شوف يا سيدى
فيه اكتر من مكان ممكن تحاضر فيه
لكن أولاً بخصوص الانتل فمعلوماتى انها خاصة بالعاملين فى التطوير التكنولوجى
ثانياً بالنسبة للرخصة الدولية : كانت لحد فترة قريبة خاصة بمحاضرين التطوير فقط، ولكن نظراً لزيادة أعداد المتدربين، فقد بدأوا بالاستعانة بمدرسين الحاسب الآلى فى المدارس، وده بيكون بالتنسيق مع موجه الإدارة، وموافقة الموجه العام
بتعمل مجموعة فى مدرستك مكونة من 15 متدرب، وتكلم الموجه وتقوله انك كونت مجموعة وعاوز تدربهم انت ومعاك واحد او اتنين كمان، على الرخصة الدولية، والموجه غالباً بيوافق لأنه بيستفيد مادياً، والعائد المادى بتعاها معقول بيكون حوالى 900 جنيه للـ 7 موديول سواء اشتغل اتنين او تلاته بيقسموه على بعض، ومدة التدريب بتكون فى حدود 3 إلى 4 أسابيع، وممكن لو عدد المتدربين كتير تشتغل فى اكتر من دورة.
ملحوظة : يمكنك تجميع المدرسين من المدارس المجاورة أيضاً وليس الاقتصار على مدرستك فقط.
أما ثالثاً : فيمكنك التدريب فى مركز التدريب الرئيسى للمعلمين فى محافظتك، وده الموجه ملوش دعوه بيه، بتروح لمدير مركز التدريب وتقوله انك عاوز تدرب، ومؤهلاتك كذا وكذا، وغالباً هيقولك ماشى وهنبتعلك وكده، وانت وشطارتك بقى، الدورة بتكون حوالى أسبوع بتاخد فيهم حوالى 150 جنيه تقريباً، يزيدوا شوية او ينقصوا شوية، وبتاخد جواب تفرغ من مدرستك خلال الاسبوع ده. والتدريب بيكون غالباً وورد أو اكسل او ويندوز ... مباديء يعنى.
ورابعاً : يمكنك التدريب تبع البنك الدولى، وده برضه تابع لمركز التدريب الرئيسى للمعلمين، وينطبق عليه نفس الكلام بتاع ثالثاً، الفرق الوحيد ان فلوسه اكتر بكتييييييييير من التدريب العادى.
وخامساً : يمكنك التدريب فى الدورات التنشيطية التى يقوم بعملها التوجيه فى الاجازات لمدرسى الحاسب الآلى، ودى طبعاً وفقاً لرغبة الموجه العام، وفلوسها تقريباً فى حدود 20 أو 30 جنيه فى اليوم، ولازم تكون متمكن لأنك هتحاضر لمدرسين حاسب آلى، وغالباً بيكون التدريب على الانترنت والاكسس والدوت نت.
وسادساً : يمكنك التدريب فى المدرسة، لمجموعات - دورات تدريبية - تبع قصة المدرسة المنتجة، وفلوسها كويسة جداً، وطبعاً المدرسة بتاخد نسبة - بما فيهم المدير وأمين المعمل والسكرتير - ، وانت وشطارتك فى تجميع المتدربين. وميزتها انك ممكن تعمل شهادات عليها ختم النسر من المدرسة، بما يعنى فى حدود علمى، إمكانية اعتمادها من الخارجية. - ولا يشترط للمدرسين فقط، ممكن أى حد من بره. - يعنى اعتبر نفسك مركز خاص بيدى دورات تدرريبية.
تحياتى
|