعش من دلوقتي ..
لأن لما تشوف الموضوع عن قرب ممكن ميولك تتغير و انا كنت داخل هندسة مش في دماغي
طيران اصلاً .. بس عشان لقيت نفسي كويس في كذا حاجة "زي الميكانيكا" حسيت اني هقدر
انفع فيها يعني و دخلت دماغي اوي .. و ربنا يوفقك ان شاء الله ...