[222ahmed222]

السلام عليكم ورحمة الله تعالى وعفوه وبركاته
اهلا بكم اعزائي
لي فترة وانا متغيب ومتوقف عن كتابة اي موضوع
ولكن مع بداية العام الدراسي لفت نظري شيء فاردت ان اتحدث عنه وبكل صراحه وليغضب من يغضب ولا يشغل بالي رد فعل اي شخص ولكن علي ان اعبر عن وجهة نظري لطالما اني اتحدث بموضوعيه .
انا كاتب الموضوع ومنتظر منكم نقاش حقيقي هادف ومش عيب يكون حد مختلف معايا في الرأي بس ياريت يعرض وجهة نظره في ذوق واحترام وميبخلش بيه علينا
ساطرح عليكم اليوم موضوعاً لا يخفى عن أي منكم
الأخلاق والعنوسه فإنّهما حقاً ناقوسا خطر
وأرى ان احدهما يؤثر في الآخر تأثيراً مباشراً
فكلما ازدادت العنوسه تنازلت بعض الفتيات عن بعض التزامهن واحترامهن لأنوثتهن كي يستطعنّ التعرف على شاب ما فيجدنّ فيه حاجتهنّ
ايه العربي الاوفر دا خلينا نتكلم عامي احسن
بالمختصر يعني يا عم انت وهو وهي
لا يخفى عليكم ان البنات بصراحه اخلاقهم كل يوم بقت ف النازل
والعنوسه للأسف ف زياده مستمره
وبيزيد قلة الاخلاق العفيفه عند البنت بسبب دا لأنّها بتحس انها لازم تدور على عريس
انا اسف كلامي ممكن ميعجبش اغلبكم بس دي وجهة نظري
المهم عشان تدور على عريس
فمفيش مانع لو غيرت نظام لبسها بما يخالف ما فرضته الشريعه في أن يكون رداء الفتاه " لا يصف ولا يشف ولا يشبه ملابس الرجال".
واظن انكم جميعاً ترون أنّ ما هو معروف الآن من " الموضه" كله يخالف ما فرضته الشريعه
على نقيض ذلك بالطبع يسعدني يومياً ان ارَ فتيات يعرفن ما يجب عليهن فعله للحفاظ على انفسهن ولا يتنازلن عن أي شيء مهما كان واولا واخيراً الجواز قسمه ونصيب يا جدعان
انا يومياً لما بدخل الجامعه اول ما بنزل من المترو وادخل من باب الجامعه
بلاقي مناظر نفسي لا تتحملها او لا تتحمل تصديقها
اولاً بلاقي مثلا مجموعه من البنات قاعدين جنب بعض واول ما أي ولد يعدي قدامهم يبصوا عليه بطريقه كأنّهم بيقولوله احن عيننا عليك ركز شويه
وتعدي 2 متر تاني تلاقي ولد وبنت بيهزروا مع بعض هزار غير مقبول بالمره
ناهيك بالطبع عن ما قولته من اللبس و " الميك اب "
احيانا بحس ان انا داخل اتيليه او بيت ازياء مش حرم جامعي خالص
سؤال مهم : هل الجامعه ممكن تتحول لأسباب زي دي بيت ازياء؟؟
او ممكن تتحول لمصيدة للعرسان؟ او مكان هدفه التعارف؟؟
اسئله مهمه اتمنى اعرف اجاباتكم عليها
انا عارف اني غلطان لأنّي بطرح نقاش من غير ما اشوف حل للمشكله الاصليه وهي من رأيي العنوسه دا طبعاً إلى جانب الاشياء المعروفه من عدم اهتمام الأسره والمجتمع ال بتنمو فيه الفتاه وغيره وغيره
بس كلكم شايفين ان الحال يوم عن يوم بيسوء اكتر
واحب اذكر في النهايه موقف حصل على قناه دينيه وانا لست من متابعي تلك القنوات الدينيه ولكن الموقف جدير بالذكر
كان تقريباً قناة الرحمه الفضائيه على ما اذكر
واحده اتصلت بأحد الشيوخ او شيخ بيحكي القصه مش فاكر لأن الموقف مر عليه اكثر من سنتين
المهم هذه السيده تقول له
يا فضيلة الشيخ انا مقتنعه ان البنت المفروض لها حدود المفروض تلتزم بيها
بس دلوقتي مفيش عرسان
فعشان البنت تتجوز لازم تكون منفتحه شويه مع الناس وتتعرف وتكلم ناس عادي عشان يعرفوها
وعشان يبصولها لابد من انها تلبس لبس ملفت للنظر شيئا ما
وعشان تشتغل في مكان كويس هم بيقولوا تكون جميله وشيك فلازم تهتم بنفسها شويه
طيب نعمل ايه؟؟
انا سايب لكم السؤال دا
نعمل ايه؟؟
اتمنى يكون موضوعي عجبكم ومنتظر تفاعلكم