المسحراتى فى رثاء جمال عبد الناصر
الشاعر جمال بخيت
على الطبلة والأرغول
لا موش أنا اللى حاقول
دى مصر الحرة الأبية
باعته ابنها فؤاد حداد
يعمل مسحراتى
وينبه الغافلين والنايمين
ويقول اصحوا يا مصريين
يا عرب يا مسلمين يا مسيحيين
الشهر ده فيه إيه حصل ؟؟؟
موش فاكرين !!!!
حافكركم واصحركم.. من هنا ليوم الدين
إحنا فى سبتمبر الشهر الحزين
موت جمال عبد الناصر
أبو الفقراء والغلابة والمساكين
فاكرينه !!ولا ناسيين !!
قول ياعم فؤاد وسمعنا
ما أنت كل كلمة فى كلامك ليها ألف معنى ومعنى
قول وبكينا على الحلم اللى كان وسطينا
اصحى يا نايم
وحد الدايم
وقول نويت
بكره إن حييت
الشهر صايم
والفجر قايم
اصحى يا نايم
وحد الرزاق
رمضان كريم
الله عليك يا عمنا قول وقسم وحاول زينا تصحى النايمين رغم إن فيه ناس زعلانه مننا النوم اصله حلو وجميل للغافلين والتايهين قول يا عم قول وقسم على الطبلة والأرغول
أحسنت يا صاحب المقام
يا هادى لولادى الابتسام
وهادى لعنيهم البريق
فاتح لهم روضة العلام
الله دى مصر بتغنى وتلاغى ابنها الحر الأصيل زي نهر النيل جمال عبد الناصر الله عليك يا حرة قولى ورددى وغنى له كمان وأنشدي
المشى طاب لى
والدق على طبلي
ناس كانوا قبلى
قالوا فى الأمثال
الرجل تدب مطرح ما تحب
وأنا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال
الله ..الله عليك يا عم فؤاد جبت اللى جوانا كله هو أنت صحيح فؤاد حداد اللى بيتكلم ولا روح مصر
ولا قلبى أنا بيتألم
قول كمان يا عمنا
فين طلتك فى الدقايق تسبق المواعيد
والابتسامة اللى أحلى من السلام بالايد
أؤمر لى بحقوقى وهدوم الولاد فى العيد
والمجانية ومرايل بيضاء والأناشيد
يا فجر يا حضن مصرى يا أحن شهيد
حرام عليك يا عمنا قلبت المواجع ليه وفكرتنا بابتسامة الأب الحنينة ومرايل المدارس فاكرين يا مصريين؟؟ والمجانية الحقيقية والله كان احن شهيد الله يرحمك يا ناصر بكيت عليك مصر وإحنا من ساعتها حرمنا البكا على عنينا
اصحى يا نايم
وحد الدايم
اصحى يا نايم
يا نايم اصحى
وحد الرزاق
اصحوا يا فقراء يا غلابة يا مساكين ماعدش ليكم حد هنا غير ربنا اصحوا بقى كفاية نوم اصحوا بقى البلد حيروح مننا