[donia0]

المشاركة الأصلية كتبت بواسطة ayman9111

يا جماعة حد يديني مواصفات كاملة للمادة دي أنا محتار جداااااااااااااااااااااا آخد أنهي مادة علم نفس و اجتماع و لا إقتصاد و إحصاء أرجو المسااااااااااااعدة

تقسيمه المنهج<<

9 وحدات 5 علم نفس + 4 علم اجتماع



>>مواضيع المنهج<<

علم النفس: تعريف علم النفس والسلوك والمنبهات,منهج علم النفس وفروعه,الدوافع,الانفعالات,الاحساس,الانتباه,الادراك ,التعلم,الذاكره,النمو والارتقاء,الشخصيه,الاتجاهات

علم الاجتماع: تعريف علم الاجتماع ونشاته,ميادين الدراسه به ,مكونات البناء الاجتماعى,التغير,التنشئه والمواطنه,الوعى الاجتماعى,الاغتراب,قيمه الوقت وانواعه,الانحراف,الادمان,التخلف والتحديث,الانفجار السكانى,الهجره,العولمه,الارهاب,الحروب,المستقبل

ملحوظه/المواضيع كثيره وغير مترابطه وده عيب وميزه فى نفس الوقت عيب لانك ممكن تتخلبط بينهم وميزه لانك مش هتتعمق فى دراسه اى موضوع بصوره كبيره فمش هيبقى صعب اوى



>>عدد الحصص والمزاكره<<

47/50 حصه وكل حصه = 2صفحه مزاكره(وده تمام اوى مش قليل لانه من المدرسى انما لو الخارجى هيتفردو فى اربع صفحات او اكتر كمان) + حل اسئله على الحته اللى زاكرتها

ولو افترضنا مثلا انك هتاخد يومين فى الاسبوع سبت وتلات مثلا يبقى فى خلال 25 اسبوع هتخلص المنهج ودول تقريبا 5شهور ونصف


>>سهوله الماده او صعوبتها<<

الماده دى ليها شبيه خدناه قبل كده وهو الفلسفه فى اولى ثانوى مع الاختلاف فى حاجتين المواضيع و الكم (الفلسفه فى اولى حوالى تلت علم النفس)

ولكن هما الاتنين نفس النظام فى المزاكره و الحفظ وحل الاسئله

من الاخر لو كنت حابب الفلسفه او حتى قابلها يعنى مش بتكرهها كره العمى وبيجيلك حساسيه اما تسمع اسمها يبقى خد علم نفس انما لو بيجيلك حساسيه من الحفظ انصحك هتتعب فيها فبلاش احسن

ولكنها ماده تعتبر اسهل قليلا من الفلسفه مع وجود نسبه الحفظ اكبر فيها من الفلسفه بس حفظ لذيذ مش صعب اوى مش زى الادب بتاع العربى مثلا

ومش محتاجه درس خالص خالص مش عارف بياخدو درس فيها ليه كلنا مخدناش درس فى الفلسفه وجبنا الدرجه النهائيه المهم انها مش محتاجه درس لانها مش فيها صعوبه على مستوى الاستيعاب الصعوبه فيها على الحفظ وبردو هقول للمره التانيه مش رخمه زى الفلسفه يعنى حفظها سهل شويه

مع ملاحظه اعتمادها على بعض الالفاظ الغريبه زى الفلسفه مع اختلاف الالفاظ طبعا

مثال: الفلسفه >>>> استنباط واستقراء ........
علم النفس>>>> استبطان و قوقعه ..........

ملاحظه كمان ممكن تتلخبط فى الالفاظ وتضيع الدنيا

مثالتكتب ظواهر بدلا من مظاهر ومكون بدلا من وجود(احد انواع المكونات فى علم الاجتماع) وهكذا.....

ملخص الدش ده لو ملكش فى الحفظ خالص يبقى هتسقط فى الماده دى لان كل المطلوب منك فى الامتحان انك تكتب اللى فى الكتاب بالنص



>>مواصفات الامتحان<<

مدته 3 ساعات متواصلين وبه نظام اسئله تماما مثل الفلسفه كالاتى

اولا علم النفس: سوال اجبارى به 4 فرعيين + سوال تانى به 4 فرعيين تختار منهم3 + سوال تالت به 4 بردو تختار منهم 3

ثانيا علم الاجتماع : نفس الموال بالضبط

يبقى مجموع الاسئله 24 سوال لازم تحل منهم 20 يعنى كل واحد منهم لازم ياخد 5~7 دقايق بالكتير ويتبقى عشر دقايق نام فيهم شويه او سلم الورقه وقوم لان طالما كتبت الاجابه فى الماده دى وانت مزاكر كويس اوى ومتاكد من الاجابه يبقى مش محتاج تراجع وهتقفلها باذن الله

مع العلم انك لو حافظ وبتحل على طول السوال مش هياخد خمس دقايق (مش كلو فيه بردو اسئله طويله شويه و مقارنات وحاجات من دى)

الامتحان عليه بردو 50 درجه 25 لكل فرع وكل سوال من ال 20 عليه درجتين ونصف


>>المراجعه والنسيان على اخر السنه<<

طبعا لانها ماده حفظ فى المقام الاول هتنسى معظمها على اخر السنه بس فيه ملاحظتين

الاولى انك لو مزاكر كويس وحالل ومظبط من اول السنه المراجعه هتبقى سهله وهتفتكر بسرعه

الثانيه فيه بعض الحاجات مش هتنساها فى الماده مهما عدا الوقت لانها بتكون معلومات بسيطه وسهله مثال تعريف علم النفس

اما المراجعه فتاخد اسبوع بس تكون مش بتراجع اى حاجه فى الماده دى غير علم النفس ومش بتروح دروس كمان

انمالو هتراجع مع بقيه المواد هتاخد شهر بالضبط مراجعه

مع ملاحظه انه لازم هتحل فيها كتير اوى عشان اسئلتها كتييييييييير ولازم تكتب بايدك كل الاجابات عشان المعلومه تتحفر بدل ماتجرب لسه فى الامتحان

>>الكتب اللى هنزاكر ونحل فيها<<

لا يوجد كتاب فى السوق به شرح عدل لعلم النفس

بيتفضل قدامك حلين اما انك تزاكر من المدرسى (وده جامد جدى بس دش زى عادته) او مزكره المستر(دى شاففها من المدرسى بس منظمه)

طيب والحلياعم الحج نحل ف ايه اظن ممكن تجيب كتاب الامتحان تحل فيه الدروس اللى خدتها اول باول (مفيش امتحان شرح للماده دى وبقيه الكتب الخارجيه ملخصه ومكروته وزباله)

وانا نصيحتى تزاكر من المدرسى بس تجيب دسته اقلام ملونه وتكت فى كل صفحه الاسئله اللى عليها كل سوال بلون مختلف وتشد خط تحت اجابته بنفس اللون واى خدمه


>>عدد صفحات الكتاب<<

المدرسى كله على بعضه حوالى 180 صفحه او اكتر شويه بس الامتحان تدريبات اكتر من كده لان فيه اسئله كتيره

مع ملاحظه بردو ان الشرح فى كتاب المدرسه مضغوط والصفح طويله وعريضه عن الكتاب الخارجى يعنى لو فيه كتاب الامتحان شرح للماده اعتقد انه هيبقى 300 صفحه بدون الاسئله



لحد هنا اقولكم موضوعى انتهى ويارب اكون اديت رسالتى الاساسيه على قد ماقدر وهى عدم الفتى وياريت كمان لو الموضوع ده وموضوع الاقتصاد يتثبتم عشان منلاقيش بعد كده ناس عاملين موضوع اسمه " ساعدونى اختار اقتصاد واللا علم نفس "

وعندى ليكو طلبين واحد مهم وواحد مش مهم (معلش انا رغاى شويهالمهم انكو تدعولى بالنجاح والتوفيق السنادى والتانى انكو تجاوبو على الاستطلاع للعلم بالشيى فقط