[علمي علوم]

المشاركة الأصلية كتبت بواسطة 3olomgy

ازيكم يا جماعة ...انا العضو اينشتاين بس العضوية القديمة نسيت الباسوورد بتاعها ومستنى الباسوورد يوصلنى ع الايميل فى القريب العاجل باذن الله ( سنتين على الارجح )

دلوقتى يا اميرة بما انك خبيرة فى الكلية بتاعتنا دى فانا عايز اصدعك شوية

دلوقتى انتى عارفة ان التخصص من سنة تانية وانا كنت عايز اتخصص جيوفيزياء ودلوقتى انا فى التيرم الاول اتدلعت حبتين تلاتة وشلت مادتين بس جبت جيد فى الجيوفيزياء ومقبول فى الجيولوجيا وجيد جدا فى الفيزيا ...عايز اعرف بقى هل المادتين اللى شلتهم دول هيكونوا عقبة ؟ مع العلم انى ان شاء الله هلتزم التيرم ده وربنا يوفق واعوض ما فات
فياريت لو تقدرى تجاوبينى وهل تعرفى حد فى قسم الجيوفيزياء وكان طالع القسم بمادتين ؟
استفسار كمان بقى ...عندك فكرة السمر كورس هتبقى مصاريفه كام ؟
استفسار كمان ...انهى احسن فى الملازم ..الحرية ولا الخواجة ؟

اهلاااااااا وسهلااااااااا
اخبارك ايه فى الكلية يا اينشتاين؟؟؟

معلش إن شاء الله تجيب احسن من كدا بكتير الترم التانى وربنا يوفقك

ههههههههه خبيرة :D ربنا يكرمك ....... بس مفيش صداع ولا حاجة , اسأل زى ما انت عايز.


بالنسبة للتخصص فى جيوفيزياء فالحقيقة انهم كل سنة بينزلوا شروط مختلفة عن اللى قبلها يعنى من سنتين كدا كنت علشان تتخصص فى اى قسم سبيشيال ( منفرد ) كنت لازم تبقى بيور لكن السنة اللى فاتت مثلا طلبوا النجاح فى مواد التخصص وبس. فيارب السنادى تكون الشروط كدا .

على العموم انا هحاول اسئلك إن شاء الله فى الموضوع ده يمكن يكون فى حد عنده علم بالشروط اللى هتتحط السنادى إن شاء الله.

وبالنسبة لحد اعرفه فى جيوفيزياء , فانا اعرف زمايل ليا اتخصصوا فى جيوفيزياء و منهم ناس كانوا معاهم مواد من اولى بس اللى مش متأكده منه هل هما كانوا محولين فشيلوهم المواد دى ولا كانوا شيلينها فعلا من سنة اولى! على العموم انا هتأكد منهم إن شاء الله واقولك.

وبالنسبة لمصاريف السمر كورس , فالسنة اللى فاتت كانت كل مادة ب 50 جنيه , ومسموحلك بدخول السمر كورس فى ثلاث مواد بس.
بس طبعا المصاريف والشروط ممكن برضه تتغير السنادى , بس فى الغالب هتبقى كدا برضه إن شاء الله .

وبالنسبة للملازم..... فانا عادةً بفضل الخواجة لان الملازم اللى بتنزل فيها غالبا بتبقى من دكاترة او معيدين
لكن الحرية فى الغالب بيبقوا هما اللى عملنها وهما طلبة خريجين فبتبقى فيها اخطاء كتيرة
لكن احسن حاجة لما تحتاج ملازم فى مادة معينة , اسأل هل فى معيد بيعمل فيها كورسات ( دروس يعنى ) وفى الغالب ورق الكورس ده بينزل فى المكتبات اللى بره ( وفى الغالب_ بس مش على طول_ بتبقى الخواجة ).
وعلى فكرة احسن ورق لمادة معينة بيبقى معروف يعنى اسأل اغلب زمايلك اشتروا انهى ورق وهو ده بيبقى الاحسن.

يا رب اكون افادك
و ربنا يوفقك