يا أستاذ مع احترامي لكل المعلمين والأساتذة الأفاضل انا هكلم بصراحة جداً بما اني طالب
وانا طالب ثانوية عامة
انا مريت باولى وتانية ثانوي وحاليا في تالتة
في بلاد اوربا زي محضرتك بتتكلم عليهم حضرتك شوف طريقة معاملتهم للطلبة عاملة ازاي
ده اول حاجة وبعدين شوف حضرتك بيشرحوا ازاي مش المدرسين الي عندنا يقعد يعقدلك في الدنيا وفي المناهج
علشان تاخد معاه درس والي يجي في أول السنة يقولك مادتنا صعبة وفي ناس سقطت كتير فيها
والي يدخل يحسسك ان الي قاعدين كلهم حمير ومبيفهموش حاجة مع اني في طلبة كتير تعرف حاجات ميعرفهاش المدرسين
وانا واحد من الناس طلعت اخطاء للمدرسين و كمان اصدقائي
والي يدخل يشرح 10 دقايق ويقعد يريح بعد كده
والي ميجيش الحصة من اصله
والي يبقى حافظلك الكلام يخش يكره و يطلع ومش مشكلة حد يفهم لما تاخد درس تبقى تفهم
والي يدخل يبقى فاهم ان كل الي قاعدين عايزين يجيبوا درجة وخلاص مش مهم عندهم ولاثقافة ولاتعليم
والي يدخل يهزر طول الحصة وميشرحش
انا نفسي صورة المعلم الحقيقية ترجع زي الأول
المعلم الي ينصح
المعلم الي يثقف طلابه
المعلم الي يشرح بضمير
و يوصل اسهل صورة للطالب وهو مش همه مين الي هياخد معاه درس ومين مش هياخد ده كل رزق ربنا
نفسي ترجع فكرة المعلم الي بيناقش طلابه
قبل كده في مدرس كنت باخد معاه درس وعنده بتاع 59 سنة
و وهو مدرس تاريخ الاقيه عارف النحو الانجليزي ومواد تانية كمان
فبقوله ازاي يا مستر عارف وفاكر الحاجات دي
قالي علشان اتعلمنا صح دلوقتي الواحد بعد شهرين من الامتحان تبتدي المعلومات تتبخر
ومقدرش انكر ان في مدرسين محترمين جداً الواحد ميقدرش يتكلم عليهم
مدرسين الدرس زي المدرسة مفيش فرق
وكمان هو الي بيقول كده
مدرسين تنمي عندك المادة العلمية يفهموك صح ويعلموك
مدرسين عندهم ضمير بجد
مدرسين لو كتبت فيهم شعر مش هاقدر اوفي حقهم
مدرسين لو واحد بس في الفصل يدخلوا يشرحوا
والطالب بيبقى رايح المدرسة وفرحان علشانهم
انا مع زيادة رواتب المعلمين بس بقيود انتم معاكم حق
بس مش معنى كده اضراب طيب يا معلمين الطلاب الي مش معاهم فلوس ياخدوا دروس المفروض انهم يعملوا ايه يسقطوا بقى علشان المدرسين مضربين انا عايز اعرف المصلحة جاية منين ياريت تفهمني وتوضحلي
ربنا معاكم و آسف على الإطالة