[To Be Is To Do]

المشاركة الأصلية كتبت بواسطة thekingboy

السلام عليكم أزيكم يا جمااعة يارب تكونوا بخير وسنه سعيد علينا إن شاء الله
عندي مشكلة معقدة نوعا ماا يعني حبيت اخد أرئكم ونصايحكم علشان أعدي بسلااام من 3 ثانوي بداية المشكلة أني معنديش دافع يقويني واللي هوا مجموع ثانية ثانوي 90 في المية مبيجبوش حاجة في علمي للأسف يعني مش موجود علي الخريطة !!! مع أن دا للأسف مش تقدير ليا ودا كانت صدمة ليا لأني دايما كنت متفوق قبل كدا وفي الدروس كذلك

المهم أني اخترت غلط في أوي السنة مدرس رياضة بيقولك أحفظ المسألة لو مفهمتهاش ومش بيراجع علي واجب وكدا وسنه كبير فملهوش خُلق 62 سنه !! بس للأسف حسب السمعه هوا كان الافضل عندنا في الإدارة

نعم ؟؟!!
احفظ المسأله لو مفهمتهاش ... ده لو طالب فى الضياع يعنى مش بيفهم حاجه خالص ومعاند انه يدخل علمى
وعلفكره هو كده يعتبر مدرس فاشل انه يخلى طالب قاعد قدام منه مش فاهم ويقوله إحفظ ده بدل ما يقوله اعدهالك مره واتنين وعشره
علفكره مش ب السن انا مدرس رياضه 3 ث كان عنده 64 سنه وكان بيعيد ويزيد الف مره وكان معانا طلاب سورى يعنى مفيش خالص وهو عارف انهم مش حيفهموا الا بصعوبه وتكرار ومع ذلك عمره ما ملّ منهم ولا عمره قال ل طالب إحفظ
سورى مدرس مش بيراعى ضميره والله
وكمان مش بيراجع واجب ولا حتى بيديك اجابات للواجب ده يبقى سورى بقى يقعد فى البيت أحسن ما يأذى ولاد الناس بصراحه

رحت عند مدرس في إدارة تانية المهم انه شاطر يعني بس انا مستويااا ضعييييف جدا بلنسبة للباقي

وطبعا ده مسببلك إحراج أو نوعا ما بتحس إنك أقل القاعدين فى الدرس وده شعور طبيعى على إنك داخل على مجموعه جديده وطلاب جدد ومتعرفش حد فأكيد محرج
الحل واللى انا شايفه انك لو تعرف تجيب مدرس يجيلك لوحدك يظبطك فى اللى فات وأكيد حينجز معاك بما إنك لوحدك وأعتقد إن ده أسلم حل عان نتقذ نفسك لإننا فى شهر واحد يعنى يعتبر نص السنه خلص

!! وكذلك الفيزيا نقلت عند مدرس اشطر من واحد حذروني منه بس في ناس بتقفل معاه فدلوقتي ضايع مني حاجات كتير في رياضة وفيزيا اللي هما اساس العلمي رياضة !!

مش عارف احول ادبي وهل لسا الباب مفتوح ولا لا عمري ما صاد فت حاجة كدا الصراحة ومحتار ومتردد

تحول أدبى وإحنا فى شهر واحد
طبعا بعيده جدا ومتفكرش الأدبى راحه لإنك لو حولت حتضطر إنك تأخد تاريخ وشوف التاريخ كام فصل ومحتاج تعيد وتزيد وانت قدامك 5 شهور بس تلحق تخلص فيهم منهج تاريخ وفلسفه وعلم نفس مثلا
طبعا أكيد صعب .... على الأقل إنت فى الفيزيا والرياضه مش ميح .. بمعنى .. عندك معلومات إن شالله كلمه من كل درس أهووو أحسن من إنك تدخل على مواد إنت مفتحتش فيها حرف

ومشكلتي في الحياة مسائل الفيزيا والرياضة ومن اول السنة مفيش ولا امتحان حضرته مع ولا مدرس الصراحة واقف في مكاني مبتحركش دلوقتي والوقت بيجري

وده أكبر غلط طبعا إنت عملته
ميزه الإمتحانات إنها بتكشفك على حقيقتك ( سورى فى التعبير ) بس هى فعلا مرايتك إللى بتشوف فيها نفسك .. وإللى من خلالها أعرف أنا كويس فى إيه ووحش فى إيه
على العموم ... ده مش وقته الكلام ده أنا عارف بس أعتقد إن السبب ده هو إللى خلاك مش تمام حاليا لإنك معرفتش مستواك فى إللى درسته طول السنه

ولما اقارن قد ايه كنت شاطر في الكيميا جبت 49،5 مش عايز اضيع مجهود السنة اللي فاتت

طب طالما إنت جايب 49.5 كيميا يعنى مستواك كويس فى تحصيل المواد العلميه وده يثبت إنك حتبقى كويس فى الرياضه والفيزيا

والادبي سهل في نفس الوقت بلنسبالي علي الأقل حيحترموا اني جايب 90 علي عكس ااعلمي

طبعا مجموعك بالنسبه لأدبى كويس جدا بس صدقنى لو إنت غيرت أدبى يبقى بتحط نفسك فى موقع وحش جدا لإنك مطالب إنك تدرس مواد إنت لا علم لك بيها ولا عمرك شفتها وممكن كمان يكون باب التحويل قفل

ياريت مساعدة بليييز

بص أنا حكلمك بصراحه
إنت لو نويت تخليك زى منت علمى رياضه يبقى إنت عايز مجهود جبار جدا السنادى لإننا بنفكر فى هندسه وحنقول على تنسيق السنه إللى فاتت إن أقل هندسه واخده 94.5 وانت جايب 90 يعنى إنت عايز السنادى 98 وشويه فى 3
مش صعبه لكنها عايزه مجهود جبار وعايزه عزيمه وإنت بتقول معندكش دافع إزاى ؟؟؟
دنت عندك دافع أحسن من ميه واحد عايز ألحق هندسه يعنى لازم أموت نفسى ال 5 شهور الجايين
لو إنت حابب هندسه موت نفسك عشان تلحق
معاك 5 درجات مستوى إن شاء الله أقل حاجه 4 منهم فى جيبنا مضمونين بعون الله
يبقى أنا أركز على مواد ال 50 الماده الأدبيه بتاعتك أيا كانت ( فلسفه / علم نفس / اقتصاد واحصاء/ ... ) إن شاء الله ميضعش فيهم ربع درجه
والفيزيا والرياضه لازم تتظبط فيهم ... طب إزاى وأنا ضايع
تجيب مدرس للمادتين يخلصلك إللى فاتك لوحدك أكيد حينجز معاك وأهم حاجه يحل معاك مسائل كتير
وأعتقد لو دورت دلوقتى ولحقت نفسك بدرى إن شاء الله تلحق نفسك قبل شهر 5 وسيبها على الله

وهل في هندسة الفيزيا و الرياضة لو مش كويس فيها ممكن اقع في الكلية

ممكن أقولك حاجه
إنت لو ساقط رياضه 2 وفيزيا ودخلت هندسه ولا حتفرق معاك
لإن المناهج حاجه تانيه خالص بالذات فى الفيزيا
أما الرياضه فأول درس تفاضل مبنى على سنه 2 كمان مش 3 و عندك بس فى التكامل هو اللى ممكن يكون فيه جزء صغير من تكامل رياضه 2
إللى عايز أوصلهولك إنه مفيش علاقه بين ده وده

وإللى كمان نفسى أوصلهولك : إنت لو حابب هندسه حتعمل المستحيل عشانها وحتموت نفسك ويبقى عملت اللى عليك قدام ربنا وقدام نفسك
لكن لو العمليه مش فى دماغك وهندسه مش بتفكر فيها يبقى حول أدبى حسب ميولك

بس نصيحه تحويل الأدبى مش حل لإنك حتعانى زى منت بتعانى دلوقتى

صل صلاه إستخاره أو بأى وسيله أطلب من ربنا إنه يدلك على الطريق الصواب والصح وإنه يوجهك للوجهه إللى تحس إنك مرتاح فيها

طولت عليكم انا اسف بس ياريت تساعدوني

إنت تأمر وحاول تلحق نفسك
وأى حاجه كلنا تحت أمرك وأكيد كلنا حنساعدك
ربنا يوفقك للى فيه الخير ليك