[TheMobiler]

طب يا عم , أنا كنت السنة اللى فاتت فى العربى مكنش بيسببلى أى مشاكل الحمد لله ..

كنت مثلاً فى القصة أقرى كل فصل بس ياريت تكون مختصرة شوية مش من الكتاب بتاع المدرسة !

تقرى الفصل وتروح تحل الاسئلة بتاعته هتلاقى نفسك عارف تحل و المعانى أحفظها مش هتلاقى فيها صعوبة إن شاء الله

النصوص بقى أنا مش فاكرهم كلهم قوى بصراحة

بس إنت اول حاجة عندك 3 نصوص نثر بييجوا اجبارى , اللى هما :

الصديق - المقامة الحلوانية - تربية الابناء

دول لازم تديهم أكتر أهتمام عشان دول إجبارى فى الامتحان وسهلين جداً والله !

أما بقى النصوص الاختيارية عندك مثلاً :

شكوى أسير - الرثاء - مصر جنة الحسن ( بص أنا مش فاكرهم أوى بس إنت لازم تذاكر أى نص أول بأول )

بص نصيحتى ليك النصوص اللى فيها حفظ متحفظهاش دلوقتى .. خليها بعد أول لما تخلص المنهج علطول ( بس على حسب اللى يريحك )

وبالنسبة للشاعر .. أنا كنت بحفظ حاجات منه ..

يعنى الشاعر فى الصديق مثلا ترجم قصص كليلة ودمنة و عمل الادب الكبير والصغير ( بس مكنتش بدوس الصراحة بقى واحفظه كله .. يعنى احفظ معلومات عنه وكدة مش أكتر )

البلاغة بصراحة مفيش أسهل من كدة .. مش محتاجة مذاكرة أوى يعنى لأنها واخدة من النصوص كتير .. استعارات وكنايات وكدة ( بس حاول تحل اسئلة السنين اللى فاتت فى البلاغة عشان تدرب نفسك عليها )

اما النحو المفروض حد يشرحهولك يعنى مدرس كويس تفهم منه ويمتحنك عليه ( هيريحك كتير ) بدل ما تذاكره لوحدك !

ياريت أكون أفدتك أى افادة .. تحياتى