بسم الله الرحمن الرحيم
أم العريف
زن زن زن زنانة
أم العريف دى إنسانة
غاوية تلخبط حال الناس
بدعاوى أنها فهمانة
******************
مرة الست حورية جارتها
جالها مغص قام ندهتها
بصت بصة غريبة مريبة
وقالت برد جه فى معدتها
إغلوا شوية من اليانسون
وعليه حبة من الكمون
المصران كان حيفرقع
لولا عناية رب الكون
*****************
وفى مرة الواد حمادة
كان بيذاكر زى العادة
بيحل مسائل رياضية
راحت طابة عليه الأستاذة
لبست نضارة فى عينيها
والثقافة باينة عليها
قعدت تشرح شرح خرافة
الواد جاب صفر بعديها
*****************
وفى فرح البنت أمينة
راحت طالعة لها المسكينة
قالت سيبولى العروسة
أصلى أنا خبرة قديمة
فضلت تلخبط خلقتها
أحمر أخضر شلفطتها
العريس أول ما شافها
ساب الكوشة بزفتها
*****************
يا أم العريف يكفى مكابرة
خلى المركب تفضل سايرة
مش عايزين منك خدمات
فارقينا وقت الأزمات
ربنا يفرجها من عنده
من غير لت ولا حكايات
بقلم:أوسيماء