اقتباس:
المشاركة الأصلية كتبت بواسطة طاهر حافظ
طيب ممكن اعرف هل عندكو في عين شمس كورسات خارجية للمواد ؟؟؟
----------------------------------
سؤال تاني هل عندكو بيدو كورسات برمجة للطلبة؟؟ مش شرط يكونو في حاسبات عين شمس القاهرة مثلا
|
بالنسبة لحكاية الكورسات الخارجية مش عارفة اذا كنت تقصد حاجة زي الدروس بتاعت الثانوية؟؟
لو كدة فده موجود بس غير قانوني تماما يعني في معدين سواء من الكلية او مش منها بيدوا دروس في مواد الكلية وطبعا الكلية بتحاول تقضي على الموضوع ده
وطبعا اكتر الناس اللي بيروحوا الدروس بيبقوا مطنشين المذاكرة من اول السنة وبعدين على اخر السنة يكتشفوا انهم مش فاهميين حاجة فبيروحوا يحضروا الدروس دي
بالنسبة لكورسات البرمجة هوة عموما على مدار ال3 سنين الاولى المفروض الطالب اخد كل الكورسات الاساسية في البرمجة
بالنسبة للغات البرمجة احنا في 3 سنين بنكون اشتغلنا في حدود 3 لغات مختلفة او اكتر وطبعا هية لغات البرمجة مش بتبقى محتاجة كورس ممكن اي حد يكتب باي لغة طالما فاهم اساسيات البرمجة
بس الكلية عندنا في عين شمس مبتديش كورسات خارجية في البرمجة معرفش اذا كان في حاجة زي كدة في القاهرة بس عموما انا شايفة ان الطالب في حاسبات مش محتاج كورسات اكتر من اللي اخدها في الكلية وده لو درسها بزمة في الكلية طبعا
اقتباس:
المشاركة الأصلية كتبت بواسطة rosy.flower
السلام عليكم بعد اذنكم انا ليا سؤال بسيط جداااااااااا اول يوم فى الكلية بيبقى عامل ازاى يعنى بيبقى فى محاضرات؟ وكمان هحتاج اللاب توب من سنة كام؟
|
هوة اول يووم بيختلف من جامعة للتانية ومن دكتور للتاني
عندنا في عين شمس اول يوم كان يوم عادي جدا بس اول كل محاضرة الدكتور بيخش يتكلم شوية بصفة عامة عن الكلية والمادة وكدة وطبعا اول اسبوع مبيبقاش في سكاشن هوة محاضرات بس وبتبدأ السكاشن من تاني اسبوع
وغالبا في اول اسبوع بيبقى في نشاط من طلاب الجامعة لسنة اولى بيعرفوهم بالكلية وكدة
بالنسبة للاب توب انا جبته في الترم التاني من سنة اولى بس احتجته فعلا وحسيت اني مقدرش استغنى عنه اول ما بدأنا المشاريع العملية بجد وده كان في سنة تانية الترم الاول او التاني مش فاكرة بالضبط
اهم حاجة انك من سنة اولى اي حاجة تخديها في العملي لازم تطبقيها بأيدك وتسالي في اي حاجة مش عرفتي تعمليها او مش فاهمها لان العملي مهم جدا في الكلية ومع الاسف ممكن حد يعدي ال3 السنين وهوة مش فاهم حاجة فيه بس بيتبهدل بعد كدة في مشروع التخرج وفي الشغل كمان
ربنا معاكم ان شاء الله وبجد اي حاجة قلقانين منها او عاوزين تسالوا فيها اسالوا انا بحاول على قد ما اقدر اساعد باللي اعرفه
