[sir_belal]

دليلك لشرح منهج الكمبيوتر
للصف الثالث الاعدادي
الفصل الدراسي الأول
اعداد : بلال نصر الشباط
مذكرة الخوارزمي
في الكمبيوتر

بسم الله الرحمن الرحيم
اخواني واخواتي قررت طرح هذا الموضوع باللهجه العامية ودا حتى تستعين به لتبيسط شرحك للطالب بناءاً علي تجربتي الشخصية مع الطلاب.
وأنا لا أدعي أني عالم وخطير في المادة ولكن دا مجرد اجتهاد شخصي فأرجو أن تلتمسوا العذر في الأخطاء وجزاكم الله خيراً وأدعو لوالدي وأهلي ولي بالرحمة والهداية.
ازاي تشرح للطالب الفصل الأول خرائط التدفق
1. حل المشكلة ص2 :
بص يا عم انت تقول للطالب في البداية أن لما احب احل مشكلة معين زي عندي حتة ارض وعايز ابنيها أعمل ايه ؟
يجي طالب ويقول اجيب طوب واسمنت مثلا أو نحفر الارض أو واحد يقولك يا استاذ نجهز الارض !!
ترد وتقولهم لأ لازم الاول نجيب مهندس يخطط الارض ويرسم المبني على الورق وبعد كده نجهز الارض ونرمي الاساس ونبدء نبي العمارة .
وعلى كده يبقى علشان احل إي مشكلة تقابلني وعايز اوصل لحل ليها لازم نبدء بخطوات مرتبة .
وتروح تذكر التعريف اللي في الكتاب .
2. خطوات حل المشكلة :
أ‌) تعريف المشكلة :
طيب يا ولاد مين يقدر يقولي أي مسألة في الرياضيات ليها 3 حاجات مهمة في حد يعرفها.
حد قال اي حاجه قريبه من اللي جاي تجاوب معه، مفيش اذكر واحده وخالي الباقي يكملوه.
التلت حاجات هي
معطيات – مطلوب – والعلاقة بينها يسمى قانون
يعني
مدخلات – مخرجات – عمليات حسابية ومنطقية
ازاي يعني
بص يا بيه وبصي يا هانم المعطيات دي تسمى بالمدخلات والمطلوب يسمى المخرجات
والعلاقة بينها يسمى قانون يعني الحل
لو حد مفهمشي تقوله هي اي مسألة في الرياضيات لازم يكون ليها مطلوب علشان تجيبه ويكون ليها معطي في المسألة علشان تعوض بيه في القانون وتجيب المطلوب صح .... يقولك صح ..
ومفيش مسألة تخلو من التلاته وإلا متبقاش مسألة أو مشكلة لأن المسألة هنا تعني مشكلة
ب‌) إعداد خطوات الحل الخوارزمية
في حد عارف مين الخوارزمي يقولك آآآآآآآآه طيب مين الخوارزمي يطلع واحد ويقولك دا اللي أسس علم الرياضيات تقوله قصدك الجبر ..... طيب تعرفوا ان اسس علم البرمجه بتاع الكمبيوتر يطلع واحد ويقولك ازاي هو كان ايامه في كمبيوتر ترد وتقوله هو وضع علم على أساسه الناس بعد كده استعانة بيه في علم البرمجة ولولا الخوارزمي ما كان هناك علم برمجة.

تضرب مثال لهم تقولهم ( مين شاف يا ولاد فيلم بوحه ؟؟ يضحكوا ....
تقولهم فاكرين المشهد بتاع
تصدق سلخت قبل مادبح .
خطوات الحل الخوارزمية هي كده لازم تنفذ الخطوه ثم الثانية ثم الثالثة بالترتيب المنطقي ععرفتوا يعني ايه منطقي ( يعني تضرب واحد على دماغه يقع ما يديش منطق صح ) لأ غلط المنطقي يعني اذا سبقت خطوة الأخرى تؤدي الى فشهل المهمة وتقوم تقوله التعريف .

توضيح افصل قومي يا بنت يا آلاء طيب مفيش آلاء اي بنت وخلاص طيب مفيش بنت ... اقفش اي ولد .
المهم قولها لو امك ولو مكان راقي قولها ماماتك ولو مكان اراقي اوي قولها الماذر بتاعتك .. ( ما تلخص ياعم بلال )
( ماشي خلاص ما تشخطشي كده )...
قولها لو ماماتك مسافره، وعايزين تاكلوا فراخ وقالك بابا قومي يا آلاء هاتي فرخه من السطح واطبخيها علشان ناكل ( يعني نتغدا تعملي ايه )

وطبعا البنات اليومين دول عايشين الدور مش حتعرف وممكن تتحرج وممكن ترد المهم
تقولهم انتي ( الاول تمسكي الفرخه ( وناكلها علطول صح ... تبقى مفجوعه ... لأ يا استاذ ) طيب ( ونظفها ليه مفكر نفسك بوحه سلخت قبل ما ادبح لأ لال يع يع اخييييييييييييييييي يا استاذ) خلاص وندبحها ونظفها و نطيبها وناكلها .. صح ولا صح

ج) تصميم البرنامج على الكمبيوتر
بعد كده نعمل البرنامج على الكمبيوتر
واحد يقولك يا استاذ طيب وايه لازمت اللي فات ما نشتغل على الكمبيوتر على طول
تقوله انت لما تحب تبني عماره بتعمل ايه .... ( بتجيب طوب واسمنت وحديد وتبني ولا تروح لمهندس الاول يصمم العمارة على الورق )
يبقى لازم نخطط البرنامج على الورق علشان تعرف تمخخ كويس على الورق وتصمم البرنامج بدون أخطاء
د) اختار صحة البرنامج
بعد ما عملنا البرنامج وجين نجربه لقينا في غلط ازاي تقوله مثلا
لو عملا برنامج جمع رقمين زي 5 + 3 = لقيت طلع 2 يبقى دا صح واحد يقول لأ دا طرح يبقى تقوله لازم نجرب البرنامج بمدخلا أن عارف الناتج الي حيطلع ايه .. علشان اعرف هو شغال صح ولا لأ
ه) توثيق البرنامج
بعد ما خلصنا البرنامج لازم نسجل كل حاجه علشان لو حبنا نرجع ونعدل نقدر
وتسأل واحد انت اكلت ايه انبارح ممكن يرد وممكن يقولك مش فاكر ...
المهم تقولهم ان الواحد ممكن ينسى اي حاجه علشان كده لازم نسجل كل حاجه في الورق يعني توثيق علشان نرجعله في اي وقت انا او غيري ...

وبكده تنتهي الحصة الاولى لو عجبكم ممكن أكمل في الحصة اللي جايه
السلام عليكم ورحمة الله وبركاته

الحصة الثانية
خرائط التدفق
طيب فاكرين يا ولاد خطوات حل المشكلة ؟
يردوا : آه فاكرين يا استاذ، تروح تقولهم علطول بصوا معايا يا ولاد هو انا لم احب ابني بيت بروح للمهندس يصمم البيت على الورق الاول صح .
يقولوا صح يا استاذ : طيب هو لازم المهندس اللي رسم البيت على الورق هو نفسه اللي يبنيه ؟؟
يقولوا لأ مش لازم ممكن مهندس تاني هو اللي يبني ... تقول لهم طيب هو المهندس اللي حيبني ليه فهم الرسمه اللي على بالرغم من انه مش اللي رسمها ...
عارفين ليه .... علشان الطريقة اللي اترسم بيها البيت هي طريقة بيفهمها اي مهندس ...
نفس الكلام عندنا في البرمجة لما تحب تعمل برنامج لازم تصمم البرنامج الاول على الورق ... وعلشان تصمم البرنامج بطريقة يقدر اي حد يفهمها ... يبقى لازم تصمم البرنامج باستخدام رموز يقدر أي حد يفهمها بسهولة ... وأسهل طريقة وأبسط رموز تعمل كده هي خرائط التدفق ...
علشان خرائط التدفق بتعبر عن البرنامج بطريقة تقدر تفهمها لأي حد .... واضح ..
وتقول تعريف خرائط التدفق

رموز خرائط التدفق
احنا يا ولاد بنرسم الخريطة اللي بتعبر عن اي برنامج على الورق باستخدام الرموز التالية

الرمز الاول دا بنبدء بيه الخريطة وبرضه بننهي بيه اي خريطة ولازم يكون رمز واحد للبداية وولحد للنهاية


الرمز الثاني دا رمز مخصص لادخال قيمة في الذاكرة واخراج قيم من الذاكرة ودا شكله
خلي بالك ان شكله متوازي ش مستطيل متنساش الكلام دا ( اصل في ناس عبقره بتريمه مستطيل )

طيب لما نحب نستخدمه في الادخال نعمل ايه ..... نرسمه ونكتب جواه أحد الكلمات التالية
عايز تضحكهم قولهم العيل الصغير لما يحب نشربه نقوله ايه ها حد عارف يقوله ..... انبوه يا استاذ يا استاذ تقوله برافو ول كلمة هي (أدخل)Input وممكن برضه تستخدم
(اجعل)Get - Read(اقراء) - Enter(أدخل)
وكلهم بنفس الاستخدام أي الادخال وبراحتك اكتب الكلمة اللي انت عايزها ملهاش قاعدة يعني من الاىخر الكلمة اللي تحبها اكتبها


و لما نحب نستخدمه في الاخراج نرسمه ونكتب جواه احد الكلمات الآتية (Print -(طباعة) output(اخرج))
نفس الكلام برضه الاثنان نفس المعنى وممكن تستخدم اي واحده منهما


طيب ايه هي يا استاذ معنى الكلمات N1 و N2 و Sum و A
أقولك انت لما تحب تعمل برنامج مثلاً لجمع رقمين بتعمل لجمع رقمين محددين من قبل ولا لجمع أي رقمين
بالطبع لجمع اي رقمين كويس اوي
بص يا سيدي اي بيانات يتم ادخال أو اخراجها من الذاكرة لابد ان تكون في أماكن تسمى تلك الاماكن بمتغيرات او ثوابت سيبك من الثوابت دلوقتي وخلينا في المتغيرات
المتغيرات دي عبارة عن أماكن في الذاكرة يسمى كل مكان باسم لسهولة الوصول اليه
عامله زي محل العطار عبارة عن ارفف وادراج كل درج يحتوي على عنوان بمحتوياته صح برضه طيب ليه
عارف ليه لسهولة الحصول على المطلوب

نفس الكلام هنا بص للشكل دا


واخد بالك من الشكل دا تلاحظ ان الذاكرة تقسم الى مجموعة خلايا وكل مكان بياخد اسم غير مكرر ويمكن دمج اكتر من مكان معا وياخدو اسم واحد


المهم الاماكن ممكن تسمى باحرف او كلمات لسهولة التعامل مع محتوبات الذاكرة
طيب لما اجي اقولك
Input M
عارف معناها ايه معناها ان الكميبوتر سوف يخزن القيمة التي ستكتبها في المكان اللي اسمه M في الذاكرة

طيب لما اقولك Print Sum دي بقى معناها ان الكمبيوتر سوف يطبع اللي جوه المكان اللي في الذاكرة اللي اسمه Sum.

الرمز الثالث رمز المعالجة أو العملية ودا اللي بتم فيه أي عملية رياضية ودا شكله

بص معايا انا قولت قبل كدا ان اس مسألة في الرياضيات عبارة عن تلت حاجات هي ها حد فاكر ايوه صح يا بنت يا تقى
( معطيات - مطلوب - قانون )

المعطيات وااللي هيه المدخلات وعرفنا بندخلها برمز ايه
والمطلوب اللي هيه المخرجات وعرفنا بنخرجها برمز ايه
أما القانون دا بقى اللي بنكتبه في رمز المعالجة علشان اقدر احسب قيمة المطلوب

زي لما يقولك عايز اجمع رقمين A و B وطباعة الناتج C
تقول علطول ان المدخلات A ,B والمخرجات هي C
اما القانون او عملية المعالجة هي C = A + B
صح
يبقى A,B في متوازي الادخال مع امر Input وبرضه C في متوازي الاخراج مع امر Print
أمال C = A + B تنكتب في اي رمز يا بنت يا مريم ؟
صح يا مريومه تنكتب في رمز المستطيل اللي هو رمز المعالجة


ترن ترن ترن ترن ترن ترن ترن ترن ترن

للأسف الجرس ضرب
أكمل ان شاء الله في الحصة اللي جايه بس لما اشوف إيه رأيكم وردوكم
السلام عليكم

الحصة الثالثة
بسم الله الرحمن الرحيم

السلام عليكم ورحمة الله وبركاته توقفنا في الحصة السابقة عند رمز المعالجة وسوف نبدء في رمز القرار وعلى بركة الله نبدء
قبل كل شئ احب ان أخبركم ان رمز المعالجة يمكن أن يحتوي على أكثر من عملية كما تلاحظ في الصورة التالية


الرمز الرابع رمز القرار أو المقارنة أو التفريع أو التشعب


الرمز دا بقى يستخدم لاتخاذ قرار بناء على قرار معين مثلاً
قبل كل دا في حد يعرف معاملات المقارنة يا ولاد طبعا العباقره كتير عندنا ... ولا واحد حيرد
تروح تقولهم معاملات المقارنة أهي
= يساوي
< اكبر من ( تلاقي واحد عبقري يقولك دا اصغر من يا استاذ ترد تقوله بص يا جنيس حقولك كمان شويه )
> اصغر من ( يطلعك الواد نفسه الجنيس ويقولك دا هو اللي اكبر من مش اللي فات )

بص يا جماعه معاملات المقارنة دي ملهاش نطق محدد الا من خلالها معناها واستخدامها
يعني مثلاً
A < B دي معناها ايه يا ولاد
يرد واحد ويقولك
الـ B أكبر من الـ A يا استاذ
تقولك طيب ماتنفعشي الـ A أصغر من الـ B


تصدق صح يا استاذ

=< دي أكبر من أو يساوي
=> دي اصغر من او يساوي
<> لا تساوي
يقولك يا استاذ احنا مش بنخدها كده ...... ترد وتقوله يا حبيبي اللي انت درستهم دول رموز رياضية وصح ودول برضه صح بس الكمبيوتر ميعرفشي يفهم اللي انت درستهم علشان كده عملوا الرموز دي للكمبيوتر .... فهمت


نكمل رمز القرار دا بقدر من خلاله اتخذ قرار بوصول قيمة متغير الى قيمة معين
مثلا أسأله هل وصلت N ودا متغير الى القيمة 3 مثلا
أو نقارن متغير بمتغير آخر زي مثلاً A < B وهكذا وفي أمثلة كتير على الموضوع دا

المهم مثلاً أنا لما بقارن متغير بمتغير آخر رمز القرار دا بيديني احتمالين وممكن أكتر ....
مش فاهم يا أستاذ حاجه خالص

ابسطهالك


بص يا محمد
انت مثلا لما مامه تقولك روح هات كيس صلصا بمناسبة ارتفاع سعر الطماطم من ماركت النور اللي تحتنا لو ملقتشي عنده هات من ماركت الحرية والعدالة اللي بعده ...
انت تروح لمين الاول

يرد ويقولك مش رايح لحد خالص يا استاذ

تقوله طيب حتلاقي الشبشب طاير في وشك وحتروح ورجلك فوق رقبتك......



المهم انت نزلت بعد تلك القصفه الجوية اللي فاتت
اول ما تنزل تجيب تروح لمين الاول
الطبيعي انك تروح لماركت النور وتسأله عندك صلصلة قال أه تجيب ...
لو قال لا .... تعمل ايه ها قول يا شاطر

علطول تروح لماركت الحرية والعدالة وتسألة عندك صلصلة قالك أه تجيب ..... لو قالك لأ يبقى انت كان عندك احتمالين مشيت مع ااول اما منفعشي لورحت للتاني منعشي لو في تالته روح مفيش ... يبقى تروح وخلاص


ايه اللي ان رمو القرار دا بيدني احتمالين او اكتر وانا بدي للكمبيوتر انه يختار اي احتمال بناء على الشرط اللي جوه القرار اذا كان صح اعمل الاحتمال بتتاع الاختيار الصح
أما لو كان خطأ يبقى اعمل الاحتمال بتاع الاختيارالخطأ
يعني لازم يكون في احتمالين موجودين علشان يقدر ينفذ الاحتمال اللي الشرط تحقق عليه


فهمتوا ولا لأ
قالوا نعم فبها ونعمة وكفا الله المؤمنين شر القتال ...
قالوا لأ

تعمل ايه
تعمل الحركة دي
قوم اي واحد من مكانه ووقفه وأسأله
هل أسمك محمد ؟
...... وقوله متردش دلوقتي ...
لو اسمك محمد فعلا اقعد ...
لو غير كده خليك واقف ......


...... وتقولهم انا دلوقتي اديت اختيارين ...
هو حينفذ واحد منهما دلوقتي بناء على ايه يرد واحد ويقولك
بناء على ان اسمه محمد ولا مش محمد
تقولهم تمام هو الموضوع كد بالضبط .... القرار بيعمل كده


لو فهموا بها ونعمه مفهموش روح ارمي نفسك من الشباك وريح نفسك....
طبعا انا ممكن اديك امثلة بس دي الاامثلة الي حضره في ذهني دلوقتي .....
ممكن لو عيال غبيه شويه تتعبك حاول ان تبسطهالهم اكتر من كده



الرمز الخامس : خط الاتجاه

دا بقى يستخدم ويرسم بين كل رمز من الرموز السابقة

بكده تنتهي الحصة التالته .....

وجاري اعداد الحصة الرابعه ......
عايز رأيكم يا جماعه .....

الحصة الرابعة

بسم الله توكلنا على الله

اللي جاي دا يا جماعه عايز شوية تركيز

قبل كل حاجه
خرائط التدفق لها مميزات أو فوائد وهي
تبسط للمبرمج ( اللي هو انت ) فهم المشكلة و كمان تقدر بيها توصل لأفضل حل وكمان تقدر توصل فكرتك لأي حد ... لأ وكمان بتوفرلك القدرة تحفظ كل خطواتك في سجلات ودا اللي اسمه توثيق ..


وكمان ليها شوية اعتبارات لازم تبقى عارفها ..
الاولى ان الخريطة لازم تترسم من فوق لتحت او من الشمال لليمين
التانية : لازم تبدء برمز بداية واحد ورمز نهاية واحد
التالته : ان المتغيرات دي اماكن في الذاكرة تسمى بأسماء ... زي الرسمه دي


الرابعة في حالة كتابة معادلة رياضية وبالتأكيد في رمز المعالجة لازم تكون المعادلة كالآتي



آسف جدا ً الحصة صغير شويه بس من الحصص اللي جايه ننخلص الخرائط ان شاء الله
السلام عليكم ورحمة الله وبركاته

الحصة الخامسة
بسم الله الرحمن الرحيم
يا أهلاً بيكم

نستكمل على بركة الله شرح أمثلة خرائط التدفق

المثال الاول : رسم خريطة تدفق لجمع عددين يتم إدخالهما وإظهار الناتج :

بص يا سيد الناس انت و هو ....

قبل ما تتكلم عن اي حاجه قول للطلاب مين يا ولاد فاكر ايه التلت حاجات اللي لازم تكون في اي مسألة في الرياضيات

... صح يا بنت يا آلاء ................. معطيات و مطلوب و قانون
اللي هو مدخلات و مخرجات و عملية حسابية


يبقى على كدا يا ولا الخريطة دي بتحل المسألة بتحديد
1. المخرجات واللي هيه ناتج جمع الرقمين وحنفترض ان المكان اللي حيحط في النتاج دا اسمه C
2 . المدخلات واللي هيه المعطيات أي الرقمين اللي حنجمعهم ودول لسه مش عارفنهم لأن الرقمين دول ...وحنفترض انهم حيتخزنوا في مكان في الذاكرة اسمه A ودا للرقم الاول ومكان تاني اسمه B ودا للرقم الثاني

يجي واحد ويقولك ازاي يا استاذ مش حنعرف الارقم اللي جنجمعها
عارف تقوله ايه ...
قوله هي الالة الحاسبة معمولة لجمع أو طرح ... اي ارقام ولا ارقام محددة .... يرد ويقول اي أرقام ... تقوله ما هي دي آلة حاسبة بس لعملية واحد وهيه الجمع

3. الحل : ودا بعمل فيه المعادلة اللي بتقول
C = A + B

....

طيب ايه خطوات الحل الخوارزمية اللي حنتبعها علشان نحل المشكلة دي

1. لازم تكون البداية
2. بعد ما نبدء اي لما البرنامج يشتغل ندخل الارقام اللي المفرض تتجمع ..
3. بعد كده نجمعها ونخزن الناتج في الذاكرة في المكان اللي اسمه C
4. ونطلع الناتج
5. ونوقف البرنامج

صعب الموضوع لأ طبعاً سهل .

طيب تعالى نرسم الخريطة وحده وحده ونشوف حتترسم ازاي يا ولاد

الاول احنا قولنا قبل كده اي خريطة لازم تبدء برمز بداية يله نرسم


ودائما خلي باك بعد كل رمز بنرسم خط اتجاه


حلو اوي لحد هنا

هي المسألة دي عايز تجمع رقمين والرقمين دول طبعا انت مستني تخزينه في الذاكرة في المكان اللي اسمه A والمكان اللي اسمه B
صح برضه ولا
طيبا احنا علشان نخزن الرقمين دول نحتاج امر ادخال مين عارفه يا ولاد ...... صح با ينت يا مريم شكل المتوازي
ونكتب جواه Input او Read أو Get أو Enter للمتغيرات A و B طيب يله نرسمه


كده بقى عندنا رقمين وعايزين نجمعهم في المتغير C اللي هو مكان في الذاكرة
تبقى المعاجلة C=A+B ,اي عملية رياضية بتنكتب في رمز المعالجة اللي هو شكل ايه يا وبنات؟؟؟
........ صح يا بنت يا مريومة المستطيل


كده بقى عندنا ناتج الجمع في المتغير C يبقى لازم نعمل اخراج للناتج اللي هوه المطلوب ....
ايه الشكل اللي بتاع الاخراج ها مين يعرف ؟؟؟؟
برافو يا بنت يا الاء ..... المتوازي ونكتب بداخله يا كلمة print يا كلمة output


وفي الآخر زي البداية لازم ننهي الخريطة برمز النهاية


ودا شكل الخريطة في النهاية



وبكده تنتهي الحصة الخامسة

الحصة السادسة

بسم الله الرحمن الرحيم

يا اهلا بيكم

نبدء من مكان ما وقفنا مثال جمع رقمين

ازاي نعمل المثال دا طرح رقمين وكمان ضرب رقمين

بص يا سيد الناس نفس المثال ونفس الرسم بس حنغير علامة الجمع اللي في رمز المعالجة الا علامة طرح أو ضرب




طيب يا استاذ بلال العلامة دي * معناها ايه دي يا حبيبي اسمها علامة الضرب ×


سؤال لولبي اديه للعيال المثال دا ينفع قسمه ؟ يرد واحد ويقولك ينفع
تقوله ماشي ينفع طيب اذا فرضنا ان قيمة المتغير A بـ 6 و قيمة B بـ صفر يبقى الناتج كام ...
تبص تلاقيه عمل زي اينشتاين كده

امال ارسمها ازاي يا استاذ بلال ؟ اقولك .......
بص يا سيد الناس

الاول احنا بنبدء


ثانياً بنعمل ادخال للقيم او المعطيات اللي هما A و B

طيب خلي بالك بقى ...... المعادلة المسئولة عن القسمة بتكون كدا


لاحظ معايا اللي جاي
القاعدة اللي جاية دي من ابتكراتي الشخصية
لو احنا قولنا

يبقى دا في حالة اذا كانت قيمة A بصفر متفرقش معنا في حاجة لأن كدا كدا في ناتج

اما لو قلنا


يبقى هنا لو كانت قيمة B اي حاجه غير الصفر تصلح القسمة
اما لو كانت قيمة B اللي هيه المقام أو المقسوم عليه بصفر تبقى عملية القسمة لا تصلح

يبقى مقدميش غير اني أتخذ قرار

ثالثا : اتخذ قرار وأقوله هي B = 0
اي الرقم الثاني بيساوي صفر اللي هو المقسوم عليه

هنا احتمالان لا ثالث لهما
أ) ان B تكون فعلا بصفر (أي نعم )وهنا مش ممكن اقسم ولازم اطلع رسالة وأقولة فيها (غير معرف)
واقفل البرنامج


ب) ان B لا تساوي الصفر اي اكبر أو أصغر من الصفر (أي لا )وعلية يبقى نقوم بعملية القسمة


ونطبع الناتج اللي هو C

ونقفل البرنامج

ودي شكل الخريطة في النهاية



تلاقي العيال اللي بتفهم عملوا كده


والعيال اللي فهمها تقيل تتنح


وبكده تنتهي الحصة السادسة
الحصة السابعة بعد ما الاقي على الاقل عشر ردود
تحياتي للجميع

بكده تنتهي الحصة التاسعة وينتهي الفصل الاول ومعه تنتهي خرائط التدفق
عايز اشوف رأيكم في الملخص دا بجد
وإن شاء الله ابدء في الفصل التاني في حاجات جامده اوي اوي ..
تحياتي للجميع

الحصة العاشرة
بسم الله توكلنا على الله
الفصل الثاني : مقدمة للفجوال بيزك
لغة الفجوال بيزك : دي من اشهر لغات البرمجة (وخلي بالك لغات البرمجة دي مجموعة أوامر وتعليمات بتكتب بحروف انجليزية وقواعد محددة حسب كل لغة وبعد ذلك تحول الى لغة الآلة اللي بيقدر الكمبيوتر يفهمها )
طيب يا استاذ بلال يعني ايه لغة الآلة اللي بيفهمها الكمبيوتر ؟
بص معايا يا واد يا نور فاكر فيلم يانا يا خلتي ؟ آه فاكره .
طيب فاكر اللقطه بتاعت جمايكا؟


وعمك جمايكا دا كان ما بيعرفشي غير كلمتين صح؟ آه صح كان بيقول ايه ( صح ... ويزيزاماما ... ) أهو الكمبيوتر برضه كده مبيعرفشي غير كلمتين ، الصفر والواحد وبس .
واي برنامج لازم ينكتب باللغة البرمجة وبعد كده تتحول الى مجموعة اصفار و واحيد بواسطة برنامج اسمه المترجم Compiler علشان يقدر الكمبيوتر يفهم الاوامر دي ويستجيب لها.

وخلي بالك لغة VB دي من ضمن حزمة فيجوال استوديو اللي بتكون موجودة على CD واحد، وكائنيات التوجيه يعني انها تستخدم لإنشاء تطبيقات ويندوز زي برنامج الرسام والآلة الحاسبة والدفتر، وكمان مواقع الويب وتطبيقاته. والبرامج دي بتكون موجه بحدث .
يعني تستجيب للمستخدم عند قيامه بسلوك مثل تحريك مؤشر الفأرة والضغط بزر الفأرة ووالضغط على مفتاح في لوحة المفاتيح، وكمان ممكن تحرك النافذة وتصغرها وتكبرها وتبدل بين النوافذ وتغير اللون بتاع النص والخلفية يعني بتغيير السمات اللي بتميز النافذة.
طيب يا أستاذ بلال هي حزمة فيجوال ستوديو مفيهاش غير لغة الفيجوال بيزك بس ؟
لأ طبعا دي كمان معها لغة C++ (سي بلس بلس ) و C# (سي شارب) وخلي بالك ان لغة السي من اشهر لغات البرمجة وأقدمهم، وكمان في لغة Java جافا بتاعت تطبيقات الويب .

طيب يعني ايه تطبيقات الويندوز او النوافذ Windows Applications يا بنت يا آلاء ؟
برافوا دي التطبيقات اللي بتعتمد على نوافذة رسومية
( يعني فيها ازرار زي الاغلاق والتكبير ) وكمان بتستخدم الفأرة ولوحة المفاتيح وغيرها من وحدات الادخال زي القلم الضوئي وخلافه.
يجي واحد يقولك هو في حاجه متعتمدشي على الفأرة ولا النوافذ ؟

 
طبعاً كان في حاجه اسمها Dos من خمستاشر عشرين تلاتين سنة ، النظام دا شكله كان كده


عبارة عن شاشة سودة لا فيها ايقونات ولا فارة ولا حاجه انت اللي بتكتب الأوامر بإيدك
ولو غلطت تعيد الكتابة وحاجه قرف في قرف
بالتأكيد دا اياميها كان اختراع تقريبا في 1982 لحد 1995 لأن الويندوز ايامها ما كانشي حلو وتعبان خالص خالص خالص
كانت كل لغات البرمجة تعتمد على الطريقة الهيكلية ولا بتعتمد على الكائنات أي الادوات والازرار ولا النوافذ زي لغة C ولغة Basic بيزك فقط
بس على فكرة البرامج ايامها كانت تمتاز بصغر حجمها وقوتها وسرعتها.
بس كانت صعبه في كتابة اكوادها.

نجي بقى لحاجه غلسه بس انا عايزكم تركزوا معايا ....
يعني ايه تصنيف Class ؟
بص معايا الاول للصورة دي


ايه اللي فهمتوا من التخطيط دا ........
برافوا يا آلاء ان السيارات أنواع منها الرياضية ومنها العائلية ومها الجيب ومنها الصغيره والكبيره وخلافه بس في النهاية كل ما سبق هو في الاصل سيارة ....
يعني بالرغم من الاختلاف بينهم بس كلهم سيارات. حلو كدا
التصنيف Class هو السيارة (وممكن تقول السيارة الاصلية او المصممه على الورق مثلاً) وتقدر تطلع من أي سيارة موديلات لسيارات آخرى بأشكال وبأنواع مختلفة .
يعني التصنيف دا يعتبر الشكل الاول والاساسي لأي كائن.
وانا باخد من التصنيف الاساسي مجموع صفات(يعني خصائص ) ووسائل واحداث وأقدر اطلع اكتر من كائن من التصنيف دا وبأشكال متنوعه.
بص خلي بالك لغة البرمجة لا تسمح لك بأن تستخدم التنصيف الاساسي وكمان مش بتحجز له مكان في الذاكرة، ولكن تسمح لك بأن تأخد خصائصه وأحداثه ووسائل (يعني توريث)وتطلع أكتر من كائن.

يعني من الآخر التصنيف دا كود جاهز لنافذة مثلاً انت بتاخد الكود دا وبتعدل فيه ... بتعديلك دا يبقى انت طلعت كائن .زي نافذة Mycomputer..... ود فكره مبسطة قريبه للصح .......

طيب في حد يعرف يا ولاد معنى كلمة كائن Object في لغات البرمجة؟
ايوه برافوا الكائن هو شئ موجود فعلاً ومستقل زي النافذة بتاعة Mycomputer أو أي نافذة آخرى وممكن برضوا الازرار بتاعة تكبير النافذة زي اللي النافذة دي بالضبط . يعني من الآخر الكائن هو أي أداة ممكن تقابلها زي النافذة والازرار ومربعات الكتابة وخلافه.



الصور اللي قدامك دي مجموعة الدوائر دي كانئات أو أدوات . والنافذة نفسها كائن
دي يعني ان الكائن ممكن يتكون من عدة كائنات .
 
طيب خلي بالك معايا انت طبعا عرفت ان الكائن اللي هو الاداة ممكن يكون نافذة او زرار او مربع كتابة او شريط تمرير.
طيب في تلت حاجات عايزك تعرفه ، اي كائن يعني اداة ليها تلت حاجات هما :
1. خاصية 2. حدث 3. وسيلة

الاول الخاصية : الخاصية هي السمات يعني الحاجات اللي بتميز الاداة عن أداة أخرى، زي كدا


الكائن أو الزرار اللي على اليمين أكبر من اللي على الشمال ( يبقى على كدا ان الطول والعرض خاصية )
الزرار اللي على اليمين لون بنفسجي واللي على الشمال لونه أخضر ( يبقى لون الزر خاصية )
الزرار اللي على اليمين لون كتابته اصفر واللي على الشمال لون كتابته ازرق (يبقى لون الكتابه دي خاصية )
الكتابة اللي على الزرار الي على اليمين Button2 واللي على الشمال Button1 (يبقى الكتابة اللي على الاداة تعتبر خاصية )
ثانياً الاحداث : ودي بقى الفعل اللي بيقع على الكائن زي ضغطت الفارة ولازم يكون ليه استجابة معدة مسبقاً. لو مفهمتش بص للمثال دا


لو واحد رفع سلاح في وشك وقالك سلم نفسك يا عتريس المكان متحاصر اقف مكانك ؟
مش دا حدث او فعل وقع عليك ..... ايه استجابتك اللي انت عملتها .. بالطبع عملت زي الاخ دا وروحت رافع اديك لفوق ...............
هو دا الحدث ( سلم نفسك اقف مكانك) والاستجابة (رفعت اديك)
طيب ازاي لغة البرمجة بتعمل كدا بص معايا شايف النافذة دي


طيب ان لو ضغطت على الزرار 1 ، والزرار 2 والزرار 3 ضغط بالزرار الشمال للفارة .
دا يبقى حدث ايه المفروض يحصل
ها تعرفي يا بنت يا آلاء ايه اللي حيحصل ؟


1. الزرار 1 حيقفل النافذة . صح
2. الزرار 2 حيكبر النافذة. صح الصح .
3. الزرار 3 حيصغر النافذة في شريط المهام. صح تمام وبرافوا عليكي.
خلي بالك بالرغم من ان الضغط كان واحد، الا ان الاستجابه كانت مختلفة عارف ليه ؟
لأن الكود اللي جوه كل كائن من التلاته ، بيشتغل عند وقوع الحدث عليه وبينفذ الاوامر اللي جواه .

ثالثاً الوسائل : دي وصف للسلوك اللي بيعمله الكائن زي مثلا نافذة My computer و مربع الحذف دا



طيب المربع اللي على اليمين تقدر تكبره ؟ لأ طبعا عارف ليه ؟
الاول انت عارف يعني ايه وسيلة يعني سلوك الكائن بيقدر يعملها زي التحرك والتكبير والتصغير والنسخ ولاقص واللصق .
وممكن سلوك يناسب كائن زي التكبير بيناسب النافذة اللي على الشمال ولا يناسب كائن آخر زي النافذة اللي على اليمين.
ها فهمتوا حاجه ولا لأ؟




نكمل يله يا ولاد
ندخل بقى في الشغل التقيل
حد يا ولاد يعرف يعني ايه اطار العمل دوت نت فرام ورك .net Framework ؟
بص معايا الاول عايزكم تصلوا علي النبي .
اطار العمل .net framework دا من انتاج شركة ميكروسوفت وهيه اللي انشئته وبتوفره بشكل مجاني مع نسخ الويندوز . حلو كدا يا واد يا نور
طيب وايه لزمته يا استاذ بلال ؟
بص يا عم الدوت نت دا هو اللي بيدعم تشغيل البرامج اللي انت بتعملها باللغات الكائنية التوجيه .
يعني لو انت عملت برنامج بلغة فيجوال بيزك بما انها من لغات البرمجة كائنية التوجيه، لما بتخلص البرنامج وجيت تشغله ، تشغله على اي نظام تشغيل وخلاص ؟ طبعا لأ لازم يشتغل على نظام يدعم الدوت نت زي طبعا نظام ويندوز XP و 7 و 8 .
وممكن نقول على الدوت نت انه عباره عن مكتبة عملاقة من الاكواد او الاوامر والتي تدعم عمل وتشغيل البرامج المكتوبة بلغات البرمجة كائنية التوجيه.

المكتبة دي بتكون متقسمة الى وحدات صغيره ، وحدة بتدعم تطبيقات النوافذ ووحدة بتدعم تطبيقات الويب ووحدة بتدعم تطبيقات الموبايل ووحدة بتدعم الشبكات وهكذا

يبقى نسنتج من دا ان الدوت نت بتعمل حاجتان مهمتان :
الاولى : تساعد على انشاء التطبيقات ( ويب – نوافذة – موبايل – شبكات )
الثانية : توفر بيئة لعمل تلك البرامج بصورة صحيحة.

طيب يا استاذ بلال هو الدوت نت بيتكون من ايه ؟
بصي يا آلاء اطار اعمل دوت نت بيتكون من :
1. بيئة التشغيل CLR Common language Runtime
ودي شغلتها تجميع كل الاوامر المكتوبة في برنامج بأكثر من لغة برمجة دوت نت داخل اطار عمل واحد أثناء الترجمة.
يعني انت ممكن تكتب جزء من برنامج بلغة وجزء آخر بلغة تانية وعند التنفيذ توفر بيئة التشغيل بيئة لعمل البرنامج كائنه مكتوب لغة واحدة.

2. مكتبة تصنيفات النظام System Class Libraries
خلي بالك بيئة الدوت نت بتكون متحمله بأكتر من 5 الآلاف فئه Class جاهزه .
بتساعدك فى إنشاء التطبيقات المختلفه ، عارف ازاي بتقدملك كل الاكواد التى يتكرر تنفيذها وتخلي دماغك مركزه في المطلوب من البرنامج و تخلي التفاصيل الفرعيه لفئات الدوت نيت .
زي انت لما تيجي تكتب كود تلاقي البرنامج بيساعدك .
ازي بيساعدك كمان شويه تعرف .

3. مترجمات Compilers
ودي شغلتها تحول الاوامر المكتوبة الى اوامر مكتوبة بلغة اسمها لغة التجميع ثم تحول من لغة التجميع الى لغة الآلة اللي هيه صفر و واحد.
اللي مفهمتشي حاجه ترفع ايدها يا وبنات ؟


الحمد لله كلكن فهمتمن الدرس !!!!!!!!! ولا واحده رفعها ايدها
طيب تحبوا اعيد الدرس دا تاني ؟؟؟ عادي انا تحت امركم !!!!!!!!
يا نهار اسود دا ناوي يعد تاني حد يلحقهم يا جماعه الراجل دا شكله معندوش عيال ولا ايه ...........


كفاية يا استاذ بلال انا تعبت احنا جسمنا ورم من الكلام النظري دا امتى نشتغل عملي ؟


طيب خلاص متعيطوش خلاص كل دا علشان فهمتوا !!!!!!!!!
تعالى بقى ندخلوا في الشغل العملي بقى
كل اللي جاي بقى عملي وشغل فيديو
ترن ترن ترن ترن ترن


الحصة للأسف خلصت نكمل من الحصة اللي جاية ان شاء الله