[LA STELLA]

وعليكم السلام ورحمة الله وبركاته
_____
ياااه اخيرا حد فتح موضوع المترو :D
اصلى كنت بفكر اعمل حاجة زى كدة عن مواصلاتنا الجميلة فى البلد دى قبل ما اختفى بس كويس انك فتحت الموضوع

ولا بقا مكينات التذاكر ياسلام على اللى بيحصل
جى بتحط تذكرتك وبتعدى تلاقى اللى جه شد الحديده ودخل وراك حاجه فى منتهى قله الادب

سيبك دلوقتى من اللى بيعدى وراك ،، خلينا فى الماكينات نفسها
فى بعض المحطات بتكون بايظة اصلا او بتبلع التذكرة ومتعديش فبالتالى هتلاقى ناس تنط وناس تعدى وراك ورغم كدة العسكرى يبقى واقف ميرضاش يفتح البوابة الحديد يعدى كم الناس الفظيع " اهو بيتفرج ع ماتش مصارعة حرة "
عندك مثلا اكتر محطة انا شفتها الماكينات دى بايظة فيها محطة عزبة النخل وخصوصا وانت خارج كدة من الناحية الشرقية بيبقى واحدة ولا 2 بالكتير اللى شغالين بس لو انت هتعدى عشان لسة هتركب، احب ابشرك هتلاقيهم شغالين

_____
نيجى لموضوع عربية السيدات
هى من ناحية بتحصل فيها بلاوى فهى بتحصل
الرجالة اللى بتركبها بقى نوعين
واحد ركب بالغلط وهينزل يبدل المحطة الجاية ودا له عذره خصوصا بعد اللخبطة اللى حصلت دى ونقل مكانها
وناس تانية رزلة - موضوع غتاتة وقلة ذوق الصراحة ولسة اقرب موقف حاصل معايا امبارح حالا
واحد ركب عربية السيدات ومعاه واحدة وقالها بمنتهى البساطة انها " الجيرل فريند " الست اللى جمبى تقول له دى عربية سيدات يقول لها ما انا عارف ، تقول له طب انزل بدل المحطة الجاية ، يقول لها لاء ودخل وسند ع الباب التانى اللى مبيفتحش ،
ويقول لها بمنتهى البجاحة : مالكيش دعوة انتى انا راكب فى عربية السيدات مع الجيرل فريند بتاعتى وهبقى ادفع الغرامة لو حد شافنى

قمة فى قلة الذوق الصراحة وفى نفس العربية واحدة راكبة بابنها اكبر منى كدة فى عربية السيدات وتقول لنا ما اانا نازلة كمان 3 محطات ، طب ما تروحى تركبى انتى معاه

دا انا اخويا من ايام اما كان فى ابتدائى كان يتكسف يركب عربية السيدات مع مامته دول بقى شباب كبير يتقال عليهم ايه ؟

وطبعا اخينا بتاع الجيرل فريند دا منزلش غير لما لقى كمية ستات غير طبيعية هجمت ع العربية وكان نفسه هيتكتم ،،،

________________________

معلش ع الرد الطويل جدا ،، بس اصلنا من ركاب المترو الدائمين وحاسين وعارفين ، واستنى منى رد كمان ان شاء الله