ليه المدرس مظلوم وبيدى دروس خصوصية ؟؟؟؟؟؟؟
المعلم لسه حاله يغم وهيفضل كده طالما لا يشعربه الجميع
وهيفضل تعليمنا على نفس حال النظام السابق مش هيتغير
حتى لو طوروا المناهج، لأن المعلم أهم شىء فى العملية التعليمية
لويفهم العاقلون من الشعب لنادوا بإصلاح حال المعلم وحال التعليم
لو يدرك أولياء الأمور لنادوا بإصلاح المناهج وإصلاح حال المعلم ومنع أو حتى تجريم الدروس الخصوصية
لماذا يعطى المدرس دروساً خصوصية؟؟؟؟
أنا لا أؤيد الدروس ولا أجرمها .
ولكن أردت التفكر قليلا فى هذه المشكلة التى تواجه أولياء الأمور
وتواجه المعلمين مرتين ـ ويلام المعلمين فقط ـ :ــ
أولاً : لأن الدروس الان أصبحت جريمة فى حق المعلم ووصمة
عار فى جبينه .
ثانيا : ـ لأنه ولى أمر يتحمل مثل الجميع أعباء الدروس الخصوصية
ولكن لا يشعر أحد بذلك .
ودائماً المدرس هو المذنب ..
اسأل نفسك ياولى الأمر
هل كل المدرسين يعطون دروس خصوصية ؟
طبعا لا
هل كل اللى بيدى دروس أسعارهم عالية جدا ؟
طبعا لا
هل لأنه مبيشرحش فى الفصل؟
طب بتودي عيالك ليه الدرس عنده ؟
يبقى أنت مخطئ لأنه معندوش ضمير ومش بعيد يهمل فى الدرس أيضا
لأن المبادئ لا تتجزأ ولا أنت مش معايا ؟
طب لو كان المعلم بيدى دروس لتلاميذ مدارس أخرى
يبقى مبيشرحش فى الفصل أيضا؟؟؟؟؟؟
هل لأن العيب فى المناهج وزحمة الفصول ؟؟
طب حضرتك ياولى الأمر جربت تشرح لأولادك فى الابتدائى مش الإعدادى أو الثانوى
افتح كتاب الحساب بتاع تلتة أو ربعة وقولى هتشرح لابنك أو بنتك اذاى
هتقولى الحساب صعب وأنت ملكش فيه..
طب شوف كتاب العربى وشوف طويل على العيل أد أيه ،
ولا كتاب العلوم والأنشطة اللى فيه اللى عشان توريها للتلاميذ علشان يفهموا طبعا عايز بعض الادوات وطبعا هذه الأدوات ممكن متكنش متوفرة فى جميع المدارس
ولو توفرت فين الوقت اللى تتعمل فيه التجربة أو النشاط لجميع طلاب الفصل ؟؟؟
واتفضل حضرتك وافتح هذه الكتب وأنا متأكد أنه فى حاجات فى المنهج هتقف أمامك بعض الوقت لكى تفهمها ،
ولو حضرتك فهمتها ،
يبقى قولى هتوصلها لابنك ازاى ؟!
فى الحالة دى لوحضرتك بعت ابنك للدرس يبقى مين اللى خلاك تعمل كده ؟؟
المدرس هو اللى خلاك تجرى تودى ولادك للدرس علشان المناهج صعبة والفصول زحمة وانت مش عارف تشرح لأولادك مناهج الابتدائى ؟!
طب ونسيت أن حضرتك لو كل اللى أنا قلته مفيش مشكلة عندك فيه ....
مش فى أولياء أمور بيودو ا ولادهم للدروس رغبة فى المجاميع العالية والتميز؟
يبقى ذنب المدرس أيه ياعاقلين؟؟؟؟؟؟؟
مسألتش نفسك هو المدرس بياخد كام مرتب ؟؟؟؟
والمدرس ده مش ولى أمر وبيودى عياله للدروس عند غيره ؟؟؟
وأيهما أفضل لو راعينا مصلحة الطالب أولا
1ـ أن المعلم يشتغل دروس فى المناهج الصعبة أو الطويلة وياخد خبره بذلك يفيد منها الطالب
2ـ ولا يشتغل أى شغلانة تانية فى مصنع ولا ورشة ويطلع عين أمه ..
وطبعا مش هتبقى خبرته فى المنهج ذى المدرس اللى بيدى دروس لأنه بيشتغل فى المنهج ليل ونهار.
ثم قل لى من فضلك
مش الدروس زى المجموعات المدرسية ؟؟؟؟؟
ليه الوزارة مبتمنعهاش ؟ هى نفس الحكاية
ولا المعلم صاحب رسالة خارج المدرسة فقط
وداخل المدرسة يدى مجموعات مدرسية ؟
ليه الوزارة بتسمح له بالمجموعات ؟؟
وليه بتاخد الإدارة والمديرية والوزارة نسبة من فلوس المجموعات ؟؟؟؟؟؟
هي الفلوس ده مش طالعة من جيب ولى الأمر ؟؟
وهى برده شقى المعلم الشقيان فى البلد ده؟؟؟؟
وأخيرا الدروس تقف سد منيع أمام تحسين حال المدرس
لماذا؟؟
1ـ لأن الجميع ومنهم الوزارة فيما أعتقد ينظر إلى أن كل المدرسين بأنهم بيسترزقوا
( أوبينهبوا ) كويس من الدروس فمفيش داعى لتحسين أحولهم .
2ـ لأن بعض من يعطون دروساً ــ بمبالغ عالية ـ لن يقنعوا بأى زيادة مالية من الحكومة لأنها لن تعوضهم عن الدروس وبالتالى لن يقف بجوار المعلمين الذين يطالبون بمرتبات تحفظ آدميتهم .
وبذلك يدفع المدرس الغلبان (ويصدق هذا الكلام على معظم مدرسى مصر) ثمن سوء هذا الفهم .
وأخيرا لماذا ننادى ـ كمدرسين ـ بكادر للمعلم ؟؟
1ـ رغبة فى أن يلبى المعلم حاجات حياته الضرورية ويعيش كبنى آدم ومثل البشر .
2ـ رغبة فى تعليم جيد لأولادنا وهم أعز ما نملك خاصة بعد أن
ذهب العصر البائد , وحديث الجميع عن أن التعليم هو قاطرة التنمية خاصة الرئيس مرسى
فهل ياسيادة الرئيس هذا الكادر يضمن للمدرس الحياة المناسبة ؟
أو هل يضمن تعليم جيد يحقق نهضة مصر ؟
أنا وغيرى من المدرسين نفهم ظروف البلد ولا نطالب بالكادرالحقيقي الآن
سيادة الرئيس
تقرب من المعلمين وتعرف على مشاكلهم ـ بلا وسيط ـ واجعل لهم من وقتكم نصيباً وحدثهم وتحاور معهم .
أشعرهم سيادة الرئيس بأنهم بناة عقول هذه الامة ـ وهم كذلك ـ شاركهم فى مشاكل التعليم والمناهج وتطويرها واجعل وزير التعليم قائداً لذلك ومعينا له .
وإن شاء الله ستجدون مايسركم .
لأن مصر لن تتقدم بقرارات فوقية حق التقدم فقط ، ولن تحدث نهضة تعليمية شاملة فى مصر إلا بيد جميع أبنائها من المعلمين بناة عقول الأمة ..
هذا ما أراه كمدرس يحلم بتعليم حقيقى ..
من أجل بلدنا مصر ..
رفع الله قدرها وقدركم....
مدرس مهموم
|