[lally adel]

المشاركة الأصلية كتبت بواسطة فراشة 44

طيب ياريت تقولي ازاي كنتي بتذاكر
وهل انتِ كنتي عامله ليكي جدول ولا لأ ؟؟
ومعلش ع الترخيم ده

ترخيم ايه يا قمر الله يسامحك ..

بصى يا ستى سؤال ذاكرتى ازاى دة مش سؤال صح خالص انو يتسال لسبب بسيط ان النظام اللى انا امشى عليه وينفعنى ممكن انتى تمشى عليه ويضرك فبلاش تسالى حد انت ذاكرت ازاى ولا عملت ايه عشان دة ممكن يضرك اكتر ما يفيدك .. دى حاجة

تانى حاجة بقى بصى يا جميل صدقينى والله والله والله واحنا فى ايام مفترجة اهو اهم حاجة فعلا زى ما كل الناس قالت توفيق ربنا ليكي .. انتى ممكن تبقى حاله حاجة فى الامتحان صح ويعملك عليها غلط " ودة اللى حصل معايا فى العربى لانى لسه شايفة الورقة النهاردة بعد التظلم " وممكن تكونى عاملة حاجة غلط بس هو عاملك عليها صح .. دة بقى اللى اسمه القدر والنصيب وطبعا توفيق ربنا

وربنا عشان يوفقك لازم تاخدى بالاسباب .. يعنى لازم تذاكرى كويس اوى وتدى لكل حاجة حقها بما فيهم نفسك وروحك انتى .. لازم تريحي وتلعبى وتخرجى وتتفسحى .. صدقيني دى كانت غلطتى السنة دى انى كنت وخدة الموضوع كله قفش فى قفش .. كنت بتخسر فى نفسى الراحة .. لحد ما جه وقت كنت بنام فيه اكتر ما بصحى ومبذاكر الا اذا كان الراديو او اللاب شغالين جنبي مع ان دة مش طبعى خالص .. من كتر ما قفشت على نفسى اوى فجيت فى الاخر كدة وخلاااص خلصت .. ودى ططبعا كانت غلطة بشعة منى

بس المهم انك تذاكرى وتجتهدى ولا تنسى نصيبك من الدنيا .. واعرفى حاجة حطيها حلقة فى ودنك " الدرجة اللى بتجيلك اخر السنة دى مش درجة على اللى انتى حليتيه فى الامتحان .. لا خااالص دى الدرجة اللى ربنا بيقيم فيها تعبك فى المادة دى او الجزء دة طووول السنه " وصدقينى دة عن تجربة .. انا مستوايا كان يعتبر معقول فى الانجيليزى و اول ما ابتديت دروس وشغل وكدة المس كانت هتموت منى لانى كنت ضعيفة اوى فى الترجمة والبرجراف والحاجات دى .. وفحتتنى طول السنة شغل وحل وكتب وملازم وبهدله .. و فى الاخر الامتحان جه غرييب شويتين .. وممكن تسالى عنه اى مدرس او طالب حتى .. وكنت خارجة من الامتحان بعيط بانهيار وبقول انا لو جبت 23 يبقى ربنا كرمنى اوى " طبعا من 25 " وفضلت متنكدة بسببه مدة طويله وتشاء الاقدار انى اجيب فيه الدرجة النهائية لمجرد بس ان ربنا كان عالم بيا وبمجهودى طول السنة .. وقتها بس اتاكدت ان درجتك هى تقييم مجهودك فى المادة طول السنة

انا اسفة انى طولت عليكى بس حبيت اديكي خلاصة تجربتى السنة دى .. ولو فى اى اسئلة انا تحت امرك