أولا رمضان كريم عليكم كلكم يا طلبة أولى طب طنطا ومبروك يا دكاترة دخول الطب.. أنا زميلتكم في سنة خامسة طب طنطا
ثانيا أحب أقول لكم إنكم إن شاء الله أول الدفعات المحظوظة اللي هتدخل الكلية عشان بعد الثورة بقى فيه شغل جامد أوي هتظهر نتائجه عليكم إنتم إن شاء الله وفيه سعي لاخد الاعتماد واتحادات الطلاب بقت حاجة تانية خالص
ثالثا اللي من المحلة ممكن تركب المرشحة ومن المرشجة تركب الجامعة وتنزل عند الباب الرئيسي للجامعة من عند المستشفيات أو ممكن من المرشحة تركب الجملة وتنزل كفر عصام هتلاقي نفسك عند كبري كفر عصام وهتعدي الشارع وتبقى في الجامعة... وممكن من الشون تركبي الجامعة على طول وينزلك عند المستشفيات.. و الأسهل من ده كله هو عمل اشتراك في أتوبيس الطلبة الجامعي السنوي زي شركة النضال وشركة مكة والأصدقاء وغيرها ودي طريقة سهلة ونظيفة لإن كل اللي راكبين هيكونوا طلبة جامعة زيك وعلى فكرة المصاريف بتاعته مش كبيرة لإن إحنا في كلية لازم نحضر في كل يوم فلو حسبتي مصاريف المواصلات كل يوم هتلاقي إن اشتراك الأتوبيس أرخص ( أغلى شركة اللي هي مكة كانت بـ 700 جنيه في السنة بس الكلام ده كان السنة اللي فاتت)
رابعاً كلية الطب كلية عايزة اجتهاد كبييييير وإنتم إن شاء الله تكونوا قدها وقدود ولازم تجتهدوا في المذاكرة من أول سنة عشان اللي بعد كده يبقى سهل عليكم
خامسا أنا مجربتش الدورة التدريبية اللي بتقولوا عليها بس أظن إنها مفيدة جدا خاصة في موضوع الترجمة عشان دي بتبقى مشكلة لناس كتير
سادسا معلش أنا طولت عليكم لكن عايزة أطلب منكم في النهاية دعوات صادقة لإن امتحاناتي بعد العيد .. ادعولي ربنا يعدي سنة خامسة على خير ويوفقني أمنا وكل سنة خامسة يارب
ربنا معاكم وأكيد طب طنطا هينور بيكم
|