[احمد رضا]

بسم الله الرحمن الرحيم والصلاة والسلام علي اشرف المرسلين اما بعد

الي الجهاد بقي
:D

ندخل في الموضوع علي طول

الصداقه بين البنت والولد مصطلح غير صالح للغاية في البدايه

كل شئ وليه حدود .. مينفعش نفصّل ديننا علي الواقع والمتطلبات اللي فيه .. او بمعني أدق مينفعش نفصّل - جايه من تفصيل مش فصل - ديننا علي كل المتطلبات .. يعني حاجات وحاجات .. فيه حاجات الانسان لازم يجي عندها ويقول بس Stop هنا .. هنا فيه حاجة اسمها حرام وحلال .. فيه حاجة اسمها صح وغلط ..



بنت معايا في الشغل مثلا .. علي عيني وعلي راسي احترمها زيها زي اختي
لان بنفس المعامله اللي بعاملها بيها هيجي واحد ويعامل اختي بنفس المعامله
مش كلامي
لاء الرسول قال كدا فيما معناه عشان لو نسيت كلمه ولا حاجة

" يابن آدم افعل ما تشاء .. فكما تدين تدان "

والحديث ده انا سمعته من عمي من حوالي اربع سنين

قالي خده مبدأ في حياتك عشان متندمش بعد كدا

وفعلا اخدته مبدأ وبتعامل علي اساسه الحمد لله

و اللي بيعمل حاجة في بنات الناس والله ربنا ما بيسيبه

واحد يسألني الكلام ده جايبه من عند الست الوالده مثلا ؟
اقوله أولا ملكش دعوه بالست الوالده .. لان دي ستك وتاج راسك
:D
واقوله لاء يافصيح جايبه من حديث قدسي بيقول

" وعزتي وجلالي لأنتقمن من الظالم في عاجله وآجله "

فاهم يعني ايه حديث قدسي
وان ربنا يقسم
ويؤكد بالنون اللي في لأنتقمن
ومربطهاش بزمن
لاء هيجيبك هيجيبك
ربنا سبحانه وتعالي اسمه " العدل "


دي حاجة

ثانيا التعامل بين البنت والولد ليهم شروط

صلي علي اللي يشفع فيك الاول عشان موضوعنا لسه فيه سهرايه

:D

* قول المعروف *

يعني لما تيجي تكلم بنت يا استاذنا تكلمها باحترام وبأدب ويكون قولك معروف مش تكلمها في لهو ولعب وتفاهه بس عايز اقولك حاجة هنا عشان انت اتخنقت مني في النقطه دي مش كل اللغو حرام .. لاء النميمه الكذب السب دي اللي حرام
لكن اللغو الباقي مباح يافالح


* غض البصر *

ربك قالك ايه " قل للمؤمنين يغضُّوا من أبصارهم ويحفظوا فروجهم ذلك أزكى لهم إنَّ الله خبيرٌ بما يصنعون، وقل للمؤمنات يغضضن من أبصارهنَّ ويحفظن فروجهنّ "

وفي تفسير الآيه دي كان فيه تفسير جميل اوي عجبني
مش معناها انك تكلمها وانت مغمض ياحج
او انك تمشي في الشارع كل ما تشوف واحده تغمض
لاء بس متدققش يعني
يعني مش تفضل تبصلي في عيونها
وتبصلي في رموشها
وتبحلق
لاء هنا بقي بتقع في الحرام
يعني يبقي مفيش استرسال في النظر
ولو فيه افتتان بقي ان البنت خلاص جمالها فتنه يعني
يستحسن انك متبصش خالص
عشان لو فتنتك يا استاذ هيبقي انت كدا وقعت في الحرام

* عدم الزحام *

وطبعا هنا هسمع كله بيقول انت مشوفتش بتاع كليه الحقوق .. طيب والمصالح اللي بتكون لازم زحام .. مادام مضطر ياسيدي خلاص .. ومش كلامي بردو .. لكن متسوقش فيها يعني .. يعني بطاقه ينفع تاخدها لو متزاحمتش واستنيت هتتأخر ربع ساعه ياسيدي نص ساعه .. ولو اتزاحمت ولزقت في الناس هتاخدها في عشر دقايق
طيب ياسيدي ايه الفرق
ياخي لو اختك واقفه في طابور ولا حاجة
ترضي ان حد يبقي لازق فيها كدا ؟
طبعا لاء
يبقي اياك والزحام

* الخلوة *

اياك والخلوه .. طبعا اللي بيكلموا بنات علي النت هيقولك طب والشاتنج مهو فيه خلوة .. بص عشان بس متبقاش تقيله عليك .. لو انتوا الاتنين لوحدكوا .. يبقي تخلي بالك من كلامك .. وحط ربنا قدامك .. او اقولك حاجة احسن .. استفت قلبك .. وشوف انت راضي عن كدا ولا لاء .. ولو بنفس كلامك واحد كلم اختك هترضاها ولا لاء ..

بالنسبه للخلوه برا بقي
لاء بلاش منها
ويستحسن لو حتمت الظروف يبقي فيه محرم
هيا مش حلاوة هي
ده دين وفقه اللي قايلين كدا

--

البنوته بقي عشان مبقاش متحامل علي الولد
هو الولا هيعمل ايه ولا ايه
يقطع نفسه ياخواتي
:D

بص يا بنوته
اعتبريني اخوكي اللي عنده تلت سنين واللي بيفكرك بالكلام ده

انتي لو محترمه .. هتدفعي اللي قدامك لاحترامك عافيه
مش محترمه ومش مظبوطه صدقيني اول واحد هيقابلك هيستحقرك ويبدا بحركاته معاكي

* الجديه في التخاطب *

وانتي بتكلميه حسسيه ان فيه حدود كتير مينفعش يفكر يزيلها
بتكلميه بجديه وصرامه

* الوقار في الحركة *

يعني تاخدي بالك من حركاتك
لان ممكن حركه من حركاتك تحركه هوا
من غير ما تاخدي بالك
يبقي خلي بالك من تحركاتك
ومشيتك
والحاجات دي يعني
والباقي مفهوم
وطبعا الحجاب اول حاجة بتفيد في الموضوع


قال صلى الله عليه وسلم: "صنفان من أهل النار لم أرهما: قومٌ معهم سياطٌ كأذناب البقر يضربون بها الناس، ونساءٌ كاسياتٌ عاريات، مميلاتٌ مائلات، رؤوسهنَّ كأسنمة البُخت المائلة، لا يدخلن الجنَّة ولا يجدن ريحها، وإنَّ ريحها ليوجد من مسيرة كذا وكذا"رواه مسلم.

---
خلصنا من الولد وخلصنا من البنوته
نتكلم بقي بصفه عامه تاني

بعد كل الموضوع ده هيطلعلي واحد يقولي والله انا نيتي صافيه وبعاملها بكل احترام

انما الاعمال بالنيات يا استاذي

ان صلحت النيه
يبقي انت في السليم
انت فسدت النيه
يبقي انت في الحرام

وقبل ما تعمل حاجة
قول غرضي من الشات ايه م الاخر

خير ولا شر

ثانيا حاجة تانيه

بنت بتكلم ولد علي اساس انها ولد
وواد بيكلم بنت علي اساس انه بنت

ده بيدخل في نطاق الكذب
مخالفه الواقع
انجز ومتعملش كدا كتير
وانتي كمان بلاش تعملي كدا

ثانيا
-ههههههه طول الحوار بقول ثانيا وهيا تقريبا دي - خمسميا ً -
:D

النقطه اللي بعد كدا

لو عرفت ان فيه حاجة غلط وانها بتعمل حاجة غلط مش تنافقها بقي عشان البنت متضعش منك
لاء يافالح
ده معاونه علي الشر
وليها عقابها
قول الحق ورزقك علي الله


عايز اقولك حاجة انتي وهوا - ليدز فيرست -
:D

ان لو حسيت مرة انك هتقع في الغلط .. ابعد خالص

واستغفر الله لي ولكم

وجزاك ِ الله كل الخير يا أرق ملاك علي الموضوع الرائع ده
ومعلش طولت عليكي بطريقه مش لطيفه
اتمني الافادة


واللي بيحب النبي يصلي عليه
وعايز اقول كلمتين في الآخر عشان ممكن واحد مش عايز يقرا كل ده
ويحس بالملل
لعل وعسي يعرف حاجة واحده

تذكر قول من قال

" البر لا يبلي والذنب لا يُنسي والديان حي لا يموت فافعل يابن آدم ما تشاء فكما تدين تدان "

عن الرسول

" وعزتي وجلالي لانتقمن من الظالم في عاجله وآجله، ولانتقمن ممن رأى مظلوماً فقدر أن ينصره فلم ينصره "
حديث قدسي

وربنا يهدي الجميع