اقتباس:
المشاركة الأصلية كتبت بواسطة سلمي..
السلام عليكم
الله يكرمكم ساعدووني ارجوكم
انا مش فاهمه اي حاجه في الفيزياء تالته ثانوي
لحد دلوقتي معرفش فيها اي حاجه ولا عارفه اذاكرها ازاي ولا منين
الفيزياء فوق مستوي قدراتي انا مش بفهم زي زمايلي وبتكسف اقول انا مش فاهمه
عشان هما بيضايقوا وبيبقوا مش عايزين حد يعطلهم الحصه عشان ياخدوا حاجه جديده
والمدرسين نفسهم بيتخنقوا من ال مش بيفهم
انا اعصابي تعبانه اوي وحاسه بالضعف والفشل حاسه اني اقل من زمايلي
انا مكسوفه اوي انا مبعرفش اي حاجه
والفيزياء كرهتني في نفسي ومبقتش افتح المواد التانيه بسببها
انا مخنوقه اوي والمواد متراكمه عليا
بالله عليكم محدش يستهزأ بيه
|
وعليكم السلام ورحمه الله وبركاته
أولا : إنتى من حقك إنك متفهميش ومن حق المدس اللى بيشرحلك إنه يعيد ويزيد فى الشرح 100 مره لغايه لما يتأكد إن الكل فاهم كويس جدا ... ولو معملش كده يبقى سورى مدرس مبيفهمش ولا بيعرف يشرح لطلبه
ثانيا : أوعى تتكسفى إنك مش فاهمه وزميلاتك اللى بيضايقوا يولعوا الأهم إنتى لازم تفهمى كل حاجه بتاخديها وده حقك إذا كان المدرس بيعيد فى الشرح ده مش بيمن عليكى ده بيعمل اللى عليه واللى المفروض يتعمل
ثالثا : إذا كنتى انتى بتقولى ان المدرسين مش بيحبوا اللى مش بيفهم يبقى العيب منهم وانتى عليكى انك تغيرى النوعيه دى من المدرسين لانهم مدرسين سورى فشله مش فاهمين يعنى ايه شرح للطالب
رابعا : بصى احنا نعتبر فى شهر واحد يعنى فات نص السنه وبتقولى انك مش عارفه حاجه خالص
يبقى لازم تنجدى نفسك ... أنا وجهه نظرى إنك تسيبى المجموعه اللى انتى فيها دى لانها جايبالك إحباط وده ممكن يتعبك كتير ... كان المفروض المدرس يقف صفك ويشرح على أقل مستوى لطالب فى المجموعه لكن شكله معندهوش درايه باى حاجه عن اسلوب التعليم
ممكن تسيبيبه وتجيبى مدرس يشرحلك من اول وجديد بمعنى اخر ينقذ ما يمكن انقاذه
لان بجد وبصراحه المفروض فى الوقت ده انا كنت مخلص نص الفيزيا يعنى لغايه الفصل التامن
فلازم تنقذى نفسك ومتسيبيش نفسك للاخر ... الفيزيا صعبه انها تتلم فى الاخر
ابدأى شوفى مدرس ياخد معاكى من الاول وانتى تكونى شغاله مع مدرس عادى فى المنهج
أنا عارف إن الموضوع مرهق من حيث كم المذاكره أكيد مرهق انك تاخدى درسين ف ماده بس تقريبا ده الحل انك تشتغلى مع واحد المنهج من اوله وتشتغلى مع التانى المنهج زى ما هو وصل عشان يبقى بتاخدى جديد وقديم عشان تخلصيها ومتتزنقيش فيها ف المراجعه
خامسا : حطى جوا نفسك عبارات أنا بفهم أنا شاطره أنا ححاول أنا حوصل وأوعى تخلى اليأس يتغلب عليكى لانه ممكن يدمر كل حاجه
سادسا : أى حد بيألس عليكى أو بيقول إنك مش بتفهمى سيبيه مباشره ولا تسمعى كلامه خالص ولا كأنه بيقول حاجه
حاولى تبدأى من جديد زى ما قلتلك ولازم تستحملى المجهود ده لان اكيد عندك هدف وعايزه تحققيه
سابعا : تأكدى هنا إن محدش حيستهزأ بيكى لأن هنا كلنا بنتعرض لمواقف أوحش من كده وياما ناس فقدت الأمل وهنا جددت أملها من جديد ولقت إللى يساعدها ويقف جنبها لغايه ما عدت المرحله دى
ربنا معاكى إن شاء الله وأى حاجه عايزاها إحنا هنا إخواتك كلنا نساعدك إن شاء الله