أعزائي مشتاقة - انج وهاب - محمود - احمد - وليد
السلام عليكم ورحمة الله وبركاته
مفتقداكم كتييييير ووحشتوني برده كتييييير
اختي وصديقتي الغالية مشمشة أنا بشكرك جدا جدا علي ردك وأنا قرأته بتمعن وأستفدت منه كتييير بس المشكلة من الواضح فيه أنا لأني بقالي فترة ما نزلتش شغل هنا فلما نزلت كنت شوية قافلة علي نفسي رغم أني بحب الهزار والجو المرح .
ولكني وجدت الجو العام مختلف شوية فأنا لما جيت في البداية اشتغلت في مجال السكرتارية وبعدين اشتغلت في مجال تخصصي وترقيت لغاية لما أصبحت مساعد رئيس قسم رغم إن كان فيه ناس أكبر سناً ومقاماً بس توفيق من عند ربنا والحمد لله
وبعدين استقريت بالبيت لغاية لما نزلت تاني فالناس هناك مختلفة عن اللي كنت بتعامل معاهم يعني بيحبوا يتدخلوا في كل حاجة وأنا مش بحب كده بحب يكون ليه خصوصية شوية ولكني افتقدها لأن المكان مدرسة ثانوي وبالتالي التعامل لازم يكون اجتماعي أكثر مما أنا كنت متعودة لأني بشغلي اللي قبل ده كان ليه مكتب بملحقاته مستقل فعشان كده الوضع شويه مش مستقر معايا وعندي رئيسة قسم تعتبر لسه جديدة في الرئاسة فيبدو اللي هيه شفته خلال حياتها اللي فاتت طلعته عليه خلال الفترة القصيرة اللي أنا اشتغلت فيها معاها
وبدعو لها ولنا جميعاً بالهداية
المهم أنا فرحانة جدا لأننا تلاقينا مرة أخري بالمنتدي وبلاش تعصبي نفسك كلنا مش عاجبنا الاوضاع بمصر ومتفاجئين بسرعة الاحداث بمصر اللي أخذه البلد في منحني خطير من ناحية الاقتصاد والصناعة وحتي السياحة اللي ناس كتيرة فاتحة بيوتها منها
فدعوتنا جميعاً أن نكون أيد واحدة لأننا ملناش بلد ثانية غير مصر أرض أهلي وأجدادي وأولادي إن شاء اللي فزي ما قلت قبل كده هي أحن علينا من أي حد ثاني أو بلد تانية .
وأرجو المزيد من نصائحك يا مشمشة .
حبيبتي أنج وهاب وحشاني يا ست الكل أيه أخبارك أنت بالمدرسة دائما تطمنين علينا وتنسي تطمنينا علي أحوالك وأيه موضوع أمتحانات أبنك هو في أي مرحلة دراسية دعواتنا له بالتوفيق والسداد والهداية إن شاء الله وأدعي لي إن ربنا يكتب لنا العمرة السنة دي كمان بنصف السنة عشان أفتكركم وأدعو لكم جميعا بكل الخير .
الاخ المحترم محمود
أيوة يا عم حجزت خلاص وجاي الديرة توصل بألف سلامة ودعواتنا لك طبعاً بموفور الصحة والعافية وبقول لك أيه سيبك بأه من موضوع الكادر أنت لسه فاكر ده موضوع وعدي كمان كام سنة لما يفتكرونا وعلي رأي الاخ أحمد ماهر يعني نجحنا بالكادر عايزين أيه ننهب .
الحمد الله ده أحنا معانا الكادر بس علي فكرة يعني أيه كلمة كادر بالتحديد وليه مانقولش مرحلة متقدمة مثلاً أو الدرجة الأعلي .
المهم توصل بألف سلامة وأبقي طمنا عليك لما توصل .
وفي النهاية أنا طولت عليكم فالمعذرة ............
بس والله كنتم وحشني كتيييييييير
|