[amothman123]

مالها الأحياء بقى
دة أحسن مواد ثانوية عامة للى عاوز يتعلم معلومات عامة

الأحياء زيها زى أى مادة
مدرس ( ولازم يبقى شاطر ) يشرحلك المنهج كالعادة
ترجعى تذاكرى الى اتشرح
طبعاً هنا هاتظهر مشكلة الحفظ
مفيش أسهل من حفظ الأحياء لو اتحفظت صح
1 - لازم الحفظ يبقى بالورقة و القلم
2 - لازم الحفظ يبقى مدعم بصور و تخطيط بيانى و أسهم و ملخصات فى كام تخطيط سريع كدة يخلى الكلام الى فى الفصل كله فى دماغك
بس هى المشكلة أن الناس فاكرة أن رسومات المنهج دى محطوطة للتعذيب !
بالعكس هى محطوطة علشان يخلى الطالب بيربط الكلام النظرى مع الصور و هى دى أكثر حاجة بتثبت الحفظ فى الأحياء

يعنى مثلاً فى تكوين حبوب اللقاح فى التكاثر

واخدة حوالى نصف صفحة حفظ تقريباً ماقيمتهاش الصراحة
نييجى نختصرها فى مخطط على السريع



فهمنا أية من الكلام الى فوق دة !!

أن الخلية الجرثومية الامية اتقسمت ميوزى إلى 4 خلايا microspore
تنقسم النواة بعد ذلك إلى tune neuclus و germinative neuclus و تصبح حبة لقاح
ثم يتغلظ غلاف حبة اللقاح لحمايتها

مسكت كتاب أنا دلوقتى و قعدت احفظ !!

هو كدة .. أى شىء فى المنهج تشعرى أنه متفرع تقدرى تربطيه بصورة او مخطط لتسهيل عملية الحفظ
و أنا أفضل مثلاً لو في رسمة و عليها شرح
تحفظى الرسمة الأولى
و بعدين تشوفى الكلام
هاتلاقيه مجرد وصف للرسمة

زى دورة كريبس و انشطار الجلوكوز
تحفظى المخطط الى عندك قبل ما تقرأى كلمة من الكلام الى مكتوب عليهم فى البيت
و تبقى فاهمة كل حرف على المخطط
و بعد ما يتحفظوا جامد أوى
ترجعى تشوفى الكلام
برضك مجرد وصف !!
و بالمناسبة الفصل دى تركزى شوية على حسابات الـ ATP
أرخم ما في الفصل

و لااااااااااااااااااااااااااااااااااازم الحفظ يبقى بفهم
علشان الفهم هو الى بيفضل أكثر ما بيفضل و بيساعدك على حل الأسئلة اللولبية خاصة فى الاختيار من متعدد
إنما الحفظ مقدور عليه بإذن الله مع الفهم و الصور

3 - المراجعة المستمرة مهمة جداً جداً جداً جداً
لازم المنهج يتراجع عليه بدل المرة ثلاثين مليار
علشان يفضل ثابت و مايتنساش
و طبعاً المراجعة أهم حاجة فيها مراجعة المحفوظ
لأن الفهم مابيتنساش .. المهم الحاجات التسميع

فلازم طول ما مدرسك ماشى فى الجديد
تبقى بتذاكرى الجديد
و تمسك فصل من القديم
و يفضل يكون المدرس بيرجع للقديم و يعمل امتحانات شاملة من أول المنهج
الكلام دة محدش بيعرف أهميته إلا آخر السنة
لما من كتر المراجعة طول السنة مابيبقاش في مشاكل تذكر فى المراجعة النهائية و حل الامتحانات

4 - الوراثة و الـ DNA و التكاثر و الاحساس و النقل
أخطر ما فى الأحياء
لأن عاوزين فهم جامد
النقل اللعب فيه فى النقل فى الإنسان عامة و الدورة الدموية خاصة
علشان أسئلة التتبع و في أسئلة تانية مهمة أوى للتفكير
و دى هنا شطارة مدرس لازم يفهمك الدورة الدموية
أنا و الله الدورة الدموية ماحفظتهاش
فاهمها بس
و بقولها زى ما الكتاب بيقول

الاحساس أخطر ما فيه السيال العصبى و اللخبطة بين الصوديوم و البوتاسيوم و مين سالب و موجب و بتاع
علشان كدة بردك شطارة مدرس + ذكاء طالب + ربط كل كلمة بالكتاب ببعضها
و حل كتير على الجزء دة علشان مايبقاش فيه مشكلة
أنما باقى الاحساس مش صعب بس عاوز مراجعة مستمرة علشان فيه أسماء صعبة
آة و بالمناسبة الاحساس فى النبات عاوز تركيز جاااااااااامد هو بس يتفهم و هاتلاقيه بيتحفظ لوحده

التكاثر كل اللعب فيه ن و لا 2ن و أنا بقول القاعدة دى الى مريحانى جداً
أى حاجة فى الدنيا دى كلها 2ن
إلا الى مكتوب فى الكتاب بالنص كدة و بالخط العريض ن
دة يتحفظ
و تحاولى تربطى الانقسام الميوزى بـ ن دائماً زى في دورة حياة البلازموديوم
و طبعاً مفيش غير الـ 3ن بتوع endospermic neuclus

الوراثة فهم أكثر منها حفظ
بس في حاجات لازم تتحفظ بردك
الفصل الأول كله مافيهوش إلا أسباب اختيار مندل لنبات البازلاء و أسباب نجاح و تعريف القانون الأول و الثانى
و الباقى يتم قرائته بتركيز عالى جداً و خلاص
و حل كتيررررررررررررررررررررررررررررررررررررررررررررررر ررررررررررر
و ماتركزيش على المسائل بس لأن الامتحان بيبقى فيه إلا مسألتين
و الباقى كله نظرى و علل و بتاع
بس الوراثة لذيذة يمكن ألذ ما في الأحياء

الـ DNA مفيش أهيف منه بس المشكلة أن سمعته سيئة جداً
مشكلته 3 حاجات
1 - مدرس مش عارف يشرحه
2 - طالب بيركن الـ DNA
3 - طالب بيحفظ ما بيفهمش

لأن الـ، DNA لغته معقدة شوية و عاوز مدرس فاهمه كويس أوى و طالب بيفهم الكلام علشان يتحفظ
و هو حفظ و فهم و يمكن أكثر ما في الأحياء بيحتاج مراجعة كتيررررررررررررر جداً جداً جداً
علشان بيتنسى بسرعة
و التطبيق العملى للكلام فى جزء الهندسة الوراثية
علشان سؤال الـ AGAAG بتاع السنة الى فاتت دة
لما شوفته اتضح انه مجرد تطبيق عملى لجزء فى الكتاب
بدل ما يسأل عليها مباشرة .. كان عاوز يشوف الطالب بيعرف يطبق ولا لا
فالهندسة الوراثية لازم ترطبى الكلام ببعضه
مهم جداً

4 - حل امتحانات كتير
مهم أوى و بيساعد على تثبيت المعلومة
سواء مع المدرس و دة أهم
أو حتى الامتحانات الى موجودة فى كتاب الامتحان بعد كل فصل
و الى بيرجع يمتحن من أول المنهج
و يفضل أن الامتحانات الى بتتحل فى البيت دى تتحل كتابة
بتثبت المعلومة اكتر من الشفهى
و لازم المدرس يراجع بالاستمرار بامتحانات شاملة زى ما قلت

5 - حب المادة
الأحياء من المواد الى عاوزة حب شوية علشان الواحد يبقى بيذاكرها بضمير كدة و عايش
زيها زى طب بردك عاوز حب
أنما الى داخل الأحياء على أساس أنها مادة جحيم
غالباً الأحياء بتضيعه
مع أنها مادة لذيذة و سهل أوى أى حد يحبها
انت بس تعدى الفصل الأول أكثر الفصول مللاً ( بس فى نفس الوقت سهل مش صعب )
و الحياة هاتبقى حلوة


5 - و أخيراً لازم مفيش يوم مذاكرة يعدى من غير أحياء
لازم كل يوم مذاكرة أحياء
لو خدتى جزء مثلاً فى الدرس و انتم واقفين فى نصف فصل
ترجعى تذاكرى الجزء دة
تانى يوم تذاكريه برضك
ثالث يوم تذاكريه + تبدأى الفصل كله من الأول
يمكن ناس هاتقول صعب شوية خاصة فى DNA ولا فى التكاثر
بس المفروض بداية الفصل من الاول دى مراجعة
يعنى المفروض ماتخدش وقت أصلاً ساعة مثلاً أو ساعتين بالكتير
و كدة على ما تخلصى يكون اتذاكر لوحده ولا مليون مرة !!
تيجى تمتحنى عليه مفيش مشاكل اتذاكر كتير
و كل ما تخلصى جزء لا بأس به تحلى عليه فى كتاب الامتحان مثلاً
و ماتعديش سؤال و تقولى ( دة سهل و معروف .. الى بعده )
تسمعى الإجابة تانى و تالت و رابع شفوى أو كتابة و الأفضل كتابة
احنا فاضيين يعنى ماورناش حاجة .. و بعدين لازم إجادة للمذاكرة خاصة فى الأحياء
لأن الأحياء عموماً أكثر مادة فى ثانوية عامة فيها مذاكرة و حفظ
هى و الفيزياء
علشان كدة عايزة إتقان

طيب افرض راجعتى فصل من القديم و لقيتى مثلاً أنك نسيتى جزء !!!
عاااااااااااادى
لسة فى وقت
نمسك و نحفظ الجزء دة تانى و تالت و رابع
و هايتحفظ
ما هى دى فائدة المراجعة
لو جزء اتنسى أو وقع مثلاً نثبته
و بعدين المنهج كبير مش معقولة هايبقى أمام عينك للأبد
دة غير أن مع الـ 328 صفحة أحياء حفظ في برضك حفظ عربى و و و و
فطبيعى حاجات هاتتنسى
و طبيعى نراجع عليها تانى و نثبتها
لحد يوم امتحان آخر السنة بإذن الله نكون ثبتنا كله و تحقق الهدف من المراجعة

و بالتوفيق ....