[مرام احمد]

السلام عليكم انا زميلتك في اولي طب
اولا إهدي خالص ايه كم التوتر ده كله الموضوع ابسط من كدة بكتير استهدي بالله كدة ماتشمتيش الشيطان فيكي اعوذ بالله منه اولا كونك تبقي مدايقة مش عايزة تذاكري ده طبيعي وبيحصل لكل الناس وياما حصلي كدة انا وغيري ممكن اتفق معاكي اتفاق خدي اجازة انهردة وبكرة ماذكريش حاجة خالص ولا تفتحي الكتاب نهائيا اقعدي اتفرجي علي التليفزيون واخرجي انتي واهلك ونامي 12 ساعة تمام
كأنك اخدتي اجازة انتي محتاجة ده قوي دلوقتي علشان نفسيتك تهدي
بعد كدة ابتداء من يوم الاحد ان شاء الله حددي حاجة بسيطة ابداي بيها احنا لسة في شهر 12 الوقت لسة بدري قوي تقدري تذاكري كل حاجة وتتفوقي كمان وانا ياستي مستعدة اتابعك كل يوم من دلوقتي لغاية اخر يوم في الامتحانات لو تحبي واشوف ذاكرتي الجزء اللي هنتفق عليه
بس علشان خاطري اوعي تقولي علي نفسك فاشلة انتي بنت متفوقة جدا بدليل انك مدايقة انك مش بتاذكري وبدليل انك كتبتي الكلام ده الفاشل بيبقي ولا فارق معاه حاجة وعلي فكرة مش معني انك ناسية كل حاجة دلوقتي انك مش هتعرفي تحلي في الامتحان اللي بعد 6 شهور وعلي فكرة بقي انا متفائلة بيكي جدا وحاسة انك هتعملي حاجة جامدة جدا السنة دي وتفرحينا كلنا