[aleman]

المشاركة الأصلية كتبت بواسطة شروق السيوفى

السلام عليكم طبعا انا عارفة القسم دة خاص بالخرجين
علشان كدة عايزهم يكتبولناموضوع يقلولنا على نصايحهم ازاى نستعد دخولنا لجامعة علشان نوصل لاعلى تقديرات ان شاء الله
والاخطاء الى نتجنبها يعنى حتى نصايح عامة

واتمنى لو اعرف حد هنا فى تجارة اسكندرية ولو فى ياريت يفدنا باى علومات تساعدنا نجيب تقديرات جيدة فى الكلية
وجزاكم الله كل خير

المشاركة الأصلية كتبت بواسطة dr/nor pt

بصى الحياة الجامعية مختلفة تماما تماما لازم تاخديها جد مش هظار ودى هتكون احلى ايام عمرك كلها ونصيحتى انتى هتتعرفى على ناس كتييييييييييير اوى من اول يوم ياريت كلهم يبقوا زمايلك بس والى تبقى صديقتك تختاريهم بدقة جدا لانى دول هما الى هيبقوا معاكى بقيت السنين كلها وهتتعلمى ويعلموكى واوعى تسمعى كلام الى يقولك ذاكرى قبل الامتحان نفضى حتى الجامعة هنذاكر فيها انا هقولك عايزة تجيبى امتياز كل سنة عليكى بحاجة واحدة وانا بقولك لو عملتيها امتياز دى هتبقى اسهل حاجة كل يوم ذاكرى المحاضرات الى اخدتيها فى ساعة ونص كل يوم ذاكرى ساعة ونص وهيصى بقيت اليوم اعملى الى انتى عايزاة بس الساعة ونص تتاخد بضمير وهتجيبى امتياز بسهولة جدا وتكونى متميزة واى حاجة عايزة تساليها انا فى الخدمة بلتوفيق

زيادة على الكلام الجميل والمفيد ده
اقولك اول يوم فى الكلية بيبقى غريب جدا وهتشوفى فيما بعد انه اغرب يوم فى حياتك
وبمعنى ادق اغرب اسبوع فى حياتك الجامعية
هتتعرفى على ناس كتير جدا جدا
وعلى قرب شهر هيصفصفوا على محجموعة بردك كبيرة (شلة يعنى) ثم اخر العام هيصفصفوا على اقل
وبعد ماتخلصى ياشروق الكلية لو سعيدة الحظ تطلعى باثنين ثلاثة هيبقوا باذن الله اصدقاء العمر
والكلام ده مش وقته الان
اللى وقته الان السنة الاولى
هتلاقى فيها شباب وبنات بعد مرحلة الثانوية العامة هيهتموا بتكوين الصدقات من الاناث والذكور
هتلاقى اللى هيجيلك زميلك لسه فى اولى هيقولك انا معجب بك و....ألخ
اوعى تسمعى الكلام ده ابدا
واوعى تربطى مصيرك بعلاقة للاسف لحد ماتتخرجى هتعلم فى حياتك
بمعنى بيتقال بعد كده فى سنين قادمة دى فلانة بتاعت فلان من ايام الجامعة
حطى فى دماغك ان اللى جاى بيقول الكلام ده لسه بياخد مصروفه من باباه
هتلاقى نظام قعدة على الكافتيريا اما المحاضرة تتلغى مثلا
هتلاقى بنات بتقضى حياتها فسح وخروج وهزار مالهاش فى المذاكرة
نصيحتى:
صاحبى واختارى الاخيار والصحبة الحسنة وارفعوا بعض وشجعوا بعض على المذاكرة والاجتهاد من الاول كده
اجتهدى بالدراسة
احضرى كل المحاضرات لا تفوتى محاضرة
مش هقولك ذكريها فى ساعتها لكن اقولك بيضيها
بمعنى احنا بالمحاضرة بنكتب بسرعة لما نروح بنعدها تانى بخط نظيف منسق
الاعادة دى فى حد ذاتها مذاكرة
لاتستمعى للفشلة اللى هيقولولك تجارة صعبة وياما ناس جابوا ملاحق والكلام العبيط ده
المجتهد بياخد نصيبه وزى مافى ناس بتسقط وتملحق فى ناس بتنجح وتتفوق
اتوكلى على الله واعتمدى عليه
واعرفى انك بكليتك تقدرى اللى تحققى كل حاجة بالمجموع العال من اول سنة كده والترقى لتصبحى معيدة بالكلية مثلا وتكملة لدراسات عليا باذن الله
انا اعرف ناس كتير اوى بيندموا على ضياع سنة اولى فى الهزار وقعدة الكافتيريا وعدم المذاكرة بحجة ان دى اول سنة
وربنا كرمهم بعد كده فى السنين الثانية اما عقلوا بقى
بس بعد ايه
التقدير تراكمى
فالسنة الاولى نزلت من التقدير العام جدا
بالتوفيق باذن الله
ولو عوزتى اى شئ انا هنا معك