بصي بصراحه خلص الكلام بعد الباش مهندس محمد طه
بس بردو عشان الواحد ميبقاش عنده رأي يبخل بيه على حد
اللي انتي فيه دا طبيعي جدا انك تتوتري ولو ماتوترتيش فدا وحش لأن معناه ان الدراسه مش ف بالك اصلا
لكن من ناحية تانيه التوتر دا زايد عن حده بشكل ممكن يضرك
يعني احن فين والسنه الجايه من الدراسه فين
ليه بتحجزي دروس من دلوقتي اصلا
بلاش تعقدي الامور ع نفسك وتفتكري ان ثانوي عام دي انتحار
لأ الموضوع كله عادي وهتعديه ان شاء الله من غير أي مشاكل
اما اجاباتي ع اسئلتك
1- كيميا زي ما كله قال طبعا افضل بكتير
لأنها بتفتح قدامك ابواب كتير
اولهم المجموعه الطبيه ودا لو جيبتي مجموع عالي
ثانيهم المجموعه الهندسيه ودا لو جيبتي مجموع مثلا زي 95% لأنك لو كملتي علمي علوم ف الحاله دي للأسف مش هتلحقي أي كليه انتي عايزاها فأكيد هندسه ف الحاله دي احسنلك من أي كليه غير طب وصيدله والحاجات دي يعني
ثالثا المجموعه الادبيه ودي متوافره في كافة الأحيان
اما احياء زي ما اشار الباش مهندس محمد
فهتقف حاجز قدامك لو جيبتي مثلا 93 % ف سنه تانيه
وقتها مش هتقدري تدخلي اي كليه قمه من علمي علوم
ومش هيبقى متاح ليكي تدخلي علمي رياضه
فهتضطري تحولي ادبي ومفيش غير أدبي للأسف
............................................
2- النحو دا شيء سهل وتافه جدا جدا جدا
بس فقط عايز انك تكوني حابه تستفيدي
انما المشكله ان الطالب او الطالبه لما بيبقى بيكره النحو
وييجي المستر يشرحه يبقى اصلا متعقد منه فبيبقى قاعد عنده طاقه سلبيه
فمش بيستفيد حاجه خالص
انما انتي لو روحتي من نفسك حاولتي تذاكريه حباً ف اللغه هتلاقي الموضوع ما اتفهه
وغير كدا فعلا
هي اسئلته اللي بتيجي كل سنه هي هي
استخرج اسم فاعل واسم مفعول وصيغة مبالغه وخبر شبه جمله وحوارات كدا
هي هي مش بتتغير
فلو حليتي مثلا كمية من قطع النحو اللي جت قبل كدا ف امتحانات الثانوية للسنين السابقه
بإذن الله هتقفلي النحو ومن ثم العربي كله
.......................................
3- بالنسبه للإنجليش
هو صعب اه بس مش مستحيل
يعني ما عليكي إلا انك تذاكري وتحفظي الكلمات والقواعد تذاكريها كويس وتحلي عليهم قدر الإمكان
يعني انا او أي طالب دخل كليه كويسه
او عن نفسي بشكل اخص
حليت حوالي 5 او 6 كتب ف كل سنه
وفي طلبه طبعا حلوا اكتر مني بكتير
بس انا بتكلم عن تجربه شخصيه
دا غير بقى انك تهتمي بالمصطلحات اللغويه اللي تسمعيها كلغه عاديه مش موضوع منهج
لأن دا بيقوي عندك اللغه في الباراجراف
او في الترانسليشن
............................
اخيرا احب اقولك
مجرد انك عملتي توبيك زي دا
دا معناه انك انسانه تستحق النجاح لأنّها مهتمه بدراستها
بس ماعليكي إلا انك تركزي كويس
وتقللي التوتر الزايد عندك دا
يعني انتي دلوقتي لسه ف أولى ثانوي
لما تخلصي أولى الاول فكري هتعملي ايه ف تانيه
مش من دلوقتي
وآسف لو طولت عليكي