[أ/ مروان حسن]

أهلا بكم
هذا دليل شامل بخطوات التفوق في التاريخ والثانوية العامة
دعائي لكم بالتفوق
أ/ مروان حسن

في مشكلة دائمه عند كثير من الطلاب

انا بحفظ التاريخ كويس بس لما اجي احل انسى واحتاج حد يفكرني بأول كلمة وافتكر كل الاجابة

اي طالب في الدنيا بيفتكر كلمة من السؤال وبعدين بيكمل كويس
يبقى
بيحفظ كويس جدا
ولكن
مش بيفهم المعلومة كويس
لأن الطالب لو فاهم المعلومة كويس مش محتاجه اي كلام يفكره ولو تم صياغة السؤال بمليون طريقة برده هيعرف يجاوبة لأنه في الأصل فاهم

والغريب ان امتحانات التاريخ ابتداء من امتحان اغسطس 2007 ومرورا بامتحان 2008 دور مايو واغسطس
اصبحت تعتمد على الفهم وطرح الأسلئة بطريقة غير مباشرة

يعني بالبلدي الأسلئة ما بين السطور

طيب ايه الحل ؟
اني افهم



في طلبة كثير بتقول ان التاريخ حفظ فقط
وطبعا ده موروث خاطئ
التاريخ يعتمد على الحفظ ولكن لا يحفظ بصورة جيده من غير فهم
هديلك مثال

التاريخ يعني الماضي بأحداثة وشخصياتة وتواريخة وحروبة وثوراته صح كده
زي حياة الأنسان
فيها شخصيات وتواريخ واحداث

طيب ليه الانسان بيفتكر الماضي بتاعة بسهولة وممكن يفتكر احداث حصلت من عشرات السنين
صح
هل جاب ورقة وقلم وحفظ كل حاجة وقعد يذاكرها ويسمعها ويمتحن فيها
طبعا لأ
ولكن عاش تلك ألأحداث وتعامل مع تلك الشخصيات فدخلت الذاكرة من أوسع الأبواب

صح ولا مش معايا


طيب هتقولي
وده وقت امثلة وصداع انا عايز حل اكيد بتقولي كده دلوقتي

الحل بسيط انك تفهم الأحداث

مثال في المنهج

تعرف جنود الحملة الفرنسية كانوا وحشين جدا ورخمين كمان يعني ممكن الواحد يقولهم أنت (سم ) وغلسين
هههههههههههه

عارف ليه
لأن جنود الحلمة الفرنسية كانوا عالم مفترية
يدخلوا البيوت ويكسروها ويخربوا العفش كله عشان بيدوروا على فلوس
ويدخلوا الدكاكين والمحلات بردوا عشان يسرقوا منها الفلوس
ده كمان الغريب انهم هدموا بعض المساجد والبيوت زي اسرائيل ما بتعمل كده في غزة
بحجة انهم عايزين يحصنوا ويحموا القاهرة
واجبروا الشعب المصري كله خاصة التجار على دفع ضرائب كثيرة جدا واساسا الشعب المصري مش لاقي يأكل
شوفتي الأفترى
والمدهش
ان زمان كان كل حاره ليها باب وكل شارع ليه باب راح الفرنسين هدموا الأبواب ديه ........طيب وابواب الشوارع مزعلاهم في ايه
قالوا اصل اي واحد مصري يقف ضدهم او يحدفهم بطوبة يجروا وراه عشان يمسكوه يقوم داخل الحارة ويقفل وراه الباب قام الفرنسيين ريحوا دماغهم وقالوا نهدم ابواب الحارات

....
....
ممكن من القصة اللي انا قلتها تقولى ايه هي اسباب ثورة القاهرة الأولى

ها

1- فرض الضرائب الباهظة خاصة على التجار
2- تفتيش البيوت والدكاكين بحثا عن الأموال
3- هدم ابواب الحارات لمطاردة رجال المقاومة
4- هدم البيوت والمساجد بحجة تحصين المدينة


ايه رأيك

افهم القصة تلاقي نفسك حفظتها ومش محتاج اول كلمة ولا حاجة عارف ليه
لأنك لو ما افتكرتش اول كلمة هتجيب كلمة بدل منها ما انت فاهم الموضوع كله
وهتتكبه بالطريقة اللي تريحك

يعني بلاش تحفظ تاريخ كانك بتحفظ قرأن
القرأن ما ينفعش نلخبط في حرف التاريخ ممكن نغير في الجملة تماما بس نوصل نفس المعنى

انتظر ردكم
على كلامي
عايزين مناقشة جادة وصريحة جدا



في حفظ الله