الكلية محتاجة منك تتحملى صدمة الموجة الأولى
و ده باختصار إن الناس داخلة كلها ممتازة و برستيج و أخلاق
بيتفاجأوا إن الكلية بتاعتنا هى من أقل الكليات اللى مهتمين بيها فى طنطا !
هتحسى ضغط معنوى عالى لما تلاقى اللى حواليكى طباعهم بتتغير بشكل مفاجىء
عشان كده دايمًا بنصح حاول قدر الاستطاعة متتعرفش على حد جديد من إعدادى بالذات
الدكاترة مش كلهم خدومين بس كلهم طيبين جدًا حتى لو شوفتى منهم شوية نرفزة
المعيدين تقريبًا كلهم ودودين يعنى طنطاوية بجد احترام و بيحبوا يساعدوا أى حد
و مفيش معيدين بيتنططوا على طلبة يمكن إلا بعض المعيدين فى الرسم الهندسى
فى الرسم الهندسى ده بقى إحدى عقد إعدادى
فيه ناس ما بتحبش الرسم الميكانيكى ده فلو حسيتى مستواكى بيقل فيه
يا تدورى على حد يفهمك هنا فى القسم أو حد من أصحابك
منفعش كورس علطول عدل
لأن الرسم عندنا كان أكتر مادة بتتشال إنما حاليًا رياضة هههه
الرياضة قولت تركزوا على المحاضرات جامد جدًا و تفصصوا معلوماتها و لو فيه حتة كلها الدكتور فى الشرح تدوروا فى المكتبة
و عمومًا الدكتور هيعقدكوا فى الرياضة و فى الامتحان بس لو حالل حلو يعنى بنى آدم بيفهم امتياز عدل
الفيزياء محاضرات و سكاشن و عمومًا زى أى كلية يمكن عندكم مادة مادتين خفاف فى الترمين لأن عندكوا الدكتور مش بيهتم بالمادة العلمية بالدرجة الأولى
عمومًا للأسف عندنا اللى بيدحوا بيجيبوا مجاميع
باستثناء تلات مواد
رياضة و رسم و كيمياء
الكيمياء عندكوا دكتور جميل بشكل مش هتشوفيه بعد كده
الدكتور ده كتابه حجرى و مليان
بس عشان كل سنة بيغير محاضراته هههه بيحارب الكورسات
لا تخرج امتحاناته من المحاضرات بس ازى
بيدمج المسائل فى بعض ازاى متعرفش و عمومًا مبتتحلش ولو بتتحل مفيش وقت ههههه
امتحانه طويل فده و ده بالذات محاضرات محاضرات محاضرات لو تعرفى تسجلى المحاضرة صوت يبقى قشطات
لأن هتيجى فى الآخر لا ورق كورسات نافع و لا كتاب نافع و لا اي حاجة
فنصيحتى اللى منفذتهاش ليكى
احضرى كل المحاضرات و حاولى تسجليها و تكتبى كل كلمة لأن ده هيوفر وقت كتير جدًا معاكى فى آخر السنة
و تهتمى بحاجة عندكوا فى المادة اسمها الأسمنت
بالمناسبة أنا مش كنت حالل كويس بس حاولت فى كل المسائل و فى مسألة رخمة كنت تقريبًا الوحيد اللى حليتها صح
أو قربت من الحل و جبت امتياز هل استحقها كدرجات طبعًا لأ بس ده طريقته
و الدح مع الدكتور ده معناه المادة جود باى و زورونى كل سنة مرة
باختصار شديد
التلات مواد اللى ذكرتهم دول امشى كل واحد بالاسطمبة ده
باقى المواد كل الطرق هتأدى لنفس النهاية السعيدة إن شاء الله
بالنسبة للأقسام
أعلى قسم مدنى مقبول بدون مواد
و زيه كهربا بس بمادة
عمارة ناجح بأى حاجة و معدى اختبار التدريب و ده بعد اعدادى بيقيس قدرات و جديد شوية فى الكلية
ميكا ناجح و مش فارقة معاه الدنيا و اللى فيها هههه
فزى ما حضرتك شايفة لو دل التنسيق على شىء فبيدل على الذل و الانكسار المفاجىء اللى هتشوفوه فى الكلية
كلية إحباط بمعنى الكلمة هههههههه بس فيه حجات هتحبيها أوى فيها و حجات هتكرهك فى عيشتك
أنا مثلاً جبت جيد جدًا فى الرسم الميكانيكى و ده بالنسبة لمجموعى حلوة جدًا خصوصًا إن أعمال السنة عندى فى الباى باى
و رغم كده ده أكتر مادة كرهتها لأنها بتسرق وقت بطريقة عجيبة جدًا جدًا
يعنى تقدرى تقولى يومين أو تلاتة المادة ده واكلاهم متقدريش تعملى فيهم حاجة مع إنى مكنتش باخد كورس فبوفر وت
بالمناسبة الكورسات فى مادة الرسم الهندسى عندنا حوالى 70 لـ 90 % من طلبة إعدادى بياخدوها
نقطة أخيرة المذاكرة فى هندسة معيار للقدارت فعلاً
فى ناس تذاكر آخر أسبوعين و تقفل المواد
وناس بتذاكر طول السنة و على الحميد المجيد
فحاولى تعملى خلطتك السحرية اللى تناسبك فى المذاكرة و كده
أتمنى ما كونش رغيت فى كلام مش مفيد
و أتمنى تستفادى من المعلومات ده
بالتوفيق ،،،،،،،
__________________
من السهل أن يكون لك مكان في دفتر عناوين أصدقائك
ولكن من الصعب أن تجد لك مكاناً في قلوبهم
|