بصفتي كنت متابع رياضة زمان عايز اقول حاجات بس من خلال متابعتي البعيد عن الرياضة ممكن ما يعرفهاش
اولا ً لما حد يذكر اسم مصطفي يونس او احمد شوبير او مدحت شلبي او مجدي عبد الغني لو حضرتك مش متابع رياضة ممكن تفتكر ان ولائهم للأهلي
انا آسف اني هاخيب ظنك و اقولك ان الناس دي ولائهم للسبوبة فقط لاغير
حج مصطفي يونس دا كان شغال ردح لكل شئ ف الاهلي و ف مرة استلم ابو تريكة و ف الحلقة دي قعد يعيد هدفين هو احرزهم خلال مشواره الطويل مع الاهلي ع اساس ان زي ما ابو تريكة جاب اهداف انا برضو جبت اهداف يعني ( مع انه مدافع المفروض يجيب اللقطات المميزه ليه دفاعيا )
و ف ماتش السوبر اقترح اقتراحين علشان يحل ازمة تمرد الالتراس
الاقتراح الاول قال اننا لازم نجيب العيال دول نمدهم علي رجليهم
الاقتراح التاني قال كفاية نطلق عليهم 10 كلاب بوليسية و هم هايمشوا
ملحوظه من ايام الثورة هو ما يعرفهاش لأنه كان قاعد ف الاستوديو
الالتراس دول ما مشيوش قبل كدا لما كانوا بيموتوا لأنهم كانوا مؤمنين بقضيه ساعتها و ف يوم ماتش السوبر لما سواقين الميكروباص رفضوا ينقلوهم راحوا لحد الاستاد مشي ( سفر من محافظة لمحافظة تاني )
بالنسبه للأخ مجدي عبد الغني اللي قرفنا بجون كاس العالم كان رأيه ان اهالي الشهدا يبطلوا صداع بقي و خلاص علشان الواد اللي مات اهله اخدوا 100 الف جنيه ممكن يبدأوا مشروع بيهم و في ناس كتير قوي بتموت ببلاش
اما الشلبي و الشوبير فحدث ولا حرج
all saboba all the time
مثلا ً شوبير ف اعقاب الماتش دا طلع خبر ان الاهلي هايبيع ابو تريكة بعد ماتش السوبر و طبعا ً خبر فاكس
شلبوكا دا ليه فضايح كتيره و مشاكل كتيره اقلها الفتنه مع الجزائر ( لو كتبت كل حاجة الرد هايطول مني و ماحدش هايقراه )
لما تطلب معشوبير و شلبي نسبة المشاهده انهم يقضوها سياسة بيقضوها سياسة
لما نسب المشاهدة تطلب كورة بيقضوها كورة
و قبل كدا كل واحد منهم ف برنامجه استضاف شيخ و قضاها دين ( دول مين ؟؟؟ واحد كان بيشتم مرتضي منصور بألفاظ بذيئه ع الهوا و التاني شاور اشارة خارجة ساعت ازمة الجزائر )
الخلاصة للي بيتعب من القرايه الكتير
الاعلاميين الرياضيين كانوا بيبيعوا بليله ليهم فترة طويلة علشان النشاط متوقف و بالتالي منطقي تنخفض نسبة مشاهدات الجمهور و بالتالي برضو السبوبة و الاعلانات هاتقل و بناء ً عليه لازم يهاجموا اي حد عايز يأجل او يوقف النشاط و لازم هجومهم يكون مبرر بكلمات كبيرة ما نفهمهاش بس نحس انها خطيرة زي "هيبة الدولة" و كدا
مع انك لو سألت نفسك زادت في ايه هيبة الدولة لما هربوا اللاعيبة من الفندق و عملوا ماتش بدون جمهور مش هتلاقي اجابه
ولا يمكن هم بعد حادثة بورسعيد عايزين يدربوا الامن ف الاول علي حماية المدرجات و هي فاضيه و بعد كدا يملوها جماهير ؟؟؟
الله اعلم