[Noha 2007]

انا متفقه مع حضرتك يا بشمهندس احمد فى ان الامتحان ممكن الطالب المتوسط يحله بس الكلام ده لو الطالب عامل حسابه مش يدخل يتفاجأ
ممكن الامتحان يكون سهل بالنسبه ليك لكن بالنسبه لينا كلنا احنا متعودناش على كده وكان لازم
حتى على الاقل يكون مده الامتحان اطول من كده علشان نقدر نفكر
ثم ان طالب ثانويه عامه ثالثه ثانوى بتبقى اعصابه بايظه فى الامتحان لان اى كلمه بيكتبها متوقفه عليها مستقبله ازاى تفاجئه بأمتحان زى ده من غير حتى سابق انظار طيب ما اكيد الطالب اعصابه هتبوظ ومش هيعرف يركز ولا يفكر حتى لو كان الامتحان سهل
ومع احترامى لرأى حضرتك فى موضوع الكتب الى بتطالبنا اننا نقرأ فيها
ده مستحيل لان مفيش طالب هيسيب اللى ورا ويعد يقرأ فى مراجع وكتب ومفيش مهندس علشان يبقى مهندس قراهم وعلى فكره انا اختى مهندسه ومحتجتش علشان تكون مهندسه انها تقرأ مراجع ولا حاجه
وحتى لو انا قريت مراجع وكتب لما اجى اشتغل مش هشتغل بيهم انا بتكلم فى الواقع اللى احنا عايشينوا
ولو هنتكلم على التعليم التعليم من اول اولى حضانه وهو بايظ لو عايز تصلح يبقى نبتدى من اول الحضانه مش من ثانوى وكل واحد فينا بيفكر فى نفسه مش بيفكر يصلح بلده لان بلده اصلا مش بتفكر فيه
اسفه على الاطاله
الاختلاف فى الرأى لا يفسد للود قضيه
تقبل خالص تقديرى واحترامى