[scream angle]

مدام فريدة سيدة نشيطة وبتصحى كل يوم بدرى تصلى الفجر وتقرأ ماتيسر لها من ايات القرآن وبعدها تعمل شوية رياضة ( ايروبكس ) وبعدين تبتدى تشوف اللى وراها فى البيت . قبل ماتقوم من سريرها لاحظت بقعتين تلاتة دم كده على مخدتها وطبعا اتخضت جدا وجريت على الحمام تبص فى المراية تشوف الدم ده من ايه ؟؟؟ وطبعا كانت لثتها كلها ملتهبة جدا ويادوب بتلمسها لقيت دم كتير اوى نازل منها
اتمضمضت كده بسرعة وقالت انا لازم اسأل مفيدة علشان تشوف لى حل ( مافيش فايدة برضه مابتتعلمش ) . وبعد ماخلصت كل اللى وراها خبطت على جارتها المفيدة جداااااااااااا مدام مفيدة وقالت لها على اللى حصل الصبح وكالعادة قالت لها ........ايه يافريدة انت دايما تعملى من الحبة قبة كده ياشيخة اتضمضى بشوية مية وملح وكل شىء هايبقى تمام ,واوعى تغسلى سنانك اليومين دول خالص وبطلى بقى فرشة السنان اللى جابت لك الكافية دى ( نصايح تودى فى داهية) .


مدام فريدة ما كدبتش خبر وبطلت تستخدم الفرشة خااااااااااااالص ويوم بعد يوم الموضوع بيزيد ولثتها بتحمر وتورم وبقع الدم على المخدة بدل ماكان بقعتين تلاتة بقت بقعة كبيرة جدااااااااااا .



لانه طبعا فرشة الاسنان مالهاش اى دخل ولو تفتكروا معايا انها اول مابصت فى المراية اول مرة يادوب لمست لثتها كده لقت ايديها كلها دم , يعنى الالتهاب الفظيع اللى صاحبه وجود الدم كان طبعا من عدم استخدام الفرشة والمعجون بانتظام علشان كده بقايا الطعام فضلت تتراكم على اللثة والأسنان وادت الى الحالة المؤسفة اللى كانت فيها مدام فريدة .