احمد الله رب العالمين واصلي وآسلم علي المبعوث رحمة للعالمين سيدنا محمد ثم اما بعد
بالنسبة للانجليزي ان شاء الله يتلم وبسهولة , ركز في المنهج فقط مع مذكرات الدروس واهتم بالقصة
وحل كتير عشان تاخد علي اسلوب الاسئلة والامتحانات , عندك كتاب الوورك بوك اللي بتستلمه في اول المدرسة فيه امتحانات ونماذج ورا في غاية الاهمية وان شاء الله تقفل الانجليزي كمان !!
خد بالك الامتحان من 25 وفيه اسئلة كتير تقدر تلم فيها درجات فاذا اتعرفت من دلوقتي علي اساليب الامتحانات مع مراجعة المنهج بس بجد ان شاء الله هتدخل الامتحان وانت مرتاح
,,
ابدا بكل المواد وتوكل الله ومتآجلش حاجة , آقولك حاجة
لو فكرت تاجل حاجة هتاجل فيها شهر ورا شهر لغاية ماتوصل لايام المراجعة النهائية تلاقي نفسك مفتحتهاش
ثانيا واضح من كلامك ان عندك طموح تجيب مجموع يبقي ان شاء الله تبدا تاخد المواد كلها من دلوقتي وتنظم وقتك
لان تنظيم الوقت عامل اساسي في اي شيء عموما
ومفيش شك ان التلات مواد اللي ب150 درجة محتاجين تركيز كبير لانهم باختصار مواد منتهية ودرجاتهم غالية جدا في النتيجة
’’’
بالنسبة للعربي والنصوص حاول تلاقي بنفسك افضل طريقة لحفظها ودراستها والاهم من مذاكرة العربي انك تحل عليه مرة واتنين وتلاتة بعد كده هتلاقي الاسئلة بتكرر بعضها وبقيت ملم بالمنهج ككل
’’
التاريخ مادة جميلة جدا , اذا مبداتش فيها جد من اول السنة فــ بفضل الله سبحانه وتعالي عندك كذا شهر اهه تقدر تبدا فصل فصل وتحل علي كل فصل لغاية ما تكون ملم بكل جوانبه , بحيث انك تيجي ليالي الامتحان لما تقرا الفصل الاول والتاني تحس انك مش محتاج تراجعهم من كتر مانت مذاكرهم وواثق من معلومتك
بس التاريخ بالذات عايز مذاكرة مستمرة ومراجعة القديم مع الجديد وهكذا
وتابع مع المدرس اللي بتاخد معاه اي شيء ناقصك في المادة
مفيش شيء اسمه الفصل بياخد كام ساعة لانها علي حسب قدرة كل واحد علي الاستيعاب
بس فيه فصول طويلة جدا مينفعش تذاكرة لاول مرة مرة واحدة , فانت بتقسم المادة علي مراحل
ولسة فيه وقت لدا , بس في نفس الوقت متقولش الوقت طويل اهه وتركنها !!
’’
الاهم دلوقتي ان كل دي اسباب , انما فيه مسبب للاسباب دي وهو الله عز وجل
استعيذ بالله من الشيطان الرجيم ومن العجز والكسل
وهقولك علي حل جميل جدا لكيفية البدء في مذاكرة المواد لان الشهور القادمة دي اهم شهور في السنة كلها
اذا اي حد عنده هدف وطموح ذاكر فيهم بجد هيدخل الامتحان بغرض انه يجيب درجات نهائية
عندك الثلث الاخير من الليل الوقت دا بيتنزل فيه ربنا سبحانه وتعالي بصفاته ليجيب دعوة الداع ويعطي السائل ويغفر للمستغفر الي فضل الله الذي ليس له نهاية
قوم صلي قيام الليل والناس نيام لان دا شرف المؤمن وتذلل وتضرع الي الله واسئله ما شئت فان خزائنه ملئي ولا تنفذ آبدا
صدقني اذا توكلت علي الله وبدات من الليلة دي تصلي قيام الليل في هذا الوقت المليئ بالسكون والخشوع والطمانينة وتدعو الله هتشوف نتائج مذهلة من اللحظة دي
توكل علي الله وفوض اليه امرك وخذ بالاسباب
اسف للاطالة
|