[MOSTAFA093]

المشاركة الأصلية كتبت بواسطة merama1994r

سلام عليكم

انا كنت احب اعرف من المدرسين و من الي خلصوا 3

العربي ازاي نذاكره وبالذات قصه و ادب لان دول بيبقوا ارخم فرعين و بذات في تالته وياريت الرد شكرا

أهلا بيك
أنا الحمد لله خلصت 3 السنة دى ، ورايح كلية ( دعواتك معانا )
بالنسبة للعربى بتاع تالتة من وجهة نظرى إنه أسهل شوية من بتاع تانية
وبالذات الأدب
القصة : حاول تقراها على قد ما تقدر كل فترة عشان متنسهاش وتحط عينك على الحاجات البسيطة لأنها بتيجى منها الإمتحانات ( لأنها بصراحة قصة رخمة شوية )
بالنسبة للنصوص : هتحفظ كل ما فيها من معانى وصور ومحسنات وهما ساهلين ويتحفظوا بسرعة بس المعانى صعبة حبتين ، بس ما تقلقش
الأدب : سهل جداً لأنه مرتبط كل درس أدب بكل نص يعنى عشان متوهش وسط الأدب والنصوص
المهم تذاكر الأدب بالورقة والقلم عشان كده مش هتنساه خالص ، لكن لو قراءة يبقى مش هينفع وهتنساه بسرعة
القراءة : سهلة جداً جداً ومواضيعها جميلة ما عدا درس أو درسين
النحو : حاول تحل قطع نحو على قد ما تقدر لأنهم أرخم شىء بالنسبالى كان النحو
لأنك هتاخد كل النحو اللى درسته مرررة واحدة فبالطبع هيبقى كبير وصعب بس مع حل القطع هيبقى مفهوم بالنسبالك وسهل إن شاء الله
البلاغة : كلهم درسين ، والاتنين أسهل من بعض ، وهما سؤالين بس اللى بيتكرروا فى كل امتحان
بالإضافة للى درسته من قبل من استعارة ومحسنات وغيره
يعنى من الآخر أهم حاجة الورقة والقلم فى الأدب وحل القطع فى النحو والبلاغة عشان ربنا يوفقك إن شاء الله
وكمان العربى زى ما انت عارف فروعه كتير يعنى لو اتركن على الرف هيتنسى خالص
لازم تراجع فرع منه كل يوم عشان كبير وبيتنسى بسرعة بالذات القصة والنحو
ربنا يكرمك يا رب وأى حاجة تحتاجها أنا موجود
تحياتى