يامصر ليه البلاد دايما بها أزمة
بوتجاز و بنزين عيش و حاجات كتيييير لازمة
و الغاز لنا بالكوم ف بلاد ولاد ...جزمة
عايشين على خيره و احنا لنا الأزمة!!!!
امتى أحس الصراخ منينا ليه عازة ...!!
امتى يموت الصداع و الضرب بإزازة...
للزيت و للسكر و لزحمة التموين ...
تسأل يقول زحمة ... يا شعب بالملايين ..!!
نفسي أشوف بلدي تتباهى برجالها ..
نفسي أشوف خيرها بينادي لعيالها..
نفسي أدوق لقمة من إيدها أقطمها...
نفسي أكون غنوة تسعدها ف همومها..
بس الألم نافد ف اللحم بين العضم
بس الشعور ميت و الكلمة زي السم
بس السكات ساكت و الدم تاه م الدم
و العبرة بالنومة فوق الرصيف ف ميدان
اللي ينام أكتر يبقى بطل و همام !!!
و لو المقاومة تكون يطلعلك المليان
يطلب له حق كلام يطلب حقوق إنسان
أسأل سؤال و احد...
اللي يموت م الجوع بالزمة مش إنسان..
مش عايز اعرف نوع لا ديانة و لا ألوان
بس النزيف ف القلب .. بس الألم ف الجنب ..
بس الزناد .. صاحي و السوط ف إيد سجان
تايهين يا نيل تايهين اوصف لنا العنوان
و الحزن لينا دليل و الكل يتصارغ
على لقمة المسامير و لا لأنبوبة
تكسر ف كتفي شيل
علشان ولاد الإيه خلوها أعجوبة
اسمع يا نيل صوتي صوتي ف فرنة عيش
اسمع بكاي علي مية يقولوا مفيش
اسمع نكت ف الضلمة محبوكة
و الحل ف ال... ال و الله نسيت الحل
لو نشتكي يا ناس فالشكوى للديان
هو اللي باقي لنا .. قدر يبدل حال
قادر يهد جبال و الله أنا خايف من كل صوت
يطلع .. لو كان ده صوتي بس ازاي طلع مني
لكن ده أقوي من صوت ميدان تحرير
من صوت نايات الحزن من صوت غنى المزامير
|