اقتباس:
المشاركة الأصلية كتبت بواسطة سارة ماكس
اللى عاوزة اقوله من الكلام ده كله انك لو قارنت بين الابتدائى ودلوقت هتلاقى انى اتدمرت معنويا ودراسيا ودى اذية اكبر من الكلام بتاع السياسة والحاجات دى بس انا بقى شايفة اللى شاركوا فى اذيتى تلاتة مش بس النظام السابق لا اشترك معاه الاعلام اللى عقدنى فى الدنيا و الشيوخ اللى بيفهموا الناس الدين غلط واما بعد الثورة بقوا اللى بياذونى كتير اعلام واحزاب متصارعة وافراد من الشعب بخناقهم مع بعض وناس تشتم من هنا وناس تشتم من هنا يعنى انا كمان اتاذيت من النظام السابق بس كمان اللى بعده مااختلفش عنه كتير والاسلام بيحث على العفو وبعدين كل الضحايا اللى بتتكلم عنهم اكيد ليهم الاولوية وان شاء الله جزاءهم عند ربنا واحنا وقفنا مع الثورة عشانهم لكن بعد كده كتر المظاهرات كان ضغط عصبى وفى ناس كتير انضرت من كده فبالطبع اصبحت الثورة بالنسبة ليا ليست افضل من النظام السابق لدرجة انى من كام شهر كنت بعيط بشدة وعمالة اقول ليه ضحكوا عليا ليه علمونى ان مصر جنة وغنية وان كل حاجة هتبقى سهلة؟ ليه قالوا ان شعب مصر اعظم شعب وهم دلوقت مثال لاسوا اسلوب فى الحوار؟؟
|
حقيقة يعني كلامك ملوش أي موقع من الاعراب انا اسف يعني
مش معنى ان انتي كنتي مغيبه قبل الثورة يبقى لما تيجي الثورة وتفهمي وتشوفي دلوقتي ال بيحصل تقولي ان النظام احسن من الثورة لا طبعاً دي مشكلتك انتي الشخصية وواضح انك بتردي على كلام غير كلامي اصلا انا بتكلم عن واحد افسد البلد لمدة 30 سنة وقتل اكتر من 5000 شاب دا غير حادثة سنة 99 لما اتقتل افضل افراد الجيش المصري وهم ف طيارة وكانوا رايحين امريكا اتضربت الطيارة ومات كل ال فيها وكان فيها افضل افراد الجيش بمعنى الكلمة احن لو حبينا نتكلم عن الفساد انا اعرف كتير وانا لما بتكلم كدا انا عارف معنى كلامي كويس وانتي جيه بكل بساطه تقولي ان انتم عندكم ذوق واحترام للاكبر منكم فعايزين تعفو عنه؟ بعد كل ال عمله ونعفو عنه؟ ثم نعفو عنه بصفتنا مين اصلا؟ هي الثورة لسه مسكت البلد عشان تعفو عنه؟ والمظاهرات ال انتي اتخنقتي منها انتي فاكره ال بيبقى واقف فيها دا بيبقى مرتاح وبياكل زيك وبيشرب زيك وانتي ف البيت ومش متضرره غير ان مثلا برنامج عايزه تتابعيه مش شغال عشان القناة جايبه المظاهرات؟
انا امبارح كنت ف المليونية ف التحرير من الساعه 11 الصبح وحسيت بجد ف الحر دا بالشباب ال والله لو اقدر اتعرف على كل واحد فيهم واقدر اوصلهم شكري هعمل كل ال اقدر اعمله عشان دول تعبانين عشاننا احن كلنا كشعب عشان نعرف الحرية واحن قاعدين نشتم فيهم ونقول عليهم دول بلطجيه وانهم كرهونا ف البلد الناس دي بتبقى واقفه هناك مش لاقيين نقطة ميه يشربوها في عز النااااار والشمس مسلطه على رؤوسهم وفي وسط زحام كبير جدا واختناق في الهواء ومش هاممهم غير انهم يطالبوا بمطالب لينا احن كلنا كشعب وهو دا ال يلاقوه مننا ف الآخر؟
انا واحد اتضريت من النظام السابق ضرر مباشر واقصد الموضوع بمعنى كلمة مباشر مباشر بجد بس للأسف الناس ال كانوا وما زالوا مغيبين زي حضرتك مش عارفين ليه ف ثورة اصلاً وايه طلبات الثورة وطلبات الشباب يمكن يكون انتي مثلا لأنّ عندك دراسه فمش متابعه كويس فمعذوره انما غيرك واخص بالذكر اهل المنوفية والشرقيه والدقهليه والغربيه الناس ال بإيديها نفسها ترجع النظام القديم ال ولادهم كانوا بيتشتموا فيه كل يوم من ضباط الشرطه
النظام ال كان امين الشرطه فيه ولا سيد البلد ويشتم ف دا ويضرب دا ومحدش يقدر يكلمه زي ماعملوا ف خالد سعيد ربنا يرحمه وقتلوه وحطوا ف بقه مخدرات وطلعوا عنه اشااعات زباله
النظام ال كان فيه كل ال ماسكين كل المناصب القيادية ف البلد عسكر مع إن المناصب دي المفروض تكون اقرب للحكم المدني زي المحافظين ورؤساء مجالس المدن ومديري الشركات والمستشفيات
النظام ال كان محدش بيقدر يوصل فيه لمصلحه غير بالرشوة
النظام ال كان مينفعش فيه واحد يطلع اول ع دفعه غير لما يكون ابن دكتور ولو مش ابن دكتور عمره ما هيبقى معيد لأن كل حاجه بالتوريث
النظام ال كان مينفعش فيه حد يبقى وكيل نيابة غير لما يكون ابوه او عمه مستشار لازم وسطه او توريث
النظام ال كان فيه لاعيبة الكورة والممثلين اهم عندنا من العلماء بمعنى ان لو عالم زي دكتور مصطفى السيد اكتشف علاج لسرطان الثدي عند النساء كانوا يقولوا الخبر دا ف تلات ثواني ف القنوات وخلاص ويفرحوا بيه انه مصري. ولو لاعب زي احمد حسام ميدو انتقل لنادي كبير يعملوله ليله كامله يتكلموا عن امجاده
النظام ال كانوا بيستخدموا فيه الكورة لاغراض سياسية زي حادثة ماتش مصر والجزائر ال انتي ذكرتيها والاعلام ال عمله من مصايب وقتها واستخدام حوار علاء مبارك في انه بيشتم الجزاير عشان نعتبره بطل قومي عندنا ترسيخاً لفكرة التوريث مع ان الجزاير مكانتش عملت اي شيء وحش
النظام ال ضيع صلتنا بكل العرب لدرجة ان وقتها بردو ساعة ماتش مصر والجزاير طارق دياب التونسي قال مفيش حاجه اسمها عروبه بين مصر واي دولة تاني العروبه انتهت من ايام عبد الناصر
النظام ال عمل مشاكل بيننا وبين دول حوض النيل لدرجة انهم كانوا مخططين يقطعوا الميه عننا
النظام ال كان بيصدر الغاز لإسرائيل بأسعار اقل بكتيييير من الاسعار الدولية واحن ف البيوت مش لاقيين الغاز دا
النظام ال خصخص كل الشركات العامه زي شركة حديد الدخيله ال عمله عبد الناصر ومبارك راح عطاه لاحمد عز بتراب الفلوس
النظام ال ف وقته اتفجر قطار الصعيد ال كان فيه فوق ال2000 شخص وماتوا من غير ما يتاخد حقهم بقوا شوية فحم وبردو عبارة السلام وفضيحة ممدوح اسماعيل
النظام ال عمل وعمل وعمل والله لو سيبتيني احكي عنه والله ما هسكت لأن الواحد موجوووع بسببه كتيييير
وانتم بكل بساطه عشان خايفين من الاخوان مجرد خوف مش تأكد عايزين ترجعوه بالبساطه دي؟؟؟؟؟؟؟؟؟؟؟ وعايزيننا نعفو؟؟؟ نعفو عن ايه ولا ايه ولا ايه؟ والله احن عندنا اخلاق واحترام للناس زيكم يادكتوره بس بنقدر كرامتنا ال مينفعش حد يهينها وللأسف اتهانت خلال 30 سنه كامله او نقول 31 سنه ونص بإضافة فترة حكم المجلس العسكري