اقتباس:
المشاركة الأصلية كتبت بواسطة بحر_الامل
خبر رائع
بس ممكن اعرف شوية عن حاسبات و معلومات و عن البرمجة لانى مش فاهم معناها
و ممكن اعرف لما ادرس الدراسة هقدر اعمل بيها و هشتغل ايه
معلش هتعبك معايا
|
دة رد مختصر عن حاسبات و معلومات كنت رديتة على زملائك فقولت انقلهولك هيقربلك الدنيا شوية
أولا ً السوفت وير مش معناها برمجة و دى مشكلة بتوع هندسة و المنتسبين للمجال مفكر انة لما يضرب كورسين برمجة يبقى زية زى حاسبات و دة خطأ نهائيا و كمان مشكلتهم انهم فاهمين السوفت وير غلط فاهمين انة تخزين و استرجاع بيانات و طبعا انا بعذرهم لان بمنتهى البساطة هو مبيدرسش علم فلذلك معندوش رؤية فحاسبات و معلومات بيدرس علم تصميم البرمجيات و المعلومات يعنى بندرس فى الكلية ازاى نصمم نظام تشغيل او لغة برمجة او نظام تشفير او نظام إخفاء بيانات او نظام لمعالجة البيانات او بروتوكول شبكات او او او حاجات كتير و طبعا بما انك بتصمم بنية تحتية للبرمجيات و المعلوماتية فمن السهل تعمل تطبيقات
طيب خلينا ندى مثال بسيط لتطبيق صريح و خفيف و مباشر تطبيق زى تطبيق
Siri
اللى نزل جديد على IPhone
دة أحد تطبيقات الذكاء الاصطناعى و دة تطبيق بيخلى الكمبيوتر كأنة انسان تقولة اى كلمة او امر يترجمهولك باللغة الإنجليزية و يكتبهولك على الشاشة علشان تأكدلة بصوتك انة دة طلبك فمثلا تقولة اتصلى بفلان يتصلك بية و ابحثلى على جوجل يبحثلك و يرجعلك النتائج و هكذا و هكذا يعنى الموبايل كأنة إنسان
شوف شرح كامل للتطبيق
http://www.apple.com/iphone/features/siri.html
طيب علشان تطبيق زى دة يتعمل محتاج تكون درست الكورسات الأتية
ذكاء اصطناعى Artificial Intelligence
نظم خبيرة Expert Systems
معالجة اللغات الطبيعية Natural Languages Processing
التعرف على الكلام Speech Recognition
قواعد بيانات الوسائط المتعددة Multimedia Database
نظم المعلومات الذكية Intelligent information systems
التنقيب عن البيانات Data Mining & Warehouse
هندسة المعلومات Information Engineering
و خد بالك التطبيق دة بعد ما يتم انتاجة لازم يتم قياس أداة و جودتة صح الصح يعنى محتاج تكون دارس جودة و انتاج برمجيات و بروفيشنال و دة فقط هتلاقة فى حاسبات و معلومات
وفية مواد تانية كتير دة غير ان المواد دى معتمدة على مواد أخرى متنفعش تدرس من خلالها بس انا بدى مثال فى السريع
طبعا مفيش اى كلية فى مصر غير حاسبات و معلومات هتدرس الكلام دة نهائيا
فالدكتور اللى بيقولك بصراحة ضحك عليك لانك بديهى لايحتك فيها كهرباء و الكترونيات و تحكم الى دة اجبارى فأكيد هيأكلوا اكتر من 65% من المنهج دة غير المواد ان اعدادى مش محسوبة لانها سنة عامة
فطبعا هتلاقى نفسك أخرك بتاخد بتاع 15 مادة بالكتير ليهم علاقة بالحاسب فية منهم حوالى نصهم هاردوير و الباقى سوف وير حوالى 8 مواد اساسية زى داتا بيز او نظم تشغيل او هياكل بيانات و كل دى مواد اخدناه فى سنة اولى و تانية حاسبات و معلومات مش تخصص
طبعا دة لايحة حاسبات القاهرة فيها المواد اللى بقول عليها
http://fci-cu.edu.eg/?pg=academic/co...p&query=EXPAND
الناس فى مصر تفكيرها غريب مفكره ان حاسبات و معلومات قاعد يدرس جافا و سى شارب و عندة مواد بالأسم دة و قاعد يكتب كود
كتابة الكود دى فى العالم كلة اى حد بيكتبها و بيطلق علية مبرمج و دى وظيفة تعادل فى مصر الفنى
فى دول اوربا و امريكا لان المبرمج يكتب كود و خلاص يعنى يستخدم لغات البرمجة فى كتابة اكواد او انتاج تطبيقات لكن حاسبات بيدرس علوم الحاسبات و تكنولوجيا المعلومات و مش هتلاقى عندنا مواد اسمها برمجة غير البرمجة الخطية ..
طيب هتقولى السوق فى مصر هقولك واقع و السوق مش مقياس العلم لان مثلا اى تخصص فى هندسة بيدرس تصميم مثلا تصميم الانظمة الميكانيكة مثال هندسة السيارات بيدرس تصميم السيارات و تطويرها لكن فى مصر اخرنا نعرف الميكانيكى و معندناش تصنيع سيارات و هكذا لباقى التخصصات طيران بقى او كهرباء باور او اى تخصص
و نفس القصة حاسبات بتدرس تصميم و من ثم لازم تدرس قياس الجودة او فيها قسم هندسة البرمجيات دة بيدرس هندسة الجودة و الإنتاج لكن فى مصر مفيش اى هندسة فى اى مجال لا ميكانيكا ولا كهرباء و لا حاسبات ولا برمجيات
انا قولت مثال هندسة للتقريب فقط لانك داخل ياهندسة يا حاسبات و مش قصدى التقليل من اى كلية
و انا بعترفلك اهو مفيش فى مصر اى تصميم بنية تحتية للبرمجيات و المعلومات زى انظمة التشغيل او نظم التشفير او اى شىء و كل اللى موجود تطبيقات و كمان تطبيقات عادية فى تخزين و استرجاع البيانات يعنى مش تطبيقات متقدمة زى تطبيقات الواقع الإفتراضى او تطبيقات الذكاء الإصطناعى او تطبيقات نظم القرار او تطبيقات ادارة الازمات المعلوماتية او تطبيقات التجارة الإلكترونية او تطبيقات البرمجيات الصناعية او تطبيقات أمن المعلومات و كمان على المستوى التشريعى تعبان مفيش اى قوانين بخصوص قوانين المعاملات الإلكترونية زى قوانين اصدار و تنظيم العقود الالكترونية او التجارة الإلكترونية او اى شىء و مفيش قوانين لمكافحة الجريمة المعلوماتية فالسوق واقع و 65% من خريجين حاسبات و معلومات هربانين برة البلد فى اوربا و استراليا و امريكا و تركيا و كندا و دول الخليج دى حقيقة و لازم تعرفها علشان انت بتختار و مينفعش اضلك او اقولك معلومات غلط