[د.عبدالرحمن المنياوي]

يا أخي العزيز انا مش عارف حضرتك إيه اللي مزعلك بالظبط .. انت عاوز الناس دول يروحوا النار يعني والا إيه ؟؟ واحد قدم في التربية والتعليم علشان يشتغل بالحصة يعني ببلاش .. والتربية والتعليم في المنيا كانت كاتبة قائمة بالتخصصات المطلوبة وكان فيها حقوق وخدمة اجتماعية وسياحى وفنادق وطب بيطري كمان علشان انت ماتعرفش .. وعملوا كده 3 سنين على الوضع المخجل ده ولما قامت الثورة ثبتوهم .. انت بقى إيه اللي مزعلك ؟!!!! دي أرزاق ودول بشر وكم من ناجح لم يكن ناجحا في نظام الدراسة الثانوية العقيمة التي اعتمدت على كبس العقول وشحنها بالمفيد والغير مفيد دون التطرق لما ينفع المجتمع وينير عقولنا .. المنومة كانت فاشلة فلا تتوقع أن تكون النتائج محايده كما تريد الآن (كل في تخصصه) لأ ده كلام لن يحدث الآن .. وخليني أقف معاك على كام نقطة : 1- أولا حضرتك زعلان بيتهيألي كده انت شغال في الخليج ومش قادر تنزل تاخد تعيينك هنا مع التربويين وتسيب الخليج .. طيب المشكلة مش في الغلابة اللي هنا .. المشكلة عندك انت .. عاوز تنزل تتعين هنا اتفضل .. أما لو عاوز تخليك عندك هناك سيب الناس هنا تاكل عيش .. ولو مش مستأمن إن الناس دول يعلموا ولادك خلاص بسيطة علم ولادك عندك في الخليج واهو بالمرة يتعاملوا معاملة نظيفة .. 2- ثانيا كلية التربية بتاخد في أفضل حالاتها 92% من علمي ودول عددهم قليل .. وبتاخد 86% من أدبي ودول الأكثرية .. وماتنساش إن اللي علموك في مصر من الأجيال القديمة كانوا دبلوم معلمين ودبلوم تجارة ودبلوم زراعة .. أما موضوع إن الناس دول جايبين ثانوية عامة 50% ودخلوا معاهد علشان يتساووا بـ..... ده كلام متحيز وراجع نفسك وهتلاقي خريج المعهد ده أخوك واخويا .. وبعدين انا باقولك إن المعاهد الخاصة فيها تعليم ومستوى وكفاءة أحيانا كتيرة بتفوق التعليم العام .. 3- ماتقولش خريجي معاهد .. قول حاصلين على بكالوريوس كذا .. لأن الناس دي ماقدمتش بالمعهد دي قدمت بشهادة البكالوريوس اللي معتمداها وزارة التعليم العالي ومعادلاها من المجلس الأعلى للجامعات مساوية للدرجة العامة .. وهم قدموا بيها .. 4- انت عاوز اللي يشتغل في التربية والتعليم يكون خريج تربية فقط ؟ انا باقولك لما كلية التربية توفر التخصصات المطلوبة نبقى نقصر التعليين في التعليم عليها بس .. يعني قوللي من هيدرس المواد التجارية مثل المحاسبة والاقتصاد خلافها غير تخصص تجارة .. عندك تربية قسم تجارة؟؟؟؟؟؟؟؟؟؟؟؟؟؟؟؟؟؟؟ .. مين هيدرس في المدارس الفندقية مواد الإشراف الداخلي وفن الخدمة وفن الطهو وشركات السياحة والطيران غير تخصص سياحة وفنادق؟ عندك في تربية قسم طيراااااااااااااان ؟؟؟؟؟؟؟؟؟؟؟؟ مين هيدرس مواد التشريعات والقانون غير خريج الحقوق ؟؟؟؟؟ يبقى احنا لازم نستعين بالناس دي ونفرض عليهم انهم يكونوا تربويين يعني ياخدوا الدبلوم التربوي العام إضافة إلى مؤهلهم وبكده هيفوقوك انت لأنهم سيجمعوا بين مؤهلين وليسوا تربويين فقط ؟!! 5- انا عاوز أوضحلك ان كتييييييييير منهم استحملوا الهوان في الحصة والمعاملة أم بلاش وهم اصحاب بيوت .. وحتى اللي شغال منهم في أماكن تانية فده لايمنعه القانون لأن اللي شغال بالحصة ليس متعاقد ولا مثبت حتى الا يجمع بين وظيفتين .. وهم على فكرة لو خيروهم 100 مرة ماكانوش هيختاروا التربية والتعليم بس ده اللي كان متاح في وقتها .. على الأقل هم استحملوا التعب وربنا كرمهم بالتعيين .. فيه تربويين كتير ماستحملوش التعب والشغل بالحصة وسافروا برة البلد وربنا طبعا يكرمهم بره بس هم مايبصوش في اللقمة الحاف اللي في إيدين الغلابة دول .. واخيرا لوحد فيهم يقدر يشتغل مدرس محاسبة أو مدرس شركات طيران أو مدرس قانون يجي يورينا مؤهلاته ويشرف .. وما ربك بظلام للعبيد .. 6-مفيش حاجة اسمها بالواسطة يابيه في تعيين الحصة في المنيا .. واسطة على إيه هههههههه هي أي حاجة تتقال وخلاص ... من 3 سنين أعلنت التربية والتعليم تاخد ناس بالحصة وتقدم كل الناس اللي في المنيا تخصصات مختلفة اللي شغال واللي لأ حتى الأزهريين كمان تقدموا ..وتم قبول الكل وتم توزيع الناس جنب بيوتهم نظرا للأعداد المهولة اللي قبلت ساعتها .. وهم دول اللي دلوقت اتعينوا بالقرار .. 7- مفيش حد جايب امتياز في تربية وقاعد في بيته .. ولو فيه حد ودول عددهم لا يتعدى أصابع اليد الواحدة .. فإن تعيينات العشرين الأوائل صدر قرار بها من 3 شهور وهيتعين في المكان اللي يختاره ويشاور عليه هو بنفسه محدش هيغصبه .. ويستلم كمان قبل العيد .. 8- أنا دكتور ومانيش خريج معهد ولا خاص وكنت جايب في الثانوية العامة 95.6% لاحسن تفكرني بادافع عنهم علشان منهم لأ .. فلنتق الله ولنعود ونستغفر ونراجع أنفسنا .. وشكرا