الوصفة السحرية
من أجل الحفاظ على المرارة الوحيدة واليتيمة لكل مصرى
اخترع المصرى الضحك فى كل المواقف
فى الهم بيضحك - فى الغم بيضحك - فى الفرح بيضحك - فى الضحك بيضحك
كل الأمراض العابرة والتى تقاوم فى كل الدنيا ويصرف عليها المليارات
عندما تأتى إلى مصر وتشرب من نيلها تفشل معها كل المحاولات
فتستوطن مصر
تجد البشر يسير على الأرض والهدوم مدارية بلاوى
لكن تجده بشوش وابن نكته
لدرجة إن البلهارسيا غلبت معاه ولافايدة
كل شوية تقولوا هخلص عليك
يقولها ولايهمنى - برضه هضحك
انفلونزا الطيور لم تسكن وطن أكثر من شهور
ولكنها عندما حلت ضيفه على مصر
حلفت ماهى طالعه منها واستقرت وبقى لها عزوة وأصدقاء من الخنازير وكمان المعيز لوحبيت
لكن الفرخة المصرية علشان بنت بلد ماشيه تتمختر ولاهمها حاجة
باقى إيه - أه - الحمى القلاعية
أنا واثق بأن المواشى لما يتعرفوا على بعض كويس هى والحمى
هيصيروا اصحاب ولاحد هيقدر يفصل بينهم
المهم البت سعديه شغاله عند الست شاهيناز ودار بينهم الحوار التالى
الست شاهيناز : بت ياسعديه
سعديه : نعم ياستى
الست شاهيناز : أنا رايحه النادى وعايزاكى تعملى اللى هقول لك عليه بالظبط
سعديه : حاضر ياستى - أعمل إيه
الست شاهيناز : تغلسى الأرضية وتمرجحى الولد وتشيلى الفرخة فى التلاجة
سعديه : حاضر ياستى
وبعد مباراة التنس والذى منه عادت الست شاهيناز للبيت
الست شاهيناز : بت ياسعديه
سعديه : نعم ياستى
الست شاهيناز : عملتى اللى قولت لك عليه
سعديه : أيوه ياستى -دا أنا شاطره ولهلوبه ياستى
الست شاهيناز : طب عملتى إيه
سعديه : غسلت الأرضيه ومرجحت الفرخه وحطيت الولد فى التلاجه -
الست شاهيناز : شاطره ولهلوبه إيه هباب إيه داأنا هقتلك إنهارده
هذا مافعلته سعدية فى فراخ وأولاد مصر
مرجحت الفرخة وحفظت الولد فى التلاجة !
وهذه حياة الست شاهيناز قبل الثورة وبعد الثورة - النادى أهم من الضنا والشغاله البركة فيها شاطره ولهلوبه !
تبقى تفقع مرارتك ليه وانت ماعندكشى غيرها
وبعدين لاعندك نادى ولاشغاله ولاحتى فراخ
يبقى تعيش لأولادك وربنا يبارك لك فيهم
نصيحة ---- إضحك وخلى أملك دايما بس فى الله فهو الرحمن الرحيم
__________________
الحمد لله
|