[To Be Is To Do]

اليوم السادس
كنا خارجين من درس الفيزيا فى يوم وتقريبا كده كلنا كنا مبسوطين عشان المستر كان طالع عمره ومدينا أجازه أسبوع وطبعا عارفين يعمى إيه فيزيا ؟؟؟؟ وعارفين الفرحه لما ناخد منها أجازه يوم واحد فمابالكم بأسبوع ّ!!!! ، المهم قولنا نجيب سندوتشات وحاجه ساقعه ونصيع شويه كده ، فبعتنا واحد زميلنا يسبقنا ويجيب السندوتشات عقبال م كلنا نتجمع ونحصله ، فراح صاحبنا يجيب الحاجه وإحنا طبعا ماشين مبسوطين جدا وبنهيص بقى ونكت وهذار ، وفجأه سمعنا صوت عربيه بترفرمل بصوت عال جدا جدا وسمعنا حاجه إتشالت وإتهبدت وسمعنا لمه وناس بتقول " حراااااااااااام عليك ، إنت أعمى ، ربنا يخربيتك يا مفترى " وسمعنا كلام " إتصلوا بالإسعاف بسرعه يلااااااااا "
طبعا إحنا سامعين ومندهشين جدا فقولنا نروح نشوف إللى حصل ، المهم روحنا مكان الحادثه وبنبص وفجأه سمعت صويت من صحابى وشفت ذهول على وجوههم وفجأه جسمى إرتعش وعينيا دمعت وإذا هو محمود صاحبنا إللى سبقنا يجيب سندوتشات ، طبعا إحنا بنبص عليه ومش عارفين نعمل إيه واقفين متكتفين بنبصله وبنبص لبعض وبنعيط وبس ، إحنا مندهشين من إللى حصل ، المهم جت الإسعاف فى ساعتها ونزل دكتور وبص عليه وقال " أدعوله بالرحمه " إحنا حسينا بعد الجمله دى بشلل فى جسمنا حسينا إننا بنحلم
" لا إحنا أكيد فى حلم " طبعا وما أسوء من واقع نريده أن يكون حلما ، إحنا إستسلمنا للبكاء خلااااص مش قادرين نمسك نفسنا خدته عربيه الإسعاف وأنا إتصلت بوالدته و قلتلها " محمود خبطته عربيه "
قالتلى " محمود مين ؟؟؟ محمود إبنى " المهم روحنا وراه المستشفى على أمل أن يكون كلام الدكتور غلط لكن قضاء الله كان أقوى من حساباتنا ، صلينا عليه العصر وطلعنا وراه الدفنه ، ورجعنا وإحنا لسه بنبص لبعض برده ومش قادرين نتخيل أو نتصور هل ده حلم أم علم ، كان يوم صعب بكل المعانى علينا وعلى والدته إللى كانت حتموت من بعده ، وبليل حضرنا العزاء وفضلنا مع والده ووالدته إللى قالولنا " ما تسيبوناش خالص ، خليكم جنبنا ، إحنا عايزين حاجه من ريحته تفضل وسطنا " بكينا كلنا ساعتها وفضلنا معاهم لغايه لما العزاء خلص وسلمنا عليهم وروحنا وإحنا لسه بنبص لبعض برده وبنقول " ربنا يرحمه ، ويصبر والديه "
وإلى اللقاء فى يوم آخر ،إنتظرونا ....

( 6 )

يا ريت يا جماعه إللى قرا الكلام ده يدعيله بالرحمه وإنه يصبر والديه