[تامر الطويل]

يوميات اتنين مش متفقين

الحلقه الرابعه

بعنوان

كمين من حمايه وحماتى




وفى بيت شرين وانا بفطر ومعمولى كمين



تامر / السلام عليكم ياحمايه ياسكرة وياحماتى ياورده منوره
انا جايبلكم نصف كيلو موز وربع كيلو لب وسودانى ، إنما إيه على الفرازة ياعمى
زليت الراجل وكان هيضربنى وانا قاعد بنقيهم واحده واحده
هما صحيح دمرولى الفلوس اللى حيلتى بس مش هيغلوا عليكم

حماتى / إتفضل ياإبنى اقعد إفطر

عمى / أقعد ياتامر كل متتكسفش ، ده بيتك

تامر / بقه ده معقول برده ياعمى اتكسف وانا معاكم
نولنى الفرخه دى ياحمايه ياحبيبى
عمى / الفرخه كلها !!!
تامر/ ايه عاوز حته؟؟
انا اسمع ان الفراخ مضرة بصحت الناس الكبيرة اللى زيك ياحمايه

كل رز وسلطه دول مفدين جدا ليك

ايه ياحماتى هو مفيش حلو ولا ايه
فين كنفتك وقطيفك الحلوة

حماتى / انت جاى تخلصلنا الاكل ومروح ولا إيه؟؟
قومى ياشرين سعدينى ، قبل مايكلنا
ولدك عاوز تامر فى كلام مهم

شرين / حاضر ياماما

تامر / ايه ياشرين انتى هتسبينى لوحدى انا كنت حاسس ان العزومه دى وراها حاجه
عمى حبيب قلبى ياااااه انا اتاخرت خالص على التدريب

عمى / هو انت عندك تدريب النهارده

تامر / لاء مش عندى ليه ياعمى بتسالنى السؤال الغريب ده

عمى / انت ناوى تجننى ياواد انت
انت مش لسه قايل هتأخر على التدريب

تامر / اه التدريب صح ياعمى انا لازم افرحك ماانت حمايه برده مش المدرب بتاعى قلى النهارده انى اكيد فى يوم من الايام هحترف فى الزمالك او الاهلى

عمى / الزمالك والاهلى انت عاوز تجننى ياواد إنت
خليك فى الوظيفه ياحيله امك

تامر / ايه ياعمى حيله امك دى انا على فكرة مش حلتها
انا عندى عمرو ومحمود اخواتى

وبعدين انت ليه مش فاهمنى ياعمى انا لما أحترف الفلوس هتنزل عليا زى الرز
وساعتها هنغنغ بنتك واكيد هينوبك من الحظ جانب

عمى / واد إنت ياض أنا مش ناقص دوشتك نهايه الكلام إمته هتتجوز بنتى ولا هتقضيها رايح جاى علينا كده وخلاص

تامر / بصوت واطى انا كنت عارف ان العزومه دى وراها حاجه منك لله ياشرين

عمى / مترد ياسبع البرومبه امته هتتجوز بنتى

تامر / الصبر ياعمى انا بعمل اللى عليا على رئى المثل
واجرى يابنى ادم وراء الاتوبيس ياتركبه يامتركبوش
وزى ماقال الامام الشافعى
ضاقت فلما استحمكت حلقاتها فرجت وكنت اظنها لاتفرج

عمى / اه يانى منك وعلى رئى سعد زغلول
مفيش فايده
قوم ياله من قدامى فز قوم جاتك القرف

تامر / ايه ياعمى هو انا مش هحلى ولا ايه انا شايف كنافه وقطايف فى المطبخ

عمى / وله انت متعصبنيش غور فى داهيه وخلى بالك قدامك 3 شهور بالتمام والكمال وبعدها هفسخ خطوبتك على بنتى

تامر / ايه ياعمى ده مش ممكن
انا ممكن اصور فيها قتيل انتوا فكرنى ايه

شرين / تامر تامر مالك

تامر/ الحقينى ياشرين قال ايه ابوكى مش عوزنى اكل الحلو مع انك قيلالى فى التليفون انكم عملين قطايف وكنافه
مش عيب كده ياحماتى

عمى / يخرب بيتك على بيتى على اليوم الاسود اللى فكرت اجوزك فيه بنتى
واله انت قدامك 3 شهور بالظبط وبعدها هجوز بنتى لاى واحد جاهز

شرين / انا مش هتجوز اى حد غير تامر يابابا

عمى / خشى جوة جاتك القرف انتى وخطيبك

حماتى/ براحه على البنت يامحمود

عمى / هو الاهبل إبن الاهبل ده خلا فيا عقل
انت لسه واقف قدامى امشى ياله بره

تامر / خلى بالك ياعمى كده عيب انا شامم ريحتها
وعارف إنكم مخبينها عليا ومستنين لما امشى علشان تخلصوا عليها

حماتى / هى ايه دى إللى شامم ريحتها ياحبيبى

تامر/ القطايف ياحماتى إللى مخبينها عليا
ماشى ياعمى خليك فكرها دأنا خطيب بنتك برده مش واحد غريب



حماتى / قطايف ايه انت عاوز تشلنى بيقولك قدامك 3 شهور وبعدها هيجوز بنتى شرين وانت بتدور على قطايف
امشى ياله من قدامى بره

ويطردوا تامر بره

وبعد شويه الباب يخبط

عمى / قومى ياأم شرين شوفى مين فى اليوم اللى مش هيعدى ده
وتفتح الباب

تامر / ايه ياحماتى اكلتوا القطايف ولا لسه

عمى / انت تانى ياابن التيت والله ما انا سيبك

تامر / خلاص مش عاوز قطايف انا عاوز الموز والسودانى بتاعى

ايه ياعم العصايه دى !! لا ياعمى عيب انت راجل محترم

يالهوى خلاص مش عايز حاجه كلوه كله لوحدكم

يارب يجلكم إسهال

ويجرى امير من الشقه

؟؟؟؟؟؟؟؟؟؟؟؟؟؟


انتظرونى

فى الحلقه القادمه

من

يوميات اتنين مش متفقين

بقلم


تامر الطويل
امير الجروح