[مغترب وبس]

طيب انا هرد عليك يا اسلام انت ومحمد في الاول هعمل حصر لنقاط التضاد بيني وبينكو

اولا نقاط اسلام :-

1- انك متكونش في مكانك الي انت شايف نفسك فيه في حين انك شايف ناس متستحقش واخدة المكان الي المفروض انت فيه ..

2- الفكرة الي انا ذكرتها في الموضوع وهيا انا بعد ما طلعت عيني في الدراسة واخدت الشهادة مش تغلش بيها ..

ثانيا نقاط محمد :-

1- نفس نقطة اسلام وهيا الشهادة ...

2- الكوسة والواسطة ...

اجي ارد على حضراتكم وباب المناقشة مفتوح للجميع

اولا ردا على السلام على النقطة الاولى :-

يا اسلام يا حبيبي انا معاك ممكن انت تكون احسن من رئيسك ورئيسك ولا بيعرف يقرا ولا يكتب وانت المتعلم الي معاه بكالريوس او ليسانس بس انت بجهدك واجتهادك ممكن توصل لمكانو بعد سنة او سنتين بس هتوصل طول ما انته شغال بذمة ...

ويا اسلام مش لازم نبص عليه بص على التانيين الي تحتيك وانت احسن منهم ...

طب قولي يا اسلام المغنيين دلوقتي احسن ناس بتكسب فلوس خلاص نروح نشتغل مغنيين ودول بقة فيهم المكوجي وفيه الي كان والي كان والمغنيات الواحدة تروح ...... ومرة واحدة تبقى احسن مغنية ويطلعة على التلفزيونات على انهم بقة شخصيات قومية
خلاص البنات تشتغل مغنيات ولا رقاصات علشان بيكسبو فلوس اهو دول معهمش حاجة نيجي احنا نقول شوف الي معهومش شهادات معاهم فلوس قد ايه وانا الي تعبت عمري كلو بحوش قرشين بالعافية ....
صدقني يا اسلام قبل ما تقول الكلمتين دول بص على الي تحتك بس على انك راضي ذمتك وضضميرك ومبادءك مش مهم اي حاجة تانية اتعب واشتغل صبح وبعد الضهر وانت الي هتكسب في الاخر متبصش على ريسك الامي الي بقى ريس كوسة بص على نفسك هتوصل لايه بجدك وعملك واجتهادك وصدقني حتى لو الكل مش عاوزك تكون حاجة وانت اجتهد ورضيت ربنا ثم ضميرك غصب عن الناس كلها هتبقى فوق الكل سواء دلوقتي او بعدين ومتستعجلي ( خلق الانسان عجولا )

ردا على النقطة التانية ودي مشتركة بين اسلم ومحمد :-

ردي عليها مش شرط دلوقتي ولا كمان سنة شتتغل بشهادتك ممكن سنتين تلاتة بس متفضلش قاعد تقول انا مستني اشتغل بشهادتي وممكن الشغل الي مش تبع شهادتك انت تلاقي طريقة توصل بينو وبين شهادتك انت وشطارتك ...

وبعدين يا اسلام هرجع واقول السؤال نفسو تاني ليه لما بنسافر بره بنوافق نشتغل اي حاجة وفي البلد لازم بالشهادة علشان بره بيدونا فلوس احسن ؟؟؟ بالله عليك ده سبب في ناس شايفاه سبب بس انا مش شايفو سبب
مش الفلوس الي تخليك تسيب اهلك وناسك وتخليك تروح بره والناس تتريق عليك لا يا اسلام
انا شفت واحد في السعودية شغال على عربية نقل كبيرة سواق خريج هندسة
بتكلم معاه نفس السبب الي قلتهولك السواق في مصر بياخد كام وفي السعودية بياخد كام وقاعد بيبعت لاهلو الي بيحوشو وكده
انت كده بردو مأرضتش كبرياءك واشتغلت بشهادتك بالعكس انت الناس بصالك على انك سواق وكمان بره بلدك خد كمية التهزيق والتريقة وللاسف مصريين كتير كده يا اسلام
يا اسلام بيتريقو على المصريين بانهم خداميييييين عندهم ليه علشان سبنا بلدنا وروحنا شتغل عندهم سواقين وحلاقين وطباخين وخدامين والله لقيت خدامات مصريات هناك ده يرضي مييييين كل ده علشان الفلوس لا يا اسلام مش متفق معاك خااااااااااالص
معلش يا اسلام انفعلت بس بجد انا شوفت مهازل هناك بالسبب ده اعذروني كلكم ..
اخر نقطة هرد بيها على نقطة محمد الي هيا الكوسة :-
يا محمد هاتلي بلد مفيهاش كوسة هاتلي بلد مفيهاش واسطة ....
وبعدين زي ما قلت لاسلام متبصش ليهم بص انت بجدك واجتهادك هتوصل لايه بس كده

مستني ردكم والاراء الجميع ....