..........................
من كتر اليُتم .. من كتر اللّطم
قلبى مبقتش لاقيه فى الحياه
قلبى اللى شبع منك ظلم وإفترا
من كتر همك .. ما كان ماشى فى دمك
قلبى على إيدك خسر . ماكانلوش فى الشرا
قلبى خلاص تعب وهمد والقومه ماقامهاش
قلبى مشا مشوار كبير ولا رجع ولا جاش
قلبى اللى ضحا بكل شئ علشان واحد مايسواش
قلبى على إيدك بقا نزيل فى غرفة الإنعاش
...................................
دخل غرفة الإنعاش بعد تلاتين سنه
لا أكل فيهم عيش ولا داق طعم الهنا
شحت فى كل ميدان وباع حتى الضنا
ولما فكر يقوم هههه إتهموه بالزنا
لما قلبى قام وقالك يا بلدى انا وياكى
حكون شهيد ودمى يكون فداكى
إتهموه بالرشوه مع وجبة كنتاكى
خلوه مجرم سفاح وحديث الساعه
قالوا البلد سليمه على كل إذاعه
كل ده يا بلدى علشان قلبى قال حرام
شبع عمره كله تذويق فى الكلام
ولما قلبى مره فكر وجهوله أحقر إتهام
كان ممكن يكون من الشهدا دمه بيرويكى
دم الشهدا غالى اوى .. وقلبى اللى كان معاهم ظلموه
كل قلب بيحب بلده شهيد غالى او عايش يتهموه
بقا دى جزاة قلبى يا بلدى؟
ومع قلبى المخلص تبيعى فى عرضى
مظاهرات وحركات وأحزاب ضدك بتشهريها
وقلبى اللى كان حيموت فداكى مفكرتيش فيها؟
قلبى مش لاقى وبيشحت تمن اللحمه
ولما شم ريحيتها إعتبروها خيانه عظمى
كل ده علشان قلبى حب يكون إنسان؟
كلهم بيقولوا انك إنتى أكبر أم
ضحيت بكل شئ ونسيت ضغط الدم
شديت الحزام وقبلت الحرام وشيلت الهم
مكنش ناقص غير إن قلبى ياكل بنفسه السم
من كتر اخبارك ما بقت مستحيله
قلبى بقا رئيس القلوب العليله
..........................................
العيشه حتى يا بلدى قلبى معاشهاش
مادوقتش يوم الراحه ولا لحظة إنتعاش
إستغلوا ضعف قلبى وباعوكى ببلاش
وانا اللى قلبى فى الخطر .. لسه عليكى بينفطر
لسه بفكر فيكى حتى وانا فى غرفة الإنعاش
............................................