1792055
مع اني مش محبذه لكدا 
ايه اكتر مادة بتحبيها و ليه ؟
الرياضه حبيتها جدا السنادي لاني اجتهدت فيها كتير
وقليل لما كانت مسأله مش بعرف فكرتها بس دا كان بالنسبه للتفاضل
انما الجبر كنت يعني مش بحب اذاكره زي التفاضل
بس الرياضه بشكل عام ممتعه بحس انها بتهدي اعصابي من المواد التانيه
كمان بتوسع التفكير بتخلي الواحد يتعلم ازاي يفكر بأكثر من زاوية
ومش يقف عند طريقة وحده
كمان الانجلش بس طبعا الStory لا :D
ليه بقى بحب الانجلش؟؟؟ مش عارفه بصراحه اهو لله ف لله :D
ايه اكتر مادة بتكرهيها و ليه ؟
العربي العربي ثم العربي
بيني وبينه عداوه متعرفيش ليه؟؟ 
اصله كله حفظ وانا لما بحفظ بنسى وبتصدم لما باجي اراجع ع حاجه لسه مذاكراها من كام يوم واحس اني معرفهاش :D
خصوصا بقى الادب اللي فعلا كنت بكرهه لدرجة اني بعيط كل ما بذاكره
بشكل عام مش بحب ف العربي كمذاكره غير البلاغه والنحو
نفسك تطلعى ايه و ليه ؟
ان شاء الله دكتورة صيدلانانيه
لاني حابه اتعامله مع الادوية واخترع تركيبات وكدا
بتأيدى موضوع السهر ؟
مش بأيده حاليا
بصي قبل السنادي اه يعني ف 1 ث لاني كنت مسائي كنت بسهر وبنجز كتير لان اخواتي(الصداع) بيكونو نايمين:D
انما 2ث مشكلة النوم خلتني مش بصحى اصلا لا ليل ولا نهار فكنت باجي لو حبيت اذاكر بالليل احس بصداع جامد ومعرفش اجمع خالص فالسنادي كنت بذاكر بالنهار ديما
بتذاكرى على حوالى كام ساعة " ماتخافيش احنا هنا اخواتكمش هانحسدك " ؟
بصي انا مش بحسب بس فتره كبيره كنت برجع من الدروس على 6 كدا واذاكر ل 10 واحس اني احوليت هههههههه
مببقاش شايفه الكلام فعلا فبقول هنام واصحى بالليل
طبعا الحمد لله بصحى 8 الصبح :D
قعدت فتره كبيره كدا
بس اكتر مره ذاكرت فيها كانت 10 ساعات متواصله
كانت نفسي مفتوحه فقلت استغل الفرصه واخلص كل اللي ممكن يتعبني بعد كدا
ايه اكتر وقت بتحبى تذاكرى فيه ؟
مم من 7 الصبح كدا
ايه اكتر مشكلة بتواجهك اثناء المذاكرة ؟
الملل لاني بمل بسرعه
وقلة التركيز وبحاول اشغل نفسي ممكن اقعد العب باي حاجه جنبي
ممكن اقعد اضيع الوقت وافك القلم واركبه عشر مرات واقعد اكسر الاسنان بتاعته :D
مكان الامذاكرة عندك مناسب ؟
المكتب طبعا او وانا بتمشى ف الاوضه لما اكون بسمع لنفسي حاجه
ايه اخبار اصحابك بيشجعوكى و لا ايه ؟
مممم انا عندي تحفظات ع اجابة السؤال دا
اعتذر 
ارتاحى شوية كدا و خدى دوول 
* ايه هى هواياتكـ ؟
النت وقراءة أي حاجه ف علم التنميه البشرية
* ايه طموحكـ ؟ و ايه هوا حلمكـ ؟
طموحاتي اشتغل ف شركة ادوية او مصنع ادوية
حلمي اقدر اشارك ف اي حاجه ارضي بيها ربي ونفسي
واراجع القرآان خلال الأجازه دي
*ايه اقتراحاتكـ عشان التعليمـ ف مصر يتغير ؟
ان الكتب متبقاش مجرد حاجات نظريه بنروح نحطها ف ورقة الاجابه وننساها بعد كدا
انا اخدت بالي ان كل اللي بندرسه السنين دي حاجه والدراسات العليا حاجه تانيه!! طب مش المفروض نكون مهيئين لكدا؟
تاني حاجه برضه
الاهتمام بالمرحله الاساسيه
اللي الطفل فيها بيتكون عنده مفهموم التعليم
فمش معقول يتعقد من مواد معينه مثلا
خصوصا الرياضه والانجلش اللي مش بيكون فيهم اهتمام خالص
(عن تجربه شخصيه)
انا فاكره وانا ف خامسه ابتدائي
مكنش فيه مدرس رياضه اصلا ف المدرسه كلها
ومأخدناش علوم غير من نص السنه 
*ايه اللى نفسكـ يتغير ف مصر ؟
موضوع الوسايط
والبطاله
( بجد حرام يعني انا اتحكالي ان فيه واحد واخد دكتوراه كان بيبع ترمس ف ورق الدكتوراه بتاعته لانه مش قادر يتعين بيها) الواحد بيتسد نفسه عن الانتاج والابتكار
وكمان الاهتمام بالعلماء والمفكرين شوية علشان مش يسيبوا البلد ويدوا مجهودهم لبلاد تانيه
والا مصر هتفضل محلك سر