بصى ياقمر انا هكلمك عن الانجلش لانى كنت واخداه وهشرحلك بالظبط هو عبارة عن ايه وسامحينى لو هطول بس انا عاوزة اديكى فكرة كاملة وانتى تقررى
انجلش عبارة عن 3 وحدات انا هسميهم وحدات عشان اقدر افهمك اكتر
الوحدة الاولى عبارة عن 3 دروس عن جزر الهاواى اول درس بيشرح الاسامى والمكان والمميزات بتاعت الجزر
والتانى عن الرياضة اللى فى جزر الهاواى والتالت عن العادات والتقاليد الوحدة دى بجد ممتعة اوى وانا كنت بعشقها بصراحة المهم كل درس من دول المدرس بتاعك هيديكى عليه كام سؤال تحفظيهم وهتدخلى الامتحان تلاقى منهم 2
الوحدة التانية عن طبيبة ايطالية اسمها ماريا وبرضه الوحدة دى 3 دروس الاول عن طفولتها والتانى عن بيت للاطفال عملته والتالت عن انجازاتها ومؤتمر حضرته ودى برضه وحدة لذيذة اوى وبرضه المستر هيديكى على كل درس كام سؤال تحفظيهم هتدخلى الامتحان تلاقى منهم 2
الوحدة التالتة عن القضايا العالمية الدرس الاول عن الزيادة السكانية ودة درس لطيف برضه
الدرس التانى عن التلوث ودة برضه لطيف جدا
الدرس التالت عن الثورة الخضرا ودة اساسا مبصتلوش لانه كلامه صعب شوية وهحيلك ليه مذاكرتوش بس تحت فى نظام الامتحان
برضه المستر هيديكى على كل درس كام سؤال تحفظيهم وتدخلى هتلاقى منهم 2
كدة خلصنا الدروس ندخل بقى على الجراميييييير
الجراميييير سهل اووووووووووى والله جدا ومفيهوش حاجة انا عن نفسى كنت بكره درس واحد بس بتاع الافعال وحروف الجر بس دة لعيب فيا حتى فى المنهج العادى كان عندنا دروس شبهه بس برضه كنت بكرهها انما الباقى كله حلو جدا
ندخل بقى على نظام الامتحان اولا الامتحان تقريبا 9 اسئلة وعليه كله 40 درجة وبيتقسم بعد كدة على 4 عشان يبقى من عشرة يعنى الواحدة فى تشوز بيبقى عليها 1/8 درجة تقريبا
اول سؤال بيبقى 10 تشوز سهلين لو انتى مذاكرة كويس هتحليهم كلهم صح
تانى سؤال بيبقى 5 فايند زا ميستيك وبرضه حلو مش معقد زى فايند زا ميستيك بتاع الامتحان العادى بتاع الانجليزى
تالت سؤال بيبقى 5 ريرايت من المنهج برضه بس ممكن واحدة منهم تبقى لفة سنة بس لو فكرتى ثانية واحدة هتحليها صح
رابع سؤال بيبقى عبارة عن 6 اسئلة على الدروس اللى انا شرحتهالك فوق بتختارى منهم 4 بس عشان كدة حتى لو ذاكرتى هاواى وماريا بس هتحلى 4 اسئلة لان كل وحدة زى ماشرحتلك فوق بيجى عليها سؤالين بس مش اكتر بس برضه زيادة احتياط حاولى تاخدى فكرة ولو بسيطة عن درس التلوث والتعداد السكانى وممكن تسيبك من درس الثورة الخضرا دة مش لازم لو صعب عليكى مش مهم
السؤال الخامس قطعة كومبريهنشن عليها 4 اسئلة بتجاوبيهم من القطعة زى قطعة الامتحان العادى
السؤال السادس قطعة كومبريهنشن بس عليها 4 تشوز
السؤال السابع قطعة كومبريهنشن عليها واحد تشوز بيسألك فيه يااما ايه النهاية المتوقعة للقصة يااما القصة دى بتتكلم عن ايه ودى بتبقى سهلة خالص على فكرة ومش معقدة
السؤال التامن اكتبى حوار بين شخصين كل واحد يتكلم 3 مرات من غير سلامات ودة بيبقى والله سهل اووووى واى حوار فى سياق الموضوع هتكتبيه هيحشبهولك صح
السؤال التاسع والاخير اكتبى مقال من 20 سطر عن موضوع ودة هيديكى فيه موضوعين تختارى منهم واحد وهتكتبيه اكنك بتكتبى براجراف عادى بس طويل شوية
انا اخدت المستوى على مدار السنة فى ست حصص كل حصة بملزمة ذاكرت ملزمتين بس وجيت ليلة الامتحان ذاكرت الاربعة التانين وحليت اسئلة كتاب المدرسة اللى المستر كان حاطيطهالى فى ملزمة لوحدها ودخلت الامتحان وجبت 9 ونص فانتى لو ذاكرتيه كل ماتخدى حصة تذاكريها على طول وماتراكميش عليكى حاجة بحيث انك ليلة الامتحان تبقى بتراجعى بس والله هتقفليه انا عشان استهترت بيه ويعتبر مذاكرتوش غير ليلة الامتحان كنت هقفله بس دة نصيب وكل الحكاية نقصت نص درجة فبجد هو حلو والله ومش صعب زى مابيقولوا والله بس هو محتاج انك متستهتريش بيه وتهتمى بيه شوية هتقفليه
__________________
ابشر بخـــــير عاجل تنسى به ما قد مضى
فلــرب أمر مُسخط لك في عواقبه رضـــــا
ورُبما ضــــاق المضيق ولرُبما اتسع الفضـــا
الله يفعل ما يشــــــاء فلا تكن معترضــــــا
الله عودك الـجميل فقس على ما قد مضـى
|