اولاً انا مجموعي 94.27% ومجبتش 95% ولكن نور الايمان طلبت وانا اجبت
"ايه اكتر مادة بتحبها و ليه ؟"
اكتر مادة بحبها الرياضيات بعدها الفيزياء ، لا الرياضيات بتعبر عن تفكير الانسان في ابسط صورة ليه وطبعاً فيها تشغيل دماغ كتير وانا مش غاوي حفظ علي اي حال ( حتي تقريباً قوانين الرياضة نفسها مش بحفظها )
"ايه اكتر مادة بتكرهها و ليه ؟"
اكتر مادة بكرهها هي الفرنساوي .....لاني بكرة اللغات ماعدا العربي لانه لغتي ولانجليزي لاني محتاجه غصب عني فمينفعش اكرهه ....اضافة لاني بكره الحفظ علي اي حال
والعربي مش بحبه كمادة دراسية لاني لما اطلعت علي قصايد شعر كتيرة وكده لقيت ان الشعر اللي عندنا بالنسباله ركيك وفي حاجات احلي بكتييييييييير جداً منعرفش عنها حاجة ...مثلاً لو قارناه بمناهج الكويت او السعودية فعلاً هنكتشف ان اللي عندنا نكش فراخ بالنسباله ....في الكويت بيدرسوا علم العروض في العربي وفي السعودية بيدرسوا "عفت ذات الاصابع فالجواء" قصيدة في غاية الروعة لحسان ابن ثابت ... وفي الكويت القصيدة بتاعت صوت صفير البلبل ودي من روائع الادب العربي واحنا قاعدين ندرس المقامة الحلوانية ونصوص تانية اقول وصف ليها انها تافهة وركيكة ( الا قليل منها)
"نفسك تطلع ايه و ليه ؟"
ده سؤال اجابته طويلة جداً بس عموماً نفسي اكون دكتور في الفيزياء في جامعة القاهرة ( اشمعني القاهرة؟ ) عشان انا هدفي اني اعمل تغيير في عقول الشباب بشكل كامل وشايف ان الموقع ده افضل موقع عشان اعمل اللي في دماغي
"بتأيد موضوع السهر ؟"
مش بحب السهر وان كنت بسهر كتير
"بتذاكر على حوالى كام ساعة " ماتخافش احنا هنا
اخواتك مش هانحسدك " ؟"
بصراحة ده سؤال بتسئله طول السنة واجابته محددة
في الطبيعي ايام الدراسة مذاكرتي لما اصفيها من الدلع واللكاعة بتصفصف علي ساعتين او تلات ساعات غالباً بعمل فيهم واجب الدرس بتاع تاني يوم ....اما الرياضيات فعشان انا بحب اطول واشتغل بدماغي ممكن اخد فيها تمن ساعات مثلاً
"ايه اكتر وقت بتحب تذاكر فيه ؟"
بعد العشاء بالذات احلي وقت بالنسبالي لغاية الفجر
"ايه اكتر مشكلة بتواجهك اثناء المذاكرة ؟"
معنديش مكاااااااان للمذاكرة ودي كارثة فظيعة ومؤثرة جداً ....يعني مرة عالسرير ومرة عالكنبة ومرة عالارض ...بس بعد ما انتقلت للعيش عند عمتي لقيت مكان مناسب للمذاكرة (السرير برضه)
"مكان اﻻمذاكرة عندك مناسب ؟"
مذاكرة السرير مش حلوة اوي لان الطبيعي ان البني ادم يذاكر بورقة وقلم علي الاقل في الرياضة والسرير لا يتيح ذلك بصورة مثالية
"ايه اخبار اصحابك بيشجعوك و ﻻ ايه ؟"
ممممم يعني مش دايماً بس لما كنت انشغل بموضوع علمي خارج المهج كان صحابي اللي في كليات بيشجعوني عليه وكده ..... بصراحة قليل اوي اللي كان يشجعني علي منهجي
ارتاح شوية كدا و خد دوول
*" ايه هى هواياتكـ ؟"
هواياتي كتيييييييييير ومنها : القراءة (الفيزياء والرياضيات وبعض مواضيع التاريخ والشعر ) والكمبيوتر واشتغلت فترة في البرمجة وبحب الرسم وكتابة الشعر (محدش يطلب حاجة انا لسه مبتدئ
) والرياضة و.... تقريباً كده هوايتي اي حاجة كويسة والحمد لله
*" ايه طموحكـ ؟ و ايه هوا حلمكـ ؟"
عندي 3 اهداف محددة كنت عاملهم في توقيعي لفترة كده
1- حلمي اني اوفر للعرب والمسلمين كلهم الدرجز او السلمة الاولي من كل العلوم الاساسية زي الفيزياء والرياضيات والكيمياء واللغة و.... بحيث تكون القاعدة الاساسية اللي يحتاجها اي طالب علم بالعربي ومن ثم اوفر كتب متخصصة ليهم بحيث يصبح ان اللي عايز يتعلم مش هيحتاج غير اجتهاد وعزيمة
2- بعد ما احقق اول هدف بفكر في شئ يقوي شوكة المسلمين سواء كان سياسي او اقتصادي او عسكري ... اياً كان يعني
3- بعد الهدف التاني احلم ان شاء الله ان اكون ساعداً من السواعد التي ستمتد لتحرير القدس إن شاء الله ولي في ذلك نظرة
"اقـتـراحاتكـ عشان التعليمـ ف مصر يتغير ؟"
ده مشروعي ان شاء الله
التعليم في مصر عامل نجاحه الاساسي هو المدرس...وبما ان المدرس اصبح في الدرس فقط فأنا لو وفرت مدرس بيشرح صح بطريقة مسلية للطلاب هبقي كده كسبتهم
باختصار بفكر في نظام تعليم الكتروني موازي لنظام التعليم الحكومي بس يكون الالكتروني مشتمل علي المنهج الدراسي لكن مشروووووح بطريقة صح علمياً
في هذه الحالة ممكن لما الطالب يفهم هو بيدرس ايه هيستفيد من ثانوي بعيداً عن هو دخل كلية ايه
وموضوع الكلية ده بقي بيحتاج تغييرات جذرية في النظام الحكومي عشان يتصلح
وكنت مرة في الوزارة ( صحابي عملوا مظاهرة قدام الوزارة ودخلوني
) وكلمت الاستاذ محمد سعد مساعئ الوزير تقريباً والاستاذة نسيبة وكيلة وزارة التربية والتعليم ووضحتلهم وجهة نظري فيما يخص التعليم وده تحقق جزئياً في النظام الجديد
*"ايه اللى نفسكـ يتغير ف مصر ؟"
نفسي المصري يبطل يفتي ويتكلم بدون علم ....
ولو سكت من لا يعلم لقل الخلاف وساد الهدوء
لو ينفع اختار العضو اللي بعدي هختار اينشتاين ... عايز اسمعه هذا العبقري