[صوت العقل]

المشاركة الأصلية كتبت بواسطة totta2101

شكراااااااااا لمرورك بالتوبك اختي ... واتمني انك تشاركينا قصص قصيره من حياتك
انت كمان .... لنستفيد من بعض ما عندكم

توتا حبيبتى .. مش تزعلى .. بفكر فى موقف من يومها والله ..
ومتابعة التوبيك .. لكن مشكلتى ان مواقفى احب الاحتفاظ بيها
لانها دايما من ذكرياتى الجميلة او احلامى ..

عموما يا توتا عندى موقف .. حصل امبارح .. هو مضحك ومش مضحك ..
عارفة غيرنى كتير .. وعلمنى مش استسلم ابدا لاى شئ ..
ولازم احاول وابطل خوف ..

امبارح بالليل اثناء نومى .. انهارت العمارة فجأة ومن نعم ربنا عليا انى
دايما اغطى وجهى وبالتالى حسيت بالدربكة والانهيار اللى تم فوقى ..
وما بين المفاجأة والرعب اتوقف عقلى .. خلاص انا تحت الانقاض ..
انا بموت ومش قادرة اتنفس ..مش قادرة اتحرك .. مش قادرة على شئ ..
لكن كل اللى جه فى بالى اقرأ القرأن ..
واتشاهد وواستغفر ربى وجرى قدامى شريط حياتى بسرعة ..
وفضلت اقرأ القران مش عارفة قد ايه لكن بعد شوية سمعت أذان الفجر ..
ونزلت دموعى لانى خلاص مش هقدر اصلى الفجر حاضر .. والله يا توتا
اقنعت نفسى انى بموت وفعلا كنت كده .. فى لحظة لاقيت الباب بيخبط
وصوت عمى بيقولى الفجر يا صوت العقل .. اتنبهت ايه اللى بيحصل ..
عمى موجود وكمان بيخبط .. يبقى العمارة مش انهارت
يبقى فيه شئ غلط عندى .. وجتلى قوة ودفعت كل اللى وقع فوقى ..
تخيلى يا توتا كانوا تقال لكن اترفعوا يعنى لو حاولت من شوية
مش
كنت فضلت بموت الفترة دى .. وصدقينى الانسان بيقنع نفسه
ساعات بحاجات .. ولما قومت اشوف الانقاض دى ايه لاقيتها مكتبة
الكتب اللى معلقة كديكور فوق السرير .. كنت اضفت ليها كتب اشتريتها
امبارح وتقريبا تقلوا الارفف فوقعوا الارف الخمسة بالكتب والمجلدات ..
الحمد لله مر الموقف بخير .. شوية اجهاد وتعب بسيط .. لكن اتعلمت
عدم الاستسلام وانى احاول ومش اوقف عقلى عن التفكير مرة تانية ..
عايزة اقولك ان البيت مش بيبطل يضحك انهارده كل ما يشوفونى
مش مقدرين الموقف خالص خالص
جزاكى الله خيرا يا قمر على التوبيك الجميل ..