[عبدالعزيز عطوة]

اسمحولي ابدأ أول مشاركة بالرغم اني صاحب الموضوع

عبدالعزيز عطوة
خريج تربية فيزياء وكيمياء 2001 بتقدير جيد
عملت سنة بالحصة 2001/2002 وكانت الحصة بجنيه واحد على ما أتذكر واستحملت البهدلة بالرغم ان الفلوس مكنتش بتكفي المواصلات ( بس كنت بدي شوية دروس علوم اعدادي كدة وكانت ماشية )

بعد كدة عملت بعقد المكافأة الشاملة لمدة سنة 2002 / 2003 اللي هو كان بـ 110 وكان بيتخصم منه وقلنا الحمد لله

في بداية سنة 2003/2004 رحت أجدد العقد فموجه عام العلوم قالي مفيش عقود السنة دي مش محتاجين قلتله دي المدرسة اللي انا فيها بمشي ليها 2 كم بعد الطريق علشان أوصلها وفي الأيام دي مكنش فيه توك توك فكنت باخدها مشي تقريبا نصف ساعة وهذا الكلام أحاسب عليه أمام الله فمين هيروح المدرسة دي مفيهاش أصلا أي مدرس علوم أنا كنت شايل 6 فصول اولى وتانية وتالتة اعدادي وهي دي المدرسة كلها وانا اللي كنت بحط الامتحانات بتاعت الشهور وبتاعت نصف العام وآخر العام والمدرس الأول مكنش بييجي نهائي غير كل شهرين 3 مرة
فالمهم الموجه قالي مفيش عقود وقعدت اتحايل عليه انا شلت المدارس اللي محدش بيروحها سنتين شوف لي اي عقد وحاولت أشوف ناس معرفة المهم لم يجدد لي التعاقد

رحت مدرسة على زكي وقدمت فيها والحمد لله طلعت الأول في الانترفيو والامتحانات على 45 مدرس فيزياء وكيمياء كانوا مقدمين وخدت تدريب لمدة شهرين ببلاش وبعدين بدأ العام الدراسي واشتغلت رابعة ابتدائي وخمسة ابتدائي واولى اعدادي وثانية اعدادي وكان حاططني لأولى ثانوي فيزياء لكن الفصل مكنش لسة فتح
وكان المرتب 150 جنيه

ولكن يشاء الله أن أحصل على فيزا الامارات وسافرت واشتغلت مدرس لمدة 4 سنوات ورجعت 2008 ومن ساعتها بحاول احصل على عقد لكن مش عارف بالرغم ان في ناس كتير غير متخصصة حصلت على عقود بالواسطة
والآن شغال دروس فيزياء والحمد لله الحالة تماما
لكن بعد الثورة تجدد الأمل في الحصول على العمل
والله الموفق
معلش طولت عليكم لكن كنت عايز أفضفض شوية