[ولاء عبده]

المشاركة الأصلية كتبت بواسطة حـيرم

رآى محترم الحقيقه ومش مجامل
بس انا عاوز اجيب من الدواسه اكتر . من الاخر يعنى
هنضيف بقى المؤامرات ال هى من اول يوم يدخل فيه عريس الغفله زى ما بيسموه هما انفسهم
الحكايه بتخش فى ايطار الاصطناع اكتر من ناحيه العروسه . بمعنى انها مش بتتعامل بطبيعتها ابدا
واهلها كمان بيتعاملوا بنفس الشكل مع عريس الغفله . برده بمنظور اصطناعى
عمها الللواء زعبله . وخالها العقيد شردوحه . وابن عمها رجل الاعمال نخنوخ . وقريبه كل من
المهم بتخش فى مدخل ان البنت دى لقطه ومن عيله ودى ال بيركزوا عليه قوى الحقيقه
وغالبيه الحركات دى بتكون كذب واذا صحت مبيكونشى ليهم اى علاقه بيهم اصلا
بيتقدم للعريس احلى الوجبات بما فيها اللحوم باشكالها واطباق الفاكهه الطازه
يعنى البرتقال مثلا يتقدم ليك بشكل زهرة اللوتس . بس لما بتكتب الكتاب انته ال بتقشره لانهم بيدوك سكينه تأشره بنفسك يومين كده ويختفى خالص من اساسه ومن ثم العزومات والحركات دى كلها بتختفى وممكن تقضيها جبنه قديمه مع شويه سريس بعد كده
وبعدها بيبدء الوش التانى . عاوزين وعاوزين وهات وهات لما يجيبولك الهتهات
وفى كتابه القايمه ام قرش بينكتب بعشرة . ده غير المؤخر غير الل والل وهكذا
يعنى احنا داخليين على صيده مش جوازة
بالله عليك هل ممكن تستمر الزيجه دى طالما بدأت بالشكل ده . بالطبع بتنتهى فى اسرع وقت . لانها بتموت بعد شهر العسل فى السيطره على الراجل بكل الصور والاشكال وده بيكون هدف من اهدافها ولا تتنازل عنه ابدا . منهم ال بيقبل مرغم عشان محاكم الهانم وقوانينها ومنهم ال بيرميها فى الشارع تروح تعد جمب امها . فى راجل بيقبل ينفض البطاطين فى الدور الرابع . وراجل بينفضها هى من الدور الرابع . ومن هنا بقى بتبدء مرحله اخرى فى البحث عن زيجه اخرى للطرفين وهكذا
وياسلام بقى لو زعلت بتجيب من ليله الدخله عدل وتفرش الملايه فى ثانيه بعد ما كانت بتخر ادب واحترام وخجل . والنهايه معروفه
بالطبع مش كل الناس كده . والتعميم خطأ فى اى مسئله ايا ان كانت . بس الغالبيه العظمى اصبحت بالشكل ده لدرجه انها اصبحت ظاهرة وصلت لفئه عريضه من المجتمع وكأننا داخليين على تربص مش داخليين على موده ورحمه وعيشه استقرار
وده مش تحريض على المصريات بقدر ما هو ناقوس للخطر ال هما مش حاسيين بيه
وإلا هتحل محلها الروسيات والصينيات والجوزات دى بالفعل ناجحه جدا الحقيقه
وقد اعزر من فنشر

معلهش انا باعتذر فى الاول عن كلامى لو فيه تجريح لاى حد
حضرتك بتقول كل الطلبات اللى بتعجز الشباب و علشان كده بيتجهوا للزواج من اجنبية
كل ده علشان احنا بعدنا عن الدين و الشرع و بقى همنا بس نعمل الاصول و الشكليات
الدين ماقالشى ان البنت او العروسة تجيب حاجة فى بيت الزوجية و ان العريس ملزم يدفع لها مهر خاص بيها و ملكها
نيجى للواقع العريس يدخل نافش ريشة انه راجل فى الاول و ناوى يعبر بنتكم و يتمنظر انه جايب شقة او يجيبها قانون جديد و ممكن يدبس اهل العروسة فى كل العفش و الجهاز و يمكن يساعدوه كمان فى توضيب الشقة و ان جاب شبكة يبقى فضل و نعمة و طبعا ما فيش حاجة اسمها مهر كفاية الشقة اللى جابها
و طبعا اهل العروسة بيدفعوا دم قلبهم علشان يفرحوا ببنتهم و يجيبوا احسن حاجة ليها و يا ريت بتعجب العريس و لا اهله
و طبعا بيطلبوا كتابة قايمة و مؤخر قصاد المهر اللى هو حق العروسة شرعا و الحاجات اللى دفعوا دم قلبهم فيها .
اما بالنسبة للاجنبية اراهنك مابتجيب حاجة فى عش الزوجية و بتيجى بهدومها و طبعا العريس او الزوج فى الحالة دى بيبقى ملزم بمصاريفها من الالف للياء و يديها مصروف لكن لو متزوج مصرية هى ملزمة تشارك فى مصاريف البيت و انسى ان يكون لها مصروف و كمان لو قصرت يفرج عليها امة لا اله الا الله
طيب مانمشى على الشرع من الاول و الرسول قال من استطاع منكم الباءة فليتززووج
يعنى اللى معاه يقوم بكل اللى عليه و يحتسب اللى بيعمله انه لوجه الله بنية انه يعف نفسه و يعمل اسرة توحد الله و تعينه فى امر دينه و دنيته و ترعاه فى كبره و حقيقى لو بالنية دى ربنا بيعين و ييسر كل حاجة
لكن للاسف العريس بيبقى داخل على انها تجارة و عايز يمص دم العروسة و اهلها لاخر قطرة و كمان العروسة و اهلها بيبقوا ساعات كده
ربنا يهدينا للصالح
بس صدقنى الزواج من اجنبية مش الحل و الطبع غلاب اللى طول عمرها متعودة على الانفتاح و السيبان صعب انها تتاقلم على الحياة الشرقية و الانفصال للاسف بيبقى هو النهاية المحتومة و الاولاد هما اللى بيتعبوا فى الاخر و و الله الكلام ده انا شفته فى واحد من قرايبى
ربنا يرزقنا جميعا الازواج الصالحين و يرزق الشباب بالزوجات الصالحات