رقم جلوسي 347447 اسمي شروق مجوعي 100,4%
ايه اكتر مادة بتحبيها و ليه ؟
انا حبيت تلت مواد كنت بحب اذاكرهم الكيمياء والفيزياء والاحياء
بس اكتر واحده حبتها الفيزياء
ايه اكتر مادة بتكرهيها و ليه ؟
العربي , طول عمري بكره الماده دي عشان بتاخد وقت في المذاكره و بيتنسي علي طول وبحس ان الشعر اللي في العربي ملوش اي لزمه . غير كدا قصه العربي دي عذاب خصوصا طه كان مطلع عيني
بجد الماده عذبتنني بس الحمد جبت 29,5 في السنتين .
نفسك تطلعى ايه و ليه ؟
انا بحب الرسم و برسم علي الزجاج وعلي المرايات وغيرها وبشتغل أعمال فنيه فكان نفسي ادخل فنون تطبيقيه
لكن نظره المجتمع واهلي خلوني كتبت اول رغبه بشري , علي الرغم اني عمري متخيلت نفسي دكتوره
ربنا يستر ,انا بجد خايفه من الكليه دي
بتأيدى موضوع السهر ؟
بتذاكرى على حوالى كام ساعة " ماتخافيش احنا هنا اخواتكمش هانحسدك " ؟
انا كنت بنام من 12 نص الليل ل6 الصبح وبذاكر باقي اليوم كله من غير عدد محدد لساعات المذاكره
(شيل من اليوم كمان وقت الدروس )
كمان انا كنت اقتصاد واحصاء وكنت بفتحها من الشهر للشهر فكان دا موفر ليا وقت كتير
بس للاسف اتظلمت فيها وجبت 49.5 والبنات اللي انا مراجعه معاهم جابو 50 . الحمد لله
ايه اكتر وقت بتحبى تذاكرى فيه ؟
بحب وقت الصبح من 6 وانت طالع عشان بحس الجو كدا صافي , بحس فيه براحه ورضا عن نفسي
ايه اكتر مشكلة بتواجهك اثناء المذاكرة ؟
الغريب اني معظم الوقت بذاكر في الاوضه اللي فيها اختي وماما يعني جمب التليفزيون عشان منمش
ولو رحت اذاكر في مكان لوحدي بنام علي الكتاب
وكتر التفكير في يوم النتيجه كان تاعب اعصابي
مكان الامذاكرة عندك مناسب ؟
انا قلت بذاكر في اوضه التليفزيون , الا في حاله اني بذاكر درس فيزياء جديد لازم علي المكتب بتاعي وحوليا كل كتب الفيزياء
ايه اخبار اصحابك بيشجعوكى و لا ايه ؟
أول سنه تانيه ثانوي مدرس قالي " ثانويه عامه مفيهاش حاجه اسمها اصحاب " انا بصراحه مكنتش مصدقه كلامه وواثقه من اصحابي لكن اتضح في الاخر ان هو كلامه صح فعلا
(ساعات كنت بحس منهم نظرات غيره وحقد )
لكن للامانه عندي واحده صحبتي بس هيا اللي ساعدتني .
ارتاحى شوية كدا و خدى دوول 
* ايه هى هواياتكـ ؟
الرسم والنحت وكل الاشغال اليدويه والفنيه
* ايه طموحكـ ؟ و ايه هوا حلمكـ ؟
فنون تطبيقيه كانت حلمي بس لسه انا هبني حلم جديد في كليتي الجديده بشري واسعي عشان احققه
بس غالبا هيكون هدفي اني اتعين نائب في الجامعه
*ايه اقتراحاتكـ عشان التعليمـ ف مصر يتغير ؟
مفيش اي مقترحات هتنفع معاه . هو التعليم بايظ بايظ . بصراحه انا مش مقتنعه غير بطريقه التعليم الامريكي
*ايه اللى نفسكـ يتغير ف مصر ؟
نفسي كل واحد مصري يصحي ضميره , والله لو كل واحد عمل كدا هنبقي احسن دوله
ثم اختارى العضو/ة اللى بعدك ..
و العضو/ة الاول/ى هو/ى
.
.
.
.
( Soosoo_kotp2000)
منتظرين اجابتها ..
و اتمنى يعجبكوا الموضوع ...